Ngaihtuahna Dik 12

1. Pathian hian kan tana a ruat tak kan tawn hma hian mi dik lo tlem a zawng tal lo tawng hmasa tur hian min ti a ni maithei a, mi dik lo kan lo tawn hmasak tawh chuan a tawpah kan tana ruat, kan tana tha kan tawnin lawm nachang kan hre thin a ni.

2. I phurna te, i duhnate leh inngaihzawn hlimnate a awm miah loh hnu pawha i hmangaih nia i hriat chu i la duhsaka i la ngaihsak fo chuan hmangaihna dik tak a ni.

3. Hlimna kawngkhar a inkhar hian a dang a lo inhawng leh nghal thin a, kawngkhar inkhar lam kan thlir rei lutuk thin avangin kan tana inhawng kan hmuh loh phah thin a ni.

4. Thian tha ber chu in kawta ke thena ngawirenga i thutpui theih, engmah sawi loa in kal leh ringawt hnua i ngaihtuah leta i titipui zawng zawnga titipui nuam ber nia i hriat kha a ni.

5. Kan hloh hma chuan kan neih kan hre lo tih hi a dik a, a lo thlen hma loh chuan engnge kan neih loh kan hre lo tih hi thudik tak bawk a ni.

6. I ngaihthlak duhte hrilh che sela i tihte'n i ngaihthlak duhte an hrilh ngai lo maithei che a, thinlung taka i hnena thil sawite lakah i beng chhu ngawng suh.

7. Landanah zawng suh, landan chuan mi a bum thei. Hausaknaah zawng suh, a tawpah a thamral thin. Nangmah tinui theitu che zawng rawh, ni hrehawm thim tak hi nui hmel chauhin a tieng thei a ni.

8. I suangtuah duh chu suangtuah la, i kal duhnaah kal la, i nih duh chu ni rawh. A chhan chu, nun pakhat chauh i nei a, i thiltih duh zawng zawngte ti turin chance khat chauh i nei a ni.

9. Tawng thlah dahin thinrimna a chhem alh thei a, tawngkam chhiain nun pumpui a tichhe thei a, a hun taka tawngin rilru a tihahdam thei a, hmangaihna tawngkam chuan rilru na a tidam thei a, hlimna a thlen thin.

10. Mi hlim berte hian thil tha ber an nei bik lo tlangpui a, an chunga thil lo thleng leh an thil neihahte an lawm thiam thin zawk a ni.

11. Tap thin te, rilru na thin te, zawng thin te, bei ngat ngat thin te, hlawhchham tawhte hnenah hlimna tak tak a thleng thin a, an nun nena inzawmna nei midangte pawimawhna an hriata an ngaihhlut thiam avangin an hlimnate a lo thleng thin.

12. Hmalang êng berte chu thil kal tawh theihnghilh tum tlatte an ni a, i hun kal tawha i thiltih dik lohte leh i rilru tihahtute i theihnghilha, lui luang liam anga i kal liam tir loh chuan hmalam panin i kal zel thei lo vang.

Mizo celeb: Khawhar hla nen RP-i

Aman khawhar hla ka sa dawn a ti miau si a. Tunlai chu an intihhmuh deuh a maw ni! Fam ngaihna lam hla zai thiamte saktir Mizote zingah an awm ta nual mai. Sak pawh an sa nalh thei thin khawp mai. Hengte hi demand channel lamah pawh hmuh tur tam tak a awm tawh. A thenin hla nei sain an sak tir a, thenkhatin neisa lem lovin, an ngen tawp thin bawk a.


Kan sawi tak ang deuhin Leitlangpui zaithiam, Len ka zuam lo satu Lalropuii Pachuau pawhin khawhar hla ka sa dawn e, tiin Thlifim hnenah a sawi hlawl mai. Thlaleh lama tihchhuah turin tunah hian an buaipui mek niin a sawi bawk.

Rp-i chuan, “Thingtlang lama chhungkaw pakhatin an duhlai thi ta hriatrengna atan an ti a, a hla chu ‘Ka ngai ngam lo’ tih a nia,” tiin thlifim hnenah a sawi.

Hei lo pawh hi music video pahnih buaipui a la nei bawk a. A buai thei chur chur hle. Heng a video-te hi demand channel lama pek chhuah rum rum erawh a hmanhmawh lem loh thu Rp-i hian a sawi thung.

Health: Hriselna Thuruk 10

Kan nitin nun hrang hrangah hriselna kan mamawh a, chung zinga pakhat chu taksa chak tha tak neih a ni. A hnuaia thil chi hrang hrang 10 kan tarlante khu uluk takin chhiar la, habit-ah neih tum la, i hriselna pawhin a lo that phah sawt pawh kan beisei a ni.


1. Exercise: Taksa sawizawi dan chi hrang hrang a awm ang bawkin exercise lakna hmanrua pawh tam tak a awm. Chung zawng zawng chu i ti thei vek kher lovang; awlsam leh tha tak si chu zing tlan hi a ni. Kar khatah vawi 3 tal exercise lain han tlan chhin teh. Habit-a i neih phawt chuan i hriat loh lai khan i lo hrisel phian dawn a ni.

2. I hnathawhah lungawi rawh: Hna i thawh laiin i theihna zawng zawngin thawk la, a tul leh buai phili hle mai rawh. Chu chuan i thluakah chakna a pe che ang a, i hriatna pawh a lo pung zel dawn a ni.

3. Chhungkaw hlim neih tum rawh: Inchhungkhur a hlima a nawm viau chuan nun pawh a nuam a, a hahdam thlak em em thin; chu chuan taksa pawh a ti hrisel thin a ni.

4.  Thian siam rawh: Mahniin awm tam lutuk suh ang che; thiante bula i awmin i ngaihtuahnate zau takin sawi chhuak thin la. I thinlunga i ngaihtuahte pai reng lova i sawi chhuah khan lung natna lakah nasa takin i inveng tih i hre dawn nia.

5. Hahdam thiam rawh: I hahchawlh changin thil engemaw ho deuh anga lang pawh ti thin ang che. Mi thenkhat chuan yoga emaw Tai Chi emaw an ti thin; chu chuan an ngaihtuahna a ti harh a, engemaw thila an chak lohna thinah a tichak thin niin an sawi.

6. Ngaihtuahna tiharh rawh: Pathian hnenah tawngtai thin la, malsawmna a pek avang chein lawmthu sawi thin rawh. I ngaihtuahna kha chik takin hmang thin bawk ang che. Hei hi dam reina niin an sawi.

7. Malsawmna pe chhuak rawh: I thil neihte midang tan ui nei suh. I ui loh avang khan i nunah hlimna a lo thleng zawk dawn a ni. Khawvelah hian mi tam tak an awm a, chung mi chi hrang hrang chuan harsatna engemaw kan tawk vek thin; chung kan harsatnaah chuan kan inpui hreh tur a ni lo.

8. Hunbi neia ei leh in: Ei leh in hi a inkhai rual tawk chauha tih thin tur a ni. Ei leh in tha lo lakah fimkhur bawk ang che. A tam thei ang ber tui in thin bawk tur a ni.

9. Mu tha rawh: Hahdam taka mut tur a ni a, chutiang bawkin zingah pawh hma takah thawh tur a ni. A tlangpuiin darkar 8 mut thin a tha. Rilru kam tawt nei run chung leh hah taka awm loh tur a ni a. Hahdam taka i mut theih thin chuan i taksa pawh a lo lang naupang leh sawt thei a ni.

10. Nun awmzia hre rawh: I nun tihahdam thiam la, chu chuan i hmalam hun tur thlir vel pawh a ti nuam ang a, a thim zawng aiin a eng zawngin i hmalam thlir tum thin ang che.

mizo celeb: Zomuanpuii

Piang thar lova Gospel ngam ngai lo Zomuanpuii

A piangthar tih thawm an sawi vuai vuai a, tak tak em ni? tia zawhna pawh a tam hle. Chu chu tunge tia an sawi luai luai chu Icon star, Sihphir nula, tunlai mizo lengzem hla satute zinga a hla sak ngaihthlak hlawh ber pawl chu Zomuanpuii a ni.

A reh vung vung emaw tih laiin camping-ah a lo lut daih a, chutah chuan siam tharna changin khawvel thar, gospel lamah, Pathian fakna hmanga rawngbawl tura a in pek tawh thu Zomuanpuii chuan a sawi a, Pathian hlasak hi tunhma atanga a chak tawh a nih thu te, piangthar tak tak ni si lova Pathian fakna hla han sak ngawt a ngam ngai loh thute a sawi luam mai.

Zomuanpuii chuan, “Camping ka luh hma daih atang tawhin ka chhungte, ka nu leh pa, pi leh pute hian Pathian fakna hla hi sa ve tawh la te min ti thin a, kei pawhin Pathian hlasak chu chak thuah chuan ka chak thin lutuk. Mahse, lengzem hla sa thin ka ni a, Pathian fakna hla han sak ngawt mai chu ka ngam lo va, chubakah piantharna tak tak chang si lova han gospel ngawt chu kei pawhin ka duh lo a ni,” tiin Thlifim zawhna a chhang.

Mahniah siam thar chang hmasa phawt lova Pathian rawngbawl a duh lo va, gospel hlasak chu zahawm a tih em em thin thute a sawi uar hle a ni.

Camp-a a luh hma hian music video thar buaisaih tumin hma a la mek a, music track pawh an siam zawh vek hman thu a sawi. “Lenglawng hla chu a rem chuan a tulna hmunah chuan ka sak tho ka ring a, mahse lengzem hla, a ngial a ngana hmangaihna chungchang hla sak chu ka tum tawh lo hrim hrim a ni,” tiin Icon star Zomuanpuii chuan a sawi.

Mizo Celeb: Vincy Chhangte

Project thar nen Vincy

Ama hla phuah, music siam, cover design hmang vekin album a ti chhuak a, zaithiam hrang hrangin Vincy-a zai hi an pui a, C. Sanga, F. Laldinmawii etc an ni nawk mai, ngaihthlak pawh a ti man hla hle.

Album copy tam tak a siam duh lo, a chhan chu tunlai zaithiamte buaina tho, copy ruk tam vangin, “Music thi ringawt tur leh tih thar leh nan pawh album siam zauh zauh reng hi ka duh,” tiin Mizo rapper lar leh chanchin ngah ber pawl Vincy chuan a sawi.

Mahni line-a thlang tawh tan leh tui chilh laklawh tan chuan zai han chawlhsan ngawt thu awm suh,. marking lamah harsa mahse tih leh mai thin a awl thu a sawi bawk. Computer zuarho leh mobile phone avanga marketing chhia a nih thu sawiin, “Computer zuarho hian an hard disk-ah hian engtin tin emaw hian an lo thun a, a thlawn vekin an computer hralhnaah an pe tel thin a, hei hi zai mi ho tan chuan chanchin chhe tak a ni. Tin, mobile phone hmanga inpek chhawn theih a nih atang chiah hian buainate nau kan tawk bawk a, miin kan zai ngaithla turin cassette dawr an pawn tawh lo va, awlsam takin an inpe chhawng zut zut thei a, hei hi kan tan chuan a buai thlak bawk,” a ti.

Tun hnaiah project thar tha tak mai a ngaihtuah chhuak a, chu chu dawr fakna lam a ni daih thung. Dawr fak duh leh an dawr fakna hla siam tir theih reng a nih thu a sawi a. Chulamah chuan eizawnna kawng zauh a tum mek bawk a ni.

Mizo celeb: Mimi Renthlei

Mimi Renthlei ngaihdan, duhzawng leh nin zawng

1. Ninawm & thlakhlelh

Ninawm deuh mai pakhat chu, nulat kan hmang ve dawn chauh a, a hman nazawngin; “Pasal lamte hi.. ve dawn tawh em?” tia in zawh reng mai hi a ninawm ka ti a, ka hne tawp a ni mai.

Hunawl neih deuh changa Movie en teh ang tia han en maina tur theater tha kan nei lo hi buaithlak ka ti a, changtlung tak neiha, duh hun huna en theihte hi ka thlahlel ve thin. Hunawl hnawhkhah nantha ka ti em a.

2. Sports

Infiamna lamah chuan football, tennis leh basketball-te hi hmuhnawm ka ti thei lutuk. Chuan, table tennis hi a tul chuan ka khel ve thei a, chess hi keima tawkah chuan ka thiam ve fu bawkin ka inhria.

3. Movie:

 En kual deuh dum thin mah ila Romantic Comedy lampang hi hmuhnawm ka ti thei deuh ber mai. Min tihlima en a hahdam thlak bawk si a.

4. Music:

 Music hi ka ngaithla kual deuh dum ni maiin ka hria, RnB leh country music ka ngaithla nasa a. Mahse ka mood a zirte pawhin blues leh rock music-te hi ka ngaithla ve vek thin tho. Mood a zirte pawh a niang chu thenkhatah chuan.

5. News

 News hi a dik tak chuan polictics lam a ni emaw entertainment a ni emaw controversial deuh tak, ngaihtuahzui tur tithui takte hian mi a deng na duh ka tia. Mahse hengte hi news tha ber chu an ni chu ka ti thei chuang bik lo.

Hair care: Sam i colour ngai em?

- Kathryn M.D.

Hmeichhe nih nawmna leh hlimawmna pakhat chu landan thlak thin hi a ni a, mutkawr leh underwear (lingerie) thar han leia inbel te, thawmhnaw thar inbel te, sam style thlak leh sam colour-te hi thil nuam leh hlimawm tak a ni. Tu tan pawh landan leh nihdan ngai reng chu a ninawm avangin inthlak danglam hi kan mamawh a, inthlak danglam dawn chuan sam colour tih danglam tluka inthlakna tha a vang viau awm e.
Sam colour thar chuan ngaihtuahna thar min pe a, khawvel thara cheng ang maiin a awm theih thin. Kan la nih ngai miah loh sam buang ther thawr hlim theih hmel tak kan ni thei a, sam dum tle nalh duhawm tak kan ni thei a, sam sen mit la tak kan ni thei a, sam uk khek khawk cool hmel tak leh a dangte kan ni thei bawk. Heng sam colour hrang hrangte hian inrintawkna thar min pe thei a, rilru lamah pawh phurna thar min pe thei a ni. Kan sam rawng thlak ringawt hian zalenna thar min pe thei a, phurna thar min pe thei a, nimin leh vawiin inan lohna chu sam colour ringawt mah nise rilru a danglam dan a nasa em em a ni. I duhzawng a zirin sam colour-na hmanrua hmangin in lamah pawh i colour thei a, stylist (beautician) i pan thei a, tunlaiah chuan stylist koh mai theih fel tak tak pawh an awm tawh a, i ngaihtuah hmasak ber tur chu i sam tlem a zawng rawng i thlak phawt dawn nge a pumpuiin i thlak nghal hlawk dawn tih a ni.

Tips leh Tricks

* I sam colour i thlak vawi khatna tur a nih chuan i sam pangngai nena inang deuh lam ngaihtuah ang che. Vawi khata i sam put ngai loh deuh i put chuan i awm thiam lo maithei a, i sam a lo than hret pawhin a lang vak lo dawn a ni.

* Sam colour ngai lo i nih chuan a reh hma deuh tur ngaihtuah la, sam rawng i thlakna i inhmeh lo palh emaw, i duhzawng a ni lo palh emaw a nih chuan zalen takin i thlak leh thuai thei ang.

* Nangmaha sam tlem a zawng colour i tum a nih chuan a rawng i inhmeh turah i chhungte zinga mi tuemaw, i thian emaw ngaihdan la hmasa la a tha hle ang. Kan hmuh theih lohte hi midangin chiang taka an hmuh theih chang a awm fo thin a, darthlalang pawh hian min bum ve fo thin a, sam thar nalh tak i neih theih na'n i inhmeh tur midang zawh phawt chu a sual lem lo vang.

* Colouring kit zawng zawngah tihdan tur (instruction) a inziak vek a, uluk takin zawm la, zawm loh chhete pawh nei suh ang che. Sam colour-na dye-ah huat i neih leh neih loh enchhin na'n an duhdanin i sam tlemte test phawt la, i huat loh chuan i colour chauh dawn nia.

* I sam i colour-in hnuai lamah i sam dah thla la, a nalh leh zual ang. A awmdan pangngaia dye hnawih tawp ai chuan chunglama pin-a tihchhoh pawh a remchang zawkin a mawi duh zawk hle a ni.

* I sam chu a hran hranin then la, a bul atanga a tawp thlengin kim takin dye chu hnawih la, i bek atangin hnawih tan rawh. I hnawih zawh vek hnuah instruction i zawm kim vek leh vek loh ennawn leh ngei ang che.

* I lu leiah sam colour a kai nghek loh na'n i colour hmain moisturiser emaw, petroleum jelly emaw hnawih ang che. Sam colour-na dye tam tak chu lu leiah a kai lo va, thenkhat erawh chu a kai ve tho va, inven na'n tih ve tho chu a tha a ni.

* Sam dum tan chuan sam buang mawi tak neih hi a awlai lo va, chuvang chuan beautician hmu hmasa la a tha a, sam thim lam atanga a êng, a bikin a dum atanga a buanga chhuah hi thiam a ngai viau a, chuvang chuan mahni-a tih bawrh bawrh loh deuh a tha ang. Sam dum leh sam khawih vel thiam tak ni sa pawh ni la, sam dum atanga sam buang leh sen lama tichhuak tur chuan tihsual palh a hlauhawm tho a, tihsual palh siam that leh ai chuan fimkhur a awl zawk tih chu kan hre theuhin a rinawm.

* Sam i colour hmain uluk takin conditioner-in chiah hmasa la, shampoo-in uluk takin su leh la, ni hnih chhung nghak leh ang che. Chutianga i tih chuan colour chu a nghet bik ang. Conditioner leh shampoo-a enkawl hmasak hian sam a sensitive a, luvun a nem bawk a, sam colour a awlsam bik a ni. Sam colour thar hi thil hlimawm tak a ni a, lo ti ve chhin la, lo hlimpui ve teh.