Sex leh Khawtlang Nun (From Thlifim April 2009)

- B. Lalchhanzova
Sex hi Sex han tih ringawt pawh hian engemaw tim deuh duina kan nei fo thin a, mahse eng kawng emaw chuan kan hrethiam viau hlawm a. Mihringte min ti mihringtu, mi pangngaia min siamtu chu SEX hi a ni chiang mai.
Damdawite pawh hi a hmanna tura hman loh emaw, a hman dan tur dik lo zawnga hman emaw chuan thiltha khan thil tha lo a thlen fo thin a, hetiang deuh hian he sex, kan nun tifamkimtu hian famkim lohna min thlen fo mai.
Sex hi hrilhfiah thiam har ve tak mai a ni a, he thuziak lo chhiartu zawng zawngte pawh kan ngaihdan a inang lo hlawm hle ang. Nia, ngaihdan inang neih mai theih pawh a ni lo; a chhan chu, mihringteah hian tumah inang chiah kan awm tlat lo a ni.
Tichuan sex chu mihringte danglama min siamtu, khuanu duan, kan nun zawng zawng kaihruaitu a lo ni. A zau hle mai; kan sawi zel ang.
Hman dan a zir
Sex hi a tha leh dik zâwnga hman chuan mihringte hi zahawmah min siam a, nun tha zawk min kawhhmuh a, keimahniah inrintawkna a thlen a, khawvel hi beiseina mit-in min thlirtir a. Kan nuna kim lo a hnawhkhat a, chak lo nia kan inhriatnaahte chakna min pe a, chhungkaw hlim min dintir a, tanpuitu tha min pe a, kan nun ruak a hnawh khat thin.
Sex hman dik lohna erawh chu chhe tak a ni. Nunkhuaa kan hmathlir zawng zawng a tithlawn vek thei a, jail rûn min kaitir a, zahna ruamah riahrûn min remtir a, fahrahte min siam a. Natna vei nuam lem lo HIV/AIDS-te min veitir a, thian thate nen kan inthen phah a, chhungkua a tikeh pheng phung a, mi laktlak loh zet zetah min chhuah a, inrintawkna zawng zawng a ti bo vek a, damchhûng ni tawite hi hremhmun hmasaah a chantir thin. Damlai mawi vena zawng zawngte chu buhsi thliin a len bo hlauh ang mai hian min tihbosak ta vawng vawng mai thin a nih hi.
Sex dik
Siamtu Pathianin inthlahpun theihna hmanrua mihringtea a dah, mihringtea inngainatna thlentu, mipa leh hmeichhiaa min thenhranna hi sex a ni ti ila kan thelh thui lutuk lo turah ngai ang. Hmeichhe hnute pâwng lah mai han hmuha mipa ngaihtuahna a’n kal thui ta viau mai thinte hi Siamtu ropuizia tilangtu a ni.
Huaisen leh inpe tak maia mipain a tihtur tha taka a’n hlenchhuakte hian hmeichhe lairil chu mipaah chuan a bet vawng vawng mai thin. Darthlalang hmaa hmeichhiain a kut tin, a ke tin, a sam leh a hmui a’n chei hlarh hlarh chhante pawh hi sex vang a ni a, mipain midangte thlamuantu leh hlauhawm a awm chang pawha zâm duh lohna thinlung a putna chhan pawh hi sex vang tho a ni. Tunlaiah phei chuan eiruk duh ve lohna leh dik duhna rilru kan rama lo inmun mekte pawh hi sex dik mizia lo lang tan chu a ni.
Mizote nunah
Mizote hi hnam naupang tak mai kan ni a, mipui rorelna leh khawtlang nun pangngai, khawvel zauzawk pawh phaa kan chenhona pawh kum rei lote kal ta mai kha a la ni. Sex chu mipa leh hmeichhe inpâwlna leh tisa châkna hrikthlakna chin chiahah kan thlir a, tunlai hian sâwn thlak leh pawngsual pawh a hluar hle.
Mahse, kan Mizo nuna awm thin pawngsual  (tunhma bik) a mite kha suahsual vang hrim hrim chu a ni vek loin a lang. Sex awmzia dik tak, a hmang thiamte tana a hlutna leh thatna lam kan hmelhriat loh vang a ni. Kum sawmhnih liam ta leh a hmalamte khan TV, Video etc. te hi awm tawh chu nise hnam ang pawhin kan chhe hneh hle tawh maithei.
Tunah chuan sex leh mihring thilsiam (material) inkungkaihna lam kan tawngchho tan dawn a ni a, zirtirna dik hmanga kan inkaihhruai a hun takzet a ni.
Khawtlang (community) hi mimal leh chhungkaw chengho din a ni a, khawtlang hi amah maiin a nuamin a ngelnghet ngawt thei lo; a mi chengte thlamuanna, inkungkaihna, hlim tlan leh tlan lohah a innghat a. Tunah hian kan khawtlang nunah ualau takin sex-in zung a rawn kaih tan dek dek a, kan lo dawnsawn thiam leh thiam lohah kan hmalam khawtlang nun chu a innghat thûk hle dawn a ni.
Mipa leh hmeichhe inît tawnna bikah lo thlir ta ila. Mipa chu hmei taksa inphelh ruak a hmuh chuan dan hman loh deuhthaw khawpin a châkna a chhuak mai thin a, hmeichhia erawh chu chutiang teh thut chu a ni lo deuh awm e. Duh leh duh (Nupa inkarah) chuan theihtawpa intihlim tawnin inpâwlna chu hman thiang a ni a, inpawh taka inpâwlna chuan hlimna thûk tak pawh a thlen thin reng a ni.
Mahse, nupa inpâwl lai chu an fate tan hmuh a tulna tehchiam a awm lo a; a nihna takah phei chuan a tul lo tawp zawk a ni. Inpâwlna hi mi pahnih inkar a ni a, kâr zim tak a ni. Inpâwlna atanga mihring lo ni ta kan ni vek a, kan nû leh pâte pawh an inpâwl thin tih chu tunge hai kumkhua thei ang? Mahse, kan nu leh pate chu an inpawl leh pawl loh kan zawt chuang lo. An inpawl lai hmuh pawh kan tum hran lo va, a tulna pawh a awm lo.
In ngaizawng emaw, in ngaizawng lem lo mipa leh hmeichhiate chu an duh leh an inpawl thei a, tu sawisel theih mah awmin ka hre hran lo; mihring duhthlanna a ni. Mahse mi pahnih inpâwlna a ruktea an lo tih chuan anmahni piahlam a nghawngin a lo pawi ta thin a ni. Mimal mai a nghawng lo va, chhungkua leh khawtlang, hnam ang pawhin min nghawng thei ta thin a lo ni.
Mizo sex video
Mihring thiamna a lo sang zel a, mobile phone, camera leh thil dang changkang fê fê a lo chhuak a, chu chuan inpâwlna nen inlaichinna an nei ta emaw tih mai turin kan khawtlâng nun nen chuan an lo intin ta to to mai a! Kan thiam loh pawh a ni hran lo, kan inrin hmain mihring thilsiam thangduang tak chuan min rûn a, kan hman thiam loh phei chuan khawvêlah hnam zahpui awm tak kan la ni hial maithei. Mahse, false prophesy, tih ka lo hriat tawh kha kan ramah hian a thlen dik ka ring a, tunlai thiamna lo sang zel hi Mizote hian a tha zawnga kan hman thiam dawn avangin kan mualpho pui lo ang a, dinhmun tha zawkah kan din phah dawn a ni.
Kan duh emaw duh lo emaw tunlai thiamna sang zel chuan min ching phar ta nawk nawk a, mumang pawha kan man ngai loh, duh pawh kan duh lem loh Mizo chhulchhuak inpâwl lai thlalak ngei kan mobile phone-ahte kan hmu ta fo mai a, hei hian kawng tam takin kan society a nghawng ngei dawn a, a tha zawnga a nghawng a awm thei ang a, a chhe zawnga a nghawng a awm thei bawk ang.
Sex video-a Mizo ngei mai hmel lang hian he lam kawng zawh ve tur hian min tingampa viau thei a, phuba lak na’n tak pawh kan la hmang hial maithei. A bik takin rawlthar leh tleirawlteah a tha lo lama nghawng a neih thui chuan a pawi thui thei khawp ang a, tih ve châkna leh inpâwlna lam thil ngaihzamna rilru a tuh thei bawk.
False prophecy kan sawi tawh ang chiah khan sex video lo hluar ta hi kan hmalam tan kawng tha min zawhtirtu a ni thei bawk. Sex hman khaw loh avanga mihring nun chhiat theihzia leh mualpho thui theihzia min zirtir ngei se, zirna inah te, Kohhranahte leh chhungkaw inzirtirna kawngahte hian fimkhurna min siam sela, mimal pakhat lo che tladahin chhungkua, khawtlang leh ram a nghawng thui theihzia min hmuhtirtu ni sela, kawng duhawm lo tak, Mizo hnam mualpho theihna atanga inralrinna dârah i hmang ang u.