Announcement

Thlifim Monthly Magazine issue thar ber, September Issue chu a chhuak tawh a. Tunah hian lehkhabu dawrah leh chanchinbu agent-te hnenah lei theih reng a ni.

Hlawhtlinna Rahbi 7 (From Thlifim April 2009)

A hnuaiah hian i nuna i lo hlawhtlin theihna turin rahbi pawimawh pasarih tarlan a ni a, hengte hi i thiltum tihhlawhtlin na'n lo hmang ang che.
Engnge i duh?
I nun pumpuiah i thlen theih tura i rin, i tumngaihtuah hmasa ber rawh. I tum hre loin i lo awm mai mai ang e.
Ziak chhuak rawh
I tum chu ziak chhuak rawh. Fiah takin, a vaiin ziak vek ang che. Thiltum, ziak pawh kan ziahchhuah theih loh chu theihnghilh daih a awl khawp mai a, i theihnghilh theih chu thil theih loh duhthusam lek a ni duh a, duhthusam chu a thleng dik thei lo vang.
Hun tuk rawh
Thil tum i nei a, thlen i tum hun bithliah rawh. Thlen tum hun i neih chuan, kum tam tak hnu pawh ni mahse, nasa takin nitina thlen i tumna kawngah a nawr kal ang che.
List siam rawh
I tum thleng tura i tihngaite ngun takin ngaihtuah la, list siam la, thiltih ngai nia i hriat thar apiang ziak zel ang che.
Ruahmanna
Ruahmanna a mumal loh chuan hlawhtlin a har hle ang. I tihngai nia i hriatte chu a indawt mumal siam la, tih ngai hmasa leh nakina tihturte thliar fel thlap ang che.
Thawk rawh le
Ruahmanna i siam a, thawh a ngai ta. Engemaw tihtur i nei reng tawh a, hnathawkin i thlan a tlak a \ul tawh a ni.
Nitin engemaw tal
I ruahmanna tihlawhtling turin nitin engemaw tal ti \hin ang che. Ni 365 chhung i tum tihlawhtling tura i thawh char char chuan engemawchen chu i thleng thei ang. Engmah ti lote chuan ni 365 chhungin engmah an thleng lo va, nang chuan thui tak i thleng dawn a ni.
(Source: http://www.motivateus.com/)

Private School leh Zirtirtute (From Thlifim April 2009)

- Remruata Renthlei Kum zabi sawmhnih pakhat a ni tawh a, hmasawnna chungchangin kan nunphung a khawih. Hmasawnna tangkai kan sawi a, chu mai a ni lo, employment chungchang chu kan khel ril theih ber a ni.
Mahse, thalai tan chung hmasawnna hman tangkai chu mahni thawhchhuah atanga beisei harsa tak a ni a, lehkhathiam sang thenkhat hlawh chu thla khatah Rs. 4500/- te a ni.
Guest Lecturer
Tun hma deuh chuan Guest lecturer a lar hle a. College-a guest lecturer ni tur chuan master degree neih a ngai a. guest lecturer nih chu thil harsa tak a ni a, an hlawh erawh chu Rs. 4500/- chauh a ni thung. Chutah sawrkarin a thlauhthlak leh mai hlauin, “DPC hmachhawn nawn lovin sawrkar hian min la nghal mai rawh se, DPC kan paltlang tawh tho,” an ti a. Nawr tak taka sawrkar nawr turin an inring hman hle a nih kha.
Tunah chuan Guest Lecturer te an awm tawh lo; sorkar hnuaia lecturer nghet lote pawh contract vek an ni tawh a ni.
Education volunteer Nikum hmasa lawk khan sawrkarin zirtirtu hna thawk turin education volunteer a la a. A tul chuan ram hnuaia naupang awm pawh lehkha va zirtir dawrh dawrh khawpa inpe zo tura beisei an ni a. Thla khata an hlawh tur chu Rs. 2800/- a ni. Chutianga thawk tura inhuam zawng zawngin chu hna chu an chang pha lo mai ni lovin party recommend-te a ngai niin thenkhat chuan an sawi a, a nghet pawh ni lo lehnghal. Pre-service teacher training nei tawhte phei chu sawrkar thil tih danah an lungchhe hial a nih kha.
Private sikul a tam em em. Zirtirtu hna thawk tur an tam. Mahse, graduate chin hlawh tlaâglawn chu thla khatah Rs. 3000-3500/- te a ni a. Pawl 10 pass tam tak sawrkar hnaa lutte basic pay vel a ni. A duh apiang tan private zirtirtu hna chu thawh tur a awm lo va, pû ber nena inhmuh thiam loh tuma thlawn hlawl a ni mai.
Lehkhathiam ve ik, a hminga lehkha zir ve pawh ni lo, vantlang aia thiamna sang zawk neite dinhmun chu chutiang chu a ni a. Thiamna nei hran lote dinhmun phei chu la hniam tak a ni. Industry tia sawi dawn chuan service industry - restaurant, thingpui dawr, printing press, dawr leh thil dang dang a awm nual a. An sumdawnna phei chu a lian hauh lo. Mahse, hna an thawk a. Ni khata darkar 10 thawkte an awm a, a aia tam leh tlem thawkte pawh an awm bawk. Chuti chung chuan thla khata Rs. 1000/- hlawh pha lo an tam mai. Inhlawh chawpa lehkha zir chu hla tak a ni. Vanglai hun chu nitin eichawp dap nan an hmang zo ti tih der mai.
Taxi
Taxi a tam em em a, a neitu tam tak chuan ‘eizawn nan a tlak tawh lo, chhungkaw pawisa lakluh belhchhah nan bak a tlak loh’ an ti a. Khawpui chhung kawngpui erawh taxi chuan a hnawhkhat vek tawh a. Traffic police-te a ti luhai a. Intlanchhawkte an rawt rum rum tawh a. Aizawl khawpuia stand zim te, tlem tak awm an leng lo, traffic police lamin an han mankhawm chu an lungawi lo reng a ni. Mahse, taxi driver chuan thla khatah Rs. 2500/- emaw an hlawh.
Driver
Kum engemawzat kal taah kha chuan driver hi Mizo nula ngaihsan an ni a. Mipa tam takin nih an chak ber a ni. Pawisa han hman mai tur tlachham tura ngaih an ni lo va, sum pawh nei deuh tura ngaih an ni a, Mizo zinga lar em em, meizial pawh tlawn khat cheng hnih man tal lo chu zu lo tura ngaih an ni a, ren em em tura beisei pawh an ni lo bawk. Chu beiseina avang chuan an khawsak chu a hniam ngawt thei lo reng a ni.
Driver hi rinawm tak pawh lo ni se, nitina sum tam tak khawih rengte chu rinawm viau tura beisei tur em ni ang? Nupui leh fate riltama an thih ai chuan pâ ber chu mi buhzema mi a ru chhuak mai tur a ni, tih ngaihdan nei, chhungkaw eizawnnaa pâ dinhmun dah sang em em hnam tan hian Mizo rinawmna tlahniam lo tura beisei chi a ni lo.
Mizorama hna tam takah hian security a awm lo va, organise a ni lo bawk. Private-a thawk driver chu nitin chetsuala thih theihna hmunah a thawk chhuak reng reng a. Vanduaina a tawh palh chuan a ruaituin a duh leh a râl a, chu zawng chu a ni deuh mai. Hna dang pawh chutiang chu tam tak a awm. Workmen’s Compensation Act chu a awm a, mi tam tak chuan beisei ngaihna an hre leh si lo.
Call Centre
Thalai, tam tak chu hmeichhe chak lo tê tê ram pawnah call centre-a thawk turin an chhuak a. Inhlawhna tur chu an hmu, mahse, thenkhat chu zanlaia thawh ngai a ni a, kaisan zelna tur kawng a kaw lo em em mai. Chutah chuan Mizo nula, saptawng hmang thei chin te’n an thawk. Thenkhat chuan, “Vai hoin an thawk tha peih lo va, hmarchhak lamah labour cost tlawm beiseiin hna thawk tur an zawng,” an lo ti lehnghal a. Call centre-a zan laia duty thin tan chuan thawh loha hlawh lak loh tur a nih si chuan pasal neih a harsa duh hle ang. An thawhsakte chu ram changkang tak taka awm an ni a, communication-a hmasawnna chak tak avangin Mizo retheite chu an rawn exploit a ni ber. An hmaa ding zel tur sawrkar chu awm se ram rethei, Mizorama chengte tan chuan hna tha tak zawng a ni tho ve. Zana hnathawka chhuak, kaisanna tur beisei sang vak si lo nula thenkhat chuan nawhchi pawh lo zuar tel mah se khawvel nen hian a inhmeh tho ve. Pu ber tihlawm loh tuma thlawn mai theih a ni bawk si a.
Hetih lai hian Mizoram budget chu kum tin a pung a, kum tin sawrkarin sum a pûk belh a. Sum a pûk chuan kan ram sawrkar a ni si a, mipui chuan lei kan bat belh a ni. Mahse, chung a sum bat chuan mi tam zawk a thlen chuang lo. A thei fâin an chang a, an duh duh an lei a. An duhna hmun hmunah an hmang. Lo thlir dauh dauhtu tan chuan rilru tha tak put reng hi rilru chak loh thlak tak a ni.
Budget leh sorkar hnathawk
Mi tam tak ngaihah chuan contract leh supply chu intihhausak theih dan awlsam ber a ni a. Infrastructure development chu contractor leh supplier chang pha lote lo beisei ve tur awm tak a ni a. Mahse, infrastructure chu hausakna ringawt zawngtu contractor leh supplier thenkhatteah beisei tur a awm thlawt si lo.
Khawvel hmasawn chuan traditional economy a kalsan mek a. Traditional occupation chu innghahna tlak a ni tawh lo. Mahse, chumi chu sawrkar chuan a thlak hlawk thei si lo. Chuti chung chuan government servant economy-ah kan lut a ni reng tho. Sawrkar hnathawkte lah chuan an hrechiang em em lehnghal a, an hlawh chu lo sang ta viau mah se an inthiam lo lem lo. Mizoram tana sumhnarah an ngai. A dik tho. Mahse, sawrkar hnathawk hlawh chu capital generating capital a ni thei lo, consumer capital a ni.
Mizoram tana sum hnâr ber chu sawrkar laipui atanga sum lo kal a ni a. Mizoram budget bakah centrally sponsore scheme-te chu an hmachhuan a ni a. Central atanga sum lo kal a nih avang hian ren lem loh turah kan ngai bawk. Mahse, CSS ho hi a tawp hunah chuan chuti chu a ni mai. Hun tiam nei lem lo a nih chuan a tawp dawn hian a thawktute chu state sawrkarin a lo la chhunzawm mai thin a. Hun tiam nei loho a tawp hunah buaina bak engnge awm ang? Chuti chung chuan CSS hnuaia lut tur pawhin tihpuitu an la ngai deuh roh niin an sawi lehnghal a.
Sawrkar hian engnge a tih theih? Mitinin kan mamawh chu labour leh employment a ni. Sawrkar chuan chu chu  a hria ni awm tak a ni. Labour and employment department chu a nei. Mahse, a thawktute leh labour buaipuitute chuan an indaih loh thu leh sawrkarin a ngaih pawimawh tawk loh thu an sawi fo. An ngai pawimawh lo hle pawh a ni maithei. Hna nghet tur a ni lo tih chhuanlama employment exchange hriattir loha hna lak pawh  sawi a awm thin. Hetih lai hian dan thlirna atang chuan thla thum thawk tling tur hna lak reng reng chu sawrkar hian employment exchange a hriattir ngei ngei tur a ni tih a ni thung.
Labour and employment chuan employment siam thei tur institution thenkhat leh employment exchange-te an enkawl a. Chu bak chu thalai hna mamawh ngawih ngawihte tan thil tih em em an nei lo. Chutih laiin sawrkar chuan a hnuaia hnathawh tur awm thenkhat chu a lo hriattir lote a ni leh thin a. Thalaite’n hna an neih theih na’na kaihhruai emaw kawng kawhhmuh ai chuan sawrkarin hnathawktu tur a zawnna ang chauhin exchange chu a awm a. District exchange tia thendarh thliah an ni bawk. Hetih lai hian sawrkar chuan hna thawktu thar la lo turin sawrkar laipui nen memorundum of understanding (MoU) a lo sign tawh si a. Awmzia a awm lo hle.
Private School leh a thawkte dinhmun
English medium-a thawk pakhat chuan hlawh chu intunnunna lam ni lovin, pocket money ang chauha a ngaih thu a sawi a, “Master Degree neiha, thla khata Rs. 5000/- vel chauh la lut nih chuan tihngaihna vak a awm lo,” a ti a.
“Dem tur ka hre lo, dem ngaihna pawh ka hre lo va. Kan economy chhiat em vangah ka ngai hmiah mai. A bak tihngaihna dang a awm chuang lo,” a ti.
Mizoram-ah private school a tam. Private school tam chhan ber hi eng dang vang ni lovin mi tam tak tan sumdawnna a nih vang a ni.
Chumi awmzia chu zirna chu sumdawnna chi khatah kan hmang a, mi thenkhat tan chuan a hlawk em em a, kan intihhmuh a. Aizawl khawpui chang pawh ni lo thingtlang thlengin English private school a awm.
Kohhran pawhin education reform a buaipui vang nge, sumdawnna lam hawi nge, school tam tak a din.
Thingtlang-ah ngat phei chuan Kohhran school chu english medium a ni deuh vek zawk. Kohhranin  zirna a ngaihtuah viau nge khawpui naupangte changkan rualin thingtlang naupangte changkang ve se a duh vanga din a nih pawh ngaihtuah tham a ni.
Chuti chung chuan Education Department chuan hna tam tak kalpui a nei. Sorkar laipui hnuaiah scheme chhenfakawm tak a awm chu chu SSA a ni. SSA hnuaiah chuan private school-te pawhin hamthatna an dawng a, chu mai a ni lo, sorkar kalta khan private school leh kohhran school tam tak chu Hindi zirtirtu te hial a pe a ni.
A pawimawh ta ber nia lang erawh hlawh chungchang a ni. Private school-a thawh ngawr ngawr aiin zirtirtute chuan kohhran school-a thawh an thlang zawk.
Private school zirtirtu Lalrinmawia chuan, “Private school-a thawh chu a demand a sang a, a neitute nen inhmuhthiam loh palh a hlauhawm a, chutiang hun a thleng a nih chuan kan thlawn tihna a ni mai,” tia sawiin, “Kohhran school-ah erawh inban mai mai a harsa a, security a tha zawk bawk a. Chu chu zirtirtu tan chuan thlanawm zawk tak a ni,” a ti.
Mihiring tute pawh hian ‘security’ kan zawng thin. Kan hnâah a ni emaw mihring nunah a ni emaw security kan zawng a. Chumi a nih vang tlat chuan sorkar hna kan duh thin.
Sorkar chu a thin a nel a, thawh that vak loh pawhin hlawh a kiam chuang lo.
Zawhna lian tak awm erawh chu, sorkar school aiin private school-te result a tha zawk a. Kum zabi 21 hunah meuh phei chuan Mizoram-ah sorkar school product ai chuan private school product an dingchang zawk. Chu chu sorkar tan chuan thil zahthlak tak a ni. Education Department- officer rualte pawhin an fâte chu an enkawl ngei school-a luhtir an tum chuang lo niin a lang.
Mahse, sorkar school-a thawkte leh private school-a thawkte hlawh erawh tehkhin rual a ni si lo. Engvangin nge hlawh chhe zawk dawngtu private school-a thawkte chuan result tha zawk an neih theih ziah si le!
Hemi a nih vang hian a ni maithei, Mizoram sorkar thar chuan Education Reform a buaipui a, a changtu Minister hmalakna hnuaiah education reform  buaipui mek a ni a, rah tha a chhuah ngei pawh a beiseiawm.
Sorkar kalta khan education siamthatna atan hma a la lo a ni chuang lo; voluntary retirement scheme-te a siam a, zirtirtu thiamna hniam zawk neite chu an pension theihna’n ruahmanna a siamsak a nih kha.
A enga pawh chu nise, private school hlawh dinhmun hi a pawng a taka siamthat theih ngawt a ni lo vang. Tuna mi tam tak nghah chu Education reforms kalpui mêk hi a ni.
He reforms hnuaiah hian a duh apiang tan sumdawnna atana English medium school din phalsak an ni lo thei a, chu mai a ni lo, sorkar school hmantlak lohte pawh khaikhawm hial thlengin kalpui a ni thei. I lo thlir ang u.

Billy Graham-a'n Engnge A Sawi (From Thlifim March 2009)

“Mihring nun hi a tawi a, tun aia tha hian kan nung thei.
I kâin mite tana tha lo tur sawi chhuak lo sela, mite mamawh tur ngaihtuahpuiin anmahni tanpui thei tur thu chauh sawi thin ang che."
America-a evangelist hmingthang ber, Billy Graham hi rinna leh thlarau lama America ram chauh pawh ni lo, khawvel puma mite entawn a ni. Kum 88 mi evangelist hmingthang hi natna chihrang hrangin a tlakbuak mêk a, tunah hian thluak natna avanga taksa chak lohna chi hrang hrang thlen thei Parkinson’s disease te, prostate cancer te, ruh tliak avangtein a bawrhsawm hle a, a nupui Ruth nen kum zabi chanve dawn lai an lo chen dun tawhna, Montreat, North Carolina-ah taksa chau takin a hun a hmang mek a ni.
Billy Graham-a Crusade hnuhnung ber chu kum 4 kalta, 2005 khan New York City-a neih kha a ni tawh a, vawi engemawzat a thluak an zai tawh avangin tunah chuan a taksa a chak loin a chau hma thei hle a, hetih lai hian natna nei miah lote’n engmah kan tih loh laiin ani chuan nitin Pathian thu hrilh a la tum fan! A lehkhabu thar, The Journey tihah chuan nun hman dan tur engemawzat a sawi a, a thusawi thenkhatte hi i lo ngaihtuahzui ve dawn nia...
Midang nen inremin awm tum rawh
Hei hi mihringte hian kan ti thei em? Vanduaithlak takin kan  thei lo. Theihtawp kan chhuah pawhin midangte ngaihdan kan thlaksak thei lo va, kan tihtheih awmchhun chu thil kan tihdik lohin Pathian hnenah kan dil ang a, kan sualnaah ngaihdam kan dil ang a, A tanpuina kan dil ang. Khawvel hi reilote atan chauh a ni a, keini pawh hi kan awm rei dawn lo va, kan nitin nun hi khawhral mai mai lo ila, Pathian ropui na’n i nung ang u.
Keimahni hi Pathian nena inrem ngei ngei a ngai bawk. Teenager ka nih laia Isua Krista ka pawm atang khan zingtin Pathian nena hun hmang turin rilru ka siam a, zingtin ka tawngtai a, Bible ka chhiar a, ka tawngtai thin. Isua Krista rinna kawngah hei aia pawimawh hi ka tan chuan a awm lo.
Miin i chunga an tih i duh tur ang bawkin mi chungah pawh ti ve rawh
He thu hi Isua’n tlâng chhipa a sawi a ni a, he thu hi zawm tak tak ila chuan kan nun hi a va han danglam nasa dawn em! 
Bible chuan tlâwmna atangin finna a lo awm tih min zirtir a, midang ang bawkin ka sual a ni tih leh Pathian khawngaihna avanga ngaihdam ka ni tih nitin ka ngaihtuah ziah thin. Pathian chuan thilpek tam tak min pe a, theihna tam tak min pe bawk a ni. Kan thiltih thatahte a lawm thin. Kan nihna aia kan chapo hian Pathian kan biakna tur a dâl thin a, chapona hian kan sualte min hmuhtir thei lo.
Chuvang chuan kan thiante tan chauh lo pawh, kan hmelmate tan pawh kan tawngtai thin tur a ni a, ‘miin i chunga an tih i duh tur ang bawkin mi chungah ti ve rawh’ tih hi kan zawm theihna tur kawng pakhat chu midangte tawngtaisak a ni.
I lei veng tha rawh
Thil tha lo sawi na’n i lei hmang lo la, a tha zawngin hmang ang che.
Midangte that lohna lai kan sawi chhuah avang hian inneihna leh inthianthatna engzatnge

Sex leh Khawtlang Nun (From Thlifim April 2009)

- B. Lalchhanzova
Sex hi Sex han tih ringawt pawh hian engemaw tim deuh duina kan nei fo thin a, mahse eng kawng emaw chuan kan hrethiam viau hlawm a. Mihringte min ti mihringtu, mi pangngaia min siamtu chu SEX hi a ni chiang mai.
Damdawite pawh hi a hmanna tura hman loh emaw, a hman dan tur dik lo zawnga hman emaw chuan thiltha khan thil tha lo a thlen fo thin a, hetiang deuh hian he sex, kan nun tifamkimtu hian famkim lohna min thlen fo mai.
Sex hi hrilhfiah thiam har ve tak mai a ni a, he thuziak lo chhiartu zawng zawngte pawh kan ngaihdan a inang lo hlawm hle ang. Nia, ngaihdan inang neih mai theih pawh a ni lo; a chhan chu, mihringteah hian tumah inang chiah kan awm tlat lo a ni.
Tichuan sex chu mihringte danglama min siamtu, khuanu duan, kan nun zawng zawng kaihruaitu a lo ni. A zau hle mai; kan sawi zel ang.
Hman dan a zir
Sex hi a tha leh dik zâwnga hman chuan mihringte hi zahawmah min siam a, nun tha zawk min kawhhmuh a, keimahniah inrintawkna a thlen a, khawvel hi beiseina mit-in min thlirtir a. Kan nuna kim lo a hnawhkhat a, chak lo nia kan inhriatnaahte chakna min pe a, chhungkaw hlim min dintir a, tanpuitu tha min pe a, kan nun ruak a hnawh khat thin.
Sex hman dik lohna erawh chu chhe tak a ni. Nunkhuaa kan hmathlir zawng zawng a tithlawn vek thei a, jail rûn min kaitir a, zahna ruamah riahrûn min remtir a, fahrahte min siam a. Natna vei nuam lem lo HIV/AIDS-te min veitir a, thian thate nen kan inthen phah a, chhungkua a tikeh pheng phung a, mi laktlak loh zet zetah min chhuah a, inrintawkna zawng zawng a ti bo vek a, damchhûng ni tawite hi hremhmun hmasaah a chantir thin. Damlai mawi vena zawng zawngte chu buhsi thliin a len bo hlauh ang mai hian min tihbosak ta vawng vawng mai thin a nih hi.
Sex dik
Siamtu Pathianin inthlahpun theihna hmanrua mihringtea a dah, mihringtea inngainatna thlentu, mipa leh hmeichhiaa min thenhranna hi sex a ni ti ila kan thelh thui lutuk lo turah ngai ang. Hmeichhe hnute pâwng lah mai han hmuha mipa ngaihtuahna a’n kal thui ta viau mai thinte hi Siamtu ropuizia tilangtu a ni.
Huaisen leh inpe tak maia mipain a tihtur tha taka a’n hlenchhuakte hian hmeichhe lairil chu mipaah chuan a bet vawng vawng mai thin. Darthlalang hmaa hmeichhiain a kut tin, a ke tin, a sam leh a hmui a’n chei hlarh hlarh chhante pawh hi sex vang a ni a, mipain midangte thlamuantu leh hlauhawm a awm chang pawha zâm duh lohna thinlung a putna chhan pawh hi sex vang tho a ni. Tunlaiah phei chuan eiruk duh ve lohna leh dik duhna rilru kan rama lo inmun mekte pawh hi sex dik mizia lo lang tan chu a ni.
Mizote nunah
Mizote hi hnam naupang tak mai kan ni a, mipui rorelna leh khawtlang nun pangngai, khawvel zauzawk pawh phaa kan chenhona pawh kum rei lote kal ta mai kha a la ni. Sex chu mipa leh hmeichhe inpâwlna leh tisa châkna hrikthlakna chin chiahah kan thlir a, tunlai hian sâwn thlak leh pawngsual pawh a hluar hle.
Mahse, kan Mizo nuna awm thin pawngsual  (tunhma bik) a mite kha suahsual vang hrim hrim chu a ni vek loin a lang. Sex awmzia dik tak, a hmang thiamte tana a hlutna leh thatna lam kan hmelhriat loh vang a ni. Kum sawmhnih liam ta leh a hmalamte khan TV, Video etc. te hi awm tawh chu nise hnam ang pawhin kan chhe hneh hle tawh maithei.
Tunah chuan sex leh mihring thilsiam (material) inkungkaihna lam kan tawngchho tan dawn a ni a, zirtirna dik hmanga kan inkaihhruai a hun takzet a ni.
Khawtlang (community) hi mimal leh chhungkaw chengho din a ni a, khawtlang hi amah maiin a nuamin a ngelnghet ngawt thei lo; a mi chengte thlamuanna, inkungkaihna, hlim tlan leh tlan lohah a innghat a. Tunah hian kan khawtlang nunah ualau takin sex-in zung a rawn kaih tan dek dek a, kan lo dawnsawn thiam leh thiam lohah kan hmalam khawtlang nun chu a innghat thûk hle dawn a ni.
Mipa leh hmeichhe inît tawnna bikah lo thlir ta ila. Mipa chu hmei taksa inphelh ruak a hmuh chuan dan hman loh deuhthaw khawpin a châkna a chhuak mai thin a, hmeichhia erawh chu chutiang teh thut chu a ni lo deuh awm e. Duh leh duh (Nupa inkarah) chuan theihtawpa intihlim tawnin inpâwlna chu hman thiang a ni a, inpawh taka inpâwlna chuan hlimna thûk tak pawh a thlen thin reng a ni.
Mahse, nupa inpâwl lai chu an fate tan hmuh a tulna tehchiam a awm lo a; a nihna takah phei chuan a tul lo tawp zawk a ni. Inpâwlna hi mi pahnih inkar a ni a, kâr zim tak a ni. Inpâwlna atanga mihring lo ni ta kan ni vek a, kan nû leh pâte pawh an inpâwl thin tih chu tunge hai kumkhua thei ang? Mahse, kan nu leh pate chu an inpawl leh pawl loh kan zawt chuang lo. An inpawl lai hmuh pawh kan tum hran lo va, a tulna pawh a awm lo.
In ngaizawng emaw, in ngaizawng lem lo mipa leh hmeichhiate chu an duh leh an inpawl thei a, tu sawisel theih mah awmin ka hre hran lo; mihring duhthlanna a ni. Mahse mi pahnih inpâwlna a ruktea an lo tih chuan anmahni piahlam a nghawngin a lo pawi ta thin a ni. Mimal mai a nghawng lo va, chhungkua leh khawtlang, hnam ang pawhin min nghawng thei ta thin a lo ni.
Mizo sex video
Mihring thiamna a lo sang zel a, mobile phone, camera leh thil dang changkang fê fê a lo chhuak a, chu chuan inpâwlna nen inlaichinna an nei ta emaw tih mai turin kan khawtlâng nun nen chuan an lo intin ta to to mai a! Kan thiam loh pawh a ni hran lo, kan inrin hmain mihring thilsiam thangduang tak chuan min rûn a, kan hman thiam loh phei chuan khawvêlah hnam zahpui awm tak kan la ni hial maithei. Mahse, false prophesy, tih ka lo hriat tawh kha kan ramah hian a thlen dik ka ring a, tunlai thiamna lo sang zel hi Mizote hian a tha zawnga kan hman thiam dawn avangin kan mualpho pui lo ang a, dinhmun tha zawkah kan din phah dawn a ni.
Kan duh emaw duh lo emaw tunlai thiamna sang zel chuan min ching phar ta nawk nawk a, mumang pawha kan man ngai loh, duh pawh kan duh lem loh Mizo chhulchhuak inpâwl lai thlalak ngei kan mobile phone-ahte kan hmu ta fo mai a, hei hian kawng tam takin kan society a nghawng ngei dawn a, a tha zawnga a nghawng a awm thei ang a, a chhe zawnga a nghawng a awm thei bawk ang.
Sex video-a Mizo ngei mai hmel lang hian he lam kawng zawh ve tur hian min tingampa viau thei a, phuba lak na’n tak pawh kan la hmang hial maithei. A bik takin rawlthar leh tleirawlteah a tha lo lama nghawng a neih thui chuan a pawi thui thei khawp ang a, tih ve châkna leh inpâwlna lam thil ngaihzamna rilru a tuh thei bawk.
False prophecy kan sawi tawh ang chiah khan sex video lo hluar ta hi kan hmalam tan kawng tha min zawhtirtu a ni thei bawk. Sex hman khaw loh avanga mihring nun chhiat theihzia leh mualpho thui theihzia min zirtir ngei se, zirna inah te, Kohhranahte leh chhungkaw inzirtirna kawngahte hian fimkhurna min siam sela, mimal pakhat lo che tladahin chhungkua, khawtlang leh ram a nghawng thui theihzia min hmuhtirtu ni sela, kawng duhawm lo tak, Mizo hnam mualpho theihna atanga inralrinna dârah i hmang ang u.

Dawn ve teh: From Thlifim April 2009

Pathian hnenah chakna ka dil a...
Ka lo chak theih na’n harsatna min pe.
Finna ka dil a...
Ka lo fin theih na'n ngaihtuah buai tur min pe.
Hausakna ka dil a...
Ka thawhchhuah theih na’n thluak leh taksa damna min pe \hin...
Huaisenna ka dil a...
Ka lo huaisen theih na’n hlauhawm paltlang tur min pe.
Hmangaihna ka dil a...
Hmangaihna ka hriatthiam theih na’n tanpui ngai hnenah min hruai \hin...
Hriatthiamna ka dil a...
Pathian chuan dawhthei taka ka awm theih na’n ngaihdam ngai min pe.
Ka duhzawng min pe ngai lo va.
Ka mamawh apiang min pe thin...

Hringnuna kan duh ber engnge? (From March 2009 Issue)

Ni khat chu American sumdawng hi Mexico chhim lam thingtlang khuaah hian a zin a. A len vahvelnaah chuan tuipui kama lawng chawlhnaah hian a ding khawmuang a. A dinna lawng chawlhnaah chuan sangha mantu pakhat hian lawngleng hi a lo kar thleng ve chiah a.
Lawnglengah chuan sangha hrawl leh tui tak 'tuna' an tih ang chi hi engemawzat a thal deuh phang a.
American sumdawng chuan sangha mantu hnenah chuan, "I sangha man chu a tui hmel hlawm hle mai. Khang ang zat sangha man tur khan hun engzatnge i hman?" tiin a han zawt satliah a.
Sangha mantu chuan, "A, a rei vak lo, darkar tlemte chauh a ni," a ti awlsam mai a.
"Hun tam zawk pein engatinge sangha tam zawk i man loh le?" tiin sumdawng chuan a zawt zui ta zel a.
Sangha mantu chuan tha takin a chhang ve zel a, "Hei hian ka chhungkaw ka mamawh aia tam ka hmuchhuak daih alawm," a ti mai a.
Sumdawng chuan chu sangha mantu duham loh dan chu a ngaihtuahni a nun nen a ngaihtuahin mak a ti tan hle mai a, "A nih leh, hna i thawh loh chhung zawng zawngin engnge i tih thin hriat a va chakawm ve," tiin a han zawt leh a.
Sangha mantu chuan nui chungin, "Ka fate ka infiampui thin avangin ka mu hma ngai lo va, ballgames-te kan thlirho thin a, ka nupui nen tuipui kamah kan leng dun thin bawk a, a chang chuan ka thiante tlawh turin ka leng chhuak a, guitar nen kan zaiho thin," a ti a.
Sumdawng chuan mak ti tak hian a thusawi lai chu a lo pawt chat a.
"Thianpa ngaihtuah chiang teh, Harvard atangin MBA ka zo va, tun aia hlawk tur hian ka tanpui thei ang che. Tun ai hian nitin i sangha man hun hi i tirei ang a, tun aia tam kha sangha hralhna man i hlep thei dawn a ni.
I hlep chuan lawngleng lian zawk i lei ang a, i hlep tam zel ang a, i lawng pawh a lian ve zel ang a, sangha manna lawng tam tak pawh i lei thei zel ang.
Chumi hnuah chuan i sangha mante pawh chu midang hralh chhawntir loin nangmah ngeiin i zuar ang a, sangha zawrhna dawr lian tak i din dawn a ni. Chumi hunah chuan a product, a processing leh a distribution zawng zawng i kutah a awm vek ang a, sangha mantu hausa tak i lo ni tawh ang.
I hausak hunah chuan he tuipui kam thingtlang khaw te reuh te chhuahsanin Mexico Citya-ah emaw, Los Angeles-ah emaw, New York City-ah emaw  i pem daih thei ang a, chutah chuan i sumdawnna pawh i duh chuan i tilian zel thei dawn a ni."
Sangha mantu chuan ngaihnawm ti takin sumdawng thusawi chu a ngaithla dauh dauh a, sumdawngin a sawi zawh chuan, "Chutiang thleng tur chuan kum engzatnge ngai ang?" tiin a han zawt a.
Sumdawng chuan a rilruin a han chhut nauh nauh a, "Kum 15 atanga 25 inkar vel a ngai ang a, i thawhrim dan a zir a ni ang chu," a ti a.
Sangha mantu chuan, "Engtinnge ni zel ang?" a ti leh a.
Sumdawng chu a nui ta hawk hawk a, "I hrethiam ve mai lo em ni? A nuam lai ber i thleng dawn alawm. A hun dik takah i company stock chu i hralh ang a, mi hausa tawntaw i lo ni tawh ang a, sum vaibelchhe tam tak i nei dawn asin." a ti a.
"Vaibelchhia maw? Tak tak maw? Chung pawisate chu engtinnge ka hman ang a, engnge ka tih tak ang?" a ti leh a.
Sumdawng chuan hlim takin, "I sum thawhchhuah zawng i chawl thei tawh ang mawle. Tuipui kama thingtlang khua, sangha manna hmunah i kal ang a, i tu leh fate nen infiamin i duh chen chen i meng thei ang a, i tu leh fate nen chuan ballgames-te in thlirho ang a, i nupui duhawm tak nen chuan tuipuikamah in leng dun ang a, i duh leh i thiante nen guitar perhin in zaiho mai mai thei ang chu. A nuam viau dawn lo'm ni?" a ti ta a.
Hringnunah hian engnge kan duh ber hi kan hre lo fo va, kan duh ber hi kan thlen sa rengah emaw, kan hnaih takah emaw hian a awm reng fo a, chu chu kan kal pel fo thin.

Thlifim August 2010 Issue Part 2

Hair care


Sam chungchanga dik leh dik lo 9

1. Sam suk ngun avangin sam a hrisel lo thei a, a ro phah thei.

Hei hi a dik tawk lo. A fai duh avanga sam kan suk ngun hian sam a affect lo. I sam kha i duh hun hunah i su thei a, chawlhkar khata vawi thum vel suk pawh thil pawi lo tak a ni. I sam a zirin a mil zawng shampoo emaw, balm emaw i hmang thei a, product tha hmanga i sam i sukfai fo khan i sam a nalh zawk ang a, a hrisel zawk bawk ang.

2. Shampoo a tam poh leh sam a tha a ni mai.
A dik lo. Shampoo tam lutuk hmang duh suh. Sam sei tak tan pawh i kut phaha i ken theih tawk shampoo kha vawi khat sam sukfai na'n a tawk chauh a, a tam avangin samin a that phah thut thei chuang lo. Sam tha leh nung nei tur chuan rei tak uluk a, shampoo tha rei tak hman peih a ngai a ni.

3. Balm hmanin sam kâk a tireh thei.
A dik lo. Balm hian sam tla a vêng thei a, mahse sam kâk hi chu a veng thei lo. Sam kâk tihreh dan awmchhun chu a kâk lai tan a ni.

4. Hair dryer hman fo hian sam tla hlen a thlen thei.

A dik lo. Hair dryer hman nasat lutuk chuan sam chu a affect ngei mai a, a affect lai chu a tla ang a, mahse a lo to leh ang. Hetih lai hian hair dryer hman nasat lutuk chu a tha lo tih a lo lang a, amaherawhchu samin a tlak phah a nih pawhin sam hloh hlenna chu a ni lo a ni.

5. Sam tiro loa mutpui hian luvun bawl a thlen thei.

A dik lo. Luvun bawl, thak leh sa vut vutte hi product thenkhatin a thlen a ni thin a, allergy a ni tlangpui thin a, sam tiro loa mutpui nen inzawmna a nei lo. Sam tiro loa mutpuiin a tuk lamah hahchhiau a nasat duhzia erawh chu kan hre theuh awm e.

6. Sam khuih leh brush inhmanpawlhin lu phut a inkai chhawn theih.

A dik. Lu phut hi inkaichhawn a awlsam em em a, sam khuih emaw, brush emaw inhmanpawlh pawhin a inkai mai theih a, sam siamna hmanrua chi hrang hrang hmang pawhin a inkaichhawn theih a ni.

7. Sam tan ngun hian sam a thang chak a, a chhah duh bawk.

A dik lo. Mi tam takin sam kan tan nguna kan sam thang duh tur leh sambu chhah tura kan ngaih hi a dik lo a, sam kan tan ngun chuan a bul lam a chhah a, a hmawr lam a zuih bik ringawt thin.

8. Sam colour avangin sam a tlem duh.

A dik lo. Sam colour-na kan tih, hair dye tam tak hian sam tichhe thei khawp thil a pai thin a, mahse sam rawng tihdanglam avang ringawt chuan sam chu a tlem phah lo.

9. In-diet nasat lutuk avangin sam a tla thei.

A dik. Sam hrisel tak nei turin eitur tha leh eitur dik ei thin a pawimawh a, sam mamawh khawp eitur i ei loh chuan i sam a tla kawlh hial thei a ni. #
--------

Fashion Tips:
Lang cher turin engnge ka hak ang

Tunlaiah mi kan awm awl tawh a, lirthei kan chelek bawk nen, mahni duh aia thau hi mi tam tak kan awm a ni. Thau laklawh tawh chuan awlsam taka cher leh mai a harsa a, cher leh turin taksa sawizawi nasa tak leh dieting-te hial a ngai thin a, kan hre theuh awm e.

Duh aia thau hret tam takte tan 'lang cher turin engnge ka hak ang' tih hi ngaihtuah reng a ngai thin a, kan inchei chhuaha kan lan cher theih dan tur chi hrang hrang, zawm awlsam te te kan sawi dawn a ni.

Thawmhnaw lianpui ha suh
Hei hi mi tam takin kan tihsual thin a ni. Kan taksa thau leh lian khuh turin thawmhnaw lianpui kan ha thin a, mahse thil kan tidik lo. Thawmhnaw lianpui i hak chuan i nihna aiin i lang thau daih ang! I taksa rem thawmhnaw ha zawk la, i lang zangkhai ang a, i chevel en a hahdam zawk ang a, hmuh i hrehawm lo zawk dawn a ni. Thawmhnaw tight ni lo, thawmhnaw lianpui ni lo ha thin ang che.

Pheikhawk ke artui nei:
Hmeichhe tan kher lo pawh, mipa tan pawh pheikhawk ke artui nei bun hi lan cherna a ni. Pheikhawk ke artui nei i bun chuan i lang sang ang a, pheikhawk sang tak i bun peih phei chuan nasa takin i thauna i thup thei ang.

Tunic
Kawrfual, khup thleng emaw, ke hmawr thleng emaw, bân nei lo hi 'tunic' an ti. I taksa rem tunic i hak chuan i thau a hliah deuh vek ang a, i dul kiar pawh a hliah tha hle ang.

Kekawr: Thau tan kekawr hak hi pian nalh lo khuhna tha tak a ni. Mawng leh kawngbawr lian i nih pawhin i hak tawh chiah kekawr i hak chuan i lang ziaawm thei ang; amaherawhchu miin an inhmeh tih avangin tight lutuk emaw, loose lutuk emaw ha ve lo la, i hak tawk, i taksain a rem thlang ang che.

Inthlep pumpelh rawh
Kekawr a ni emaw, pawnfen a ni emaw, kawrfual a ni emaw, eng thawmhnaw pawh inthlep lam chi reng reng ha lo la, chutiang thawmhnaw chu pumpelh ang che. Thawmhnawa inthlep awm chuan a tilang thau lehzual dawn che a, ni saah kalin i hlim en la i hrethiam mai awm e.

Thawmhnaw thim lam

Thawmhnaw dum lam hian mi a tilang cher tih chu mi zawng zawngin kan hre vek ang a, amaherawhchu engtik lai pawha lu atanga ke thlenga thawmhnaw dum hak zûn reng mai chu thil ninawm tak a ni thei. Chuvang chuan thawmhnaw thim dang ha ve thin la, thawmhnaw uk te, a hring thim lam te, a pawl thimte pawh hak tur a awm a ni.

Kawnghren hreng suh

I nih dan tur pangngai aiin i thau hret a nih chuan kawnghren nena in inthianthatna chhu chat rih mai ang che. Thau thenkhat chu dul kiar lem lo, mawng bawr leh mal liante pawh a awm theih a, chutiang i nih chuan kawnghren i hren pawhin i lan thau phah lo deuh ang a, dul kiar i nih chuan kawnghren kha dahbo hmiah la i tifuh zawk ang; kawnghren hian kawng a tilangsar mai mai a ni.

A mawi lai zawng rawh

I taksaah khawi lai kha nge i chhuan ber. I taksaah i hmel emaw, i ke emaw, i sam emaw, i chhuan bik mi hmuh atana duh bik i nei ang a, chungte chu uluk takin enkawl la, i thau hliah turin tilang tam thin ang che. #
---------

Life

Mahni inrintawk dan kawng 8

Mi thenkhat chu mahni inrintawkna pianpui an awm niin a lang a, mahse lungngai suh. Mi thiamte chuan inrintawkna hi neih chawp theih niin an sawi a, hlim i phû a ni tih i pawm tlata, mihring nuna hmachhawn ngaite hmachhawn tur i inpeih chuan i hlim thei dawn niin an sawi a ni. Amaherawhchu mi thenkhat tan chuan mahni inrintawk hi thil harsa em em a ni a, chuti chung pawhin psychologist-te chuan bansan theih niin an sawi tlat a, miin a duh tlat chuan a nei thei an ti a, tun tumah chuan Sacramento-a National Council for Self-esteem-in mahni inrintawk dan kawng 8 an sawite kan tarlang dawn a, ngun takin lo chhiar ang che.

Chumi hmain mahni inrintawkna hi hlimna kawng pawimawh em em a ni a, hlawhtling tura kawngka hmasa ber a ni a, ngaihzawngte nena inngeih taka awm theihna kawng pawimawh a ni a, mahni mimal nun hahdamna a ni bawk tih hre hmasa ila a tha ang.

1) Mahni inhriat hmasak:

Philadelphia psychiatrist Donald L. Nathanson chuan mahni inrintawkna tlachham takte a enkawl thin a, anmahni tihlimtu chi hrang hrangte a ziah chhuahtir thin a, thil te tak te pawh a ziahtir vek a, zawhna ho te te, "Hna i thawk rim em? Thian tha i ni em? VCD i chhuah thiam em?" tihte a zawt tel thin.

Nathanson hian mahni inrintawkna tlachhamte hi an nuna engemaw dik lo a awm emaw, harsatna engemaw an tawhin anmahni tihlimtu list chu en nawn turin a ti thin a, zawhna ho te te a zawhte chu anmahni an inhriatchian na'n a chhiar nawntir thin bawk.

A hmasa zawk, mahni tihlimtu hriat hi mahni inrintawkna siamtu atan a tha em em a, harsatna kan tawh pawhin kan harsatna kan theihnghilh thei thin. Mahni inhriatchian hi kan inrintawk loh chhante hriatchhuah na'n a tha em em bawk a, mahni inhrechiang chuan eng pawh tawk se a insiamthatna lai tur a hre chhuak zung zung thin.

2) A eng zawngin thlir rawh:
A eng zawnga thil thlir hi nasa taka mahni inrintawkna siamtu a ni a, inrintawkna atangin hlawhtlinna a thlen thin. Kum 14 mi hmeichhe tleirawl swimmer hlawhtling tak, Shane Gould pawh US-a tuihleuh intihsiak dawnin chanchinbu mite'n a tih that a rin leh rin loh an zawt a, "Vawiinah hian world record ka siam dawnin ka hria a, siam ngei pawh ka tum," a ti a, intihsiaknaah chuan 100m leh 200m freestyle-ah world record a siam ve ve a ni.

Gould hian a tuk lehah 400m-ah world record a siam leh a, a hlawhtlin chhan chu a eng zawng zela a hmalam hun a thlir vang leh a harsat dan tur ngaihtuah loa a theih dan tur a ngaihtuah ngat ngat thin thu a sawi a ni.

3) Huaisen takin tihturte hmachhawn rawh:
Olympic skier hlui Jimmie Heugahe chu kum 1970 khan tha lam natna, multiple sclerosis (MS) avangin a damlo a. Chutih lai chuan doctor-te hriat danin MS avanga damlote chu infiamna lam ti lo tura tih an ni. Huega chuan hreh takin infiamna chu a chawlhsan a, kum li chhung zet a chawlh hnu chuan engmah ti loa a awm mai mai avangin a taksa chu a chak lo zual sauh zawk a. A hmalama tihturte hmachhawn loa thut ringawt leh natna avanga mut ringawt mai chu a ngai thiam thei ta ngang lo va, rilru lam leh taksa lama chak loh lehzual chu a hlauh avangin a inenkawl dan a thlakdanglam hlawk a, "Natna hi ka taksa neitu a ni tur a ni lo va, ka taksa neitu chu keimah ka ni," a ti a, thirsakawr a chuang a, tui a hleuh a, thla tam pawh a ral hmain a taksa chu a lo tha chho a, a taksa chuan reiloteah ngai a awh leh ta a ni.

Jimmie hian huaisen takin a hma lam thil awmte a hmachhawn a, natna takngial pawh a inhnehtir duh lo. Huaisen taka hma lama thil awmte hmachhawn hi mahni inrintawkna min petu pawimawh tak a ni a, Jimmie aia harsatna tawk liante pawh hmalam pana huaisen taka kal zel a pawimawh a ni.

4) Tum sâng tak nei rawh.
I inrinhlelhna zawng zawng kha paih la, tun aia sang kha i thleng thei tih inhrilh thin ang che. Pastor Robert H. Schuller chuan a lehkhabu Self-love tihah tum sâng tak neih a pawimawhzia a sawi a, "Sâng tak thlen tum tlat la, i rin aiin i thleng sang thei tih i finfiah hun chuan i inringtawk viau tawh ang. Rim tak leh rinawm takin thawk la, i thiltihah chuan theihtawp chhuah la, engtik niah emaw chuan tuna i dinhmun ai khan i la thleng sang em em ang," a ti.

5) Thil thar zir zel rawh:
Nun thang zel lo chu mi hlim an awm ngai lo. Thil zir thar zel hian inrintawkna a siam a, a chhan chu, i theihnate i hman a ngai a, i rilru leh taksa i tihchak reng a ngai a ni. Actress Sophia Loren chuan, "Lehkha zir zawha zir tur zir zo tawha inngaih hi ngaihdan dik lo tak a ni a, lehkha zir zawhah hian zir tur a tam telh telh zawk a ni," a ti.

Sophia chuan a sawi zawm a, "Tarmit i mamawh tih i hmu a, i khupah nâ a lo awm a, i kutah vun chuar tlem i hmu a, chutiang hunah chuan beidawng suh. Thalai nihna hi rilru lamah a ni a, i nuna thil thar i zir zel leh i hmangaihte nuna thil thar i pek zel chuan inrintawkna i tlachham ngai lo vang," a ti.

6) Regular takin insawizawi rawh:
Taksain a tlin tawka regular taka insawizawi (exercise) hian weight a control a, lung a ti chak a, cholesterol a tihniam a, rilru hah a titlem a, thisen kal a ti tha bawk. Rilru ngaihtuahna a tithiang a, inrintawkna a thlen thei a ni. Taksa sawizawina lam chi-ah nuam i tihzawng, kal (walk) emaw, tlan euh euh (jogging) emaw, thirsakawr khalh (cycling) emaw, tuichen (swimming) emaw i duh ber thlang la, chu chu chawlhkar khatah vawi thum tal ti thin ang che.


7) Thil tha ti thin rawh:
I chhehvel khawvel kha nuam taka siam turin theihtawp chhuah thin ang che. Midang nun tihlimtu leh thenawm khawveng tinuamtu i nih chuan nangmah pawhin i hlim phah ang a, inrintawkna a pe ang che. Psychologist Bruce A. Baldwin chuan, "Tunlaiin midangte chunga thatna lantir thatzia kan theihnghilh nasa hle a, hei vang hian keimah hlimna tur leh kan inrintawkna tur kan paihbo thin a ni," a ti a, "Bus-a kum upa zawk thutna ken te, kalna apianga tanpui ngai tanpui te, hmel hlim inhmuh ringawtte pawh kan theihnghilh a, thil tha hote, pawisa sen ngai miah lo pawh i tih khan i chhungrilah hlimna a thlen che a, midang tan thil danglam lian tak a thlen a, i tan lah hlawkna a ni a, inrintawkna a pek dawn che avangin he thil hi theihnghilh tawh suh ang che," a ti.

8) Hmel hlim, hlim hmel:
I hlim tak tak lo a nih pawhin hlim hmel tal pu la i tan a tha ang tih hi thudik dinglai a ni. Mahni inrintawkna nei tura step pawimawh tak chu mi inringtawk tak, kawng engkima rilru hahdam, mi hlim tak nih zir a ni a, i la hlim loa, i la inringtawk lo a nih pawhin chutianga awm chu lo zir lawk rawh le. Lemchang thiam angin mahni inringtawk tak anga i awma, hmel hlim i put a, miin i hlim hmel an hmuh fo chuan nangmahah inrintawkna a lo piang thuai ang. He thurawn hi Wayne W. Dyer chuan a lehkhabu, 'Real Magic: Creating Miracles in Everyday Life' tihah chiang takin a ziak a, hetiang hian inringtawk tak anga awm phawt turin mite a chah.

"Inringtawk tak angin awm phawt mai rawh. Kal chhuak la, tu hnenah mah i chhungrila i harsatna leh i inrintawk lohnate hrilh lo la, tuma'n i chhungril an hmuh theih loh avangin inringtawk takin awm phawt mai ang che. I chetvel danah inrintawkna i lantir theih chuan mi thar, mi danglam, mahni inringtawk i lo ni reng tawh tihna a ni. Mi zawng zawngin harsatna leh lungngaihna an nei a, chumi chu thupin inringtawk takin an lo chhuak mai alawm," tiin. #
--------

Life

Tunge i nih inhrechiang rawh

Nun hlim tak nei tur leh mi hlawhting ni turin kan thiamna emaw, kan hriatna emaw aiin kan chhungril tak taka kan mizia a pawimawh zawk an ti a, mahse ka chhungrila kan nihna tak tak hi hriat har tak a ni a, a hnuaia zawhnate hi chhang la, a hnuai lehah hian i point hmuh zat tarlan a ni a, i score-te chu belh khawm la, a total atangin eng ang mi nge i nih tih lo hrechiang rawh le.

(Note: I point score leh i chhannate chhinchhiah na'n pen emaw, pencil emaw la hmasa ang che.)

1. I mood a inthlak fo thin em?

a) Aw, inthlak fo thin.

b) Inthlak zeuh zeuh chauh.

c) Inthlak ngai lo.

2. I emotion neih dan i hrethiam em?

a) Aw, engtik lai pawhin ka hrethiam.

b) Aih, ka ngaihtuah ngai lo.

c) A chang chang chauhin ka hrethiam.


3. I nun hman mek danah khatha i ti tawk em?

a) }ha ka ti lo.

b) Aw, tha ka ti tawk.

c) A changin tha ka ti a, a changin tha ka ti lo.


4. I chhiat leh tha hriatnaah i innghat ngam em?

a) Aih, innghat ngam lo.

b) Aw, ka innghat tlat.

c) Ka suangtuahna leh ka duhzawng milin ka kal thin.

5) I ngaihtuahna leh i khawvel thlir dan i ring tawk em?

a) Ring tawk thin.

b) Aw, buaina tur a awm lo.

c) Aih, ka ngaihtuahna ka ring tawk lo fo.

6) Thian siam i awlsam em?

a) Aw, awlsam.

b) Harsat.

c) A changin a awlsam a, a changin a harsa.

7) I mi tawnte an that loh i ring nghal thin em?

a) Aih, mi hriatchian phawt ka duh thin.

b) Aw, ring tha lo nghal thin.

c) Ngai lo hrim hrim.


8) Midang ngaihtuahna awm tur i hrethiam em?

a) A chang changin ka hrethiam.

b) Ka hrethiam fo thin.

c) Hrethiam lo hrim hrim.

9) I thil neihte kha nangmah aiin a pawimawhin i hria em?

a) Aw

b) Aih

c) A pawimawh ve vte.

10) Ranin an ngaina che em?

a) Aih, min ngainat loh hmel.

b) A changin min ngaina niin ka hria.

c) Aw, ranvulh hian min ngaina hle.


11) Inngaihzawnnaah emaw, kawppuite bulah emaw thinrimna lantir hi thil tangkai tak niin i hria em?

a) Aw, thinrimna lantir hian rilru a thawl huai.

b) Aih, engmah a siamtha lo.

c) Ka thinrim ka lantir thin a, mahse ka inthiam lo thin.


12) Cool takin i awm reng thin em?

a) Aih, ka cool thei thlawt lo.

b) A chang chuan ka cool ve thin.

c) Aw, ka ngaihtuahna ka tilang ngai lo.

Score:

1. a) 1 b) 2 c) 3

2. a) 3 b) 1 c)2

3. a) 1 b) 3 c) 2

4. a) 1 b) 3 c) 2

5. a) 2 b) 3 c) 1

6. a) 3 b) 1 c) 2

7. a) 1 b) 3 c) 2

8. a) 2 b) 3 c) 1

9 a) 1 b) 3 c) 2

10. a) 1 b) 2 c) 3

11. a) 3 b) 2 c) 1

12. a) 3 b) 2 c) 1

I score zat atangin a hnuaia mi hi i mize tlangpui a ni a, tunah chuan i inhrechiang ta. Insiamthat ngai lai leh hmasawnna zelna lai tur lo ngaihtuah rawh le.

30-36: Mahni inthunun thei tak i ni a. Hetiang mizia i put avang hian mi zah i kai a, i thiltih kawng engkimah i hlim thei zel thin. Mite'n mi ngainatawm takah an ngai che a, chuvang chuan ngaihzawng atan emaw, kawppui atan emaw thian atan emaw an duh thin che a ni.

25-29:

I chhanna atangin mi pangngai tak i ni a, i ngaihtuahna leh i suangtuahnate a pangngai hle. Mahse thian siam emaw ngaihzawng neih mai emaw i awlsam lo hle a, chutih lai chuan midangte mita mi ngainatawm leh pawh chakawm mizia erawh chu i nei thung a ni.

12-24: I chhungrila i mize dik tak aiin pawnlanga i ngaihtuahna i ring leh thin a, i rilru putdan dik tak sawi chhuah i harsat thin. Mize nghet tak i nei a, chu chuan engtik lai pawhin a kaihruai reng che a, mi tan pawh harsa tak angin i lang a, mite'n an pawh laklawh che erawh chuan an ngaina hle thung ang che. Midang tan i nun i hawn chuan miin i thatnate an hmu ang a, i hawn loh erawh chuan pawh harsa che an ti hle ang.
--------

Relationship
Hmeichhe rilru hriat dan

Hmeichhe rilru hi hriat a har em em a, mahse an taksa awmdan atangin an rilru engemawchen hriat theih dan a awm a, an rilru hre thei turin a hnuaia tip chi hrang hrang kan han tarlante hi ngun takin lo chhiar la, awlsam takin an taksa awmdan atangin an rilru i hriatsak thei dawn a ni.

1. A kut leh a taksa chik rawh:

A kut thlir reng la, a sam a khawih neuh neuh chuan i rilru lak a duh a, a ngaihsak che tihna a ni. I awm laia a sam emaw, a nghawng emaw, a koki emaw, a kut emaw, a ke emaw a chul chuan a ngaina che tihna a ni a, step dang kai leh turin a duh ngei ang che. I bula a awma a taksa emaw, a koki emaw i lama a awn chuan a rilru i la hle tihna a ni a, inhmachhawna in thuta a khupin i lam a hawi vah chuan a ngaihsak viau che tihna a ni tih i hre thei ang.

2. A mit leh a chevel chik rawh:

Tupawh hi an rilru hriat awlsam dan ber chu an mit atangin a ni a, mihring zawng zawng hi kan thil ngainat zawngah chuan kan mit a fu chat a, kan hriat loh lai pawhin kan lo thlir vawng vawng thin. An mita en (eye contact) hi hmeichhe rilru chhungril hriat theih dan awlsam ber a ni a, a tirah chuan a mit taka i en chuan nuam a ti lo ang a, mahse a duh che a nih chuan reiloteah a duhna che i chhiar thei thuai ang a, amah pawh a hahdamin ngam takin a en let ve thin ang che.

3. A ke chetdan chik rawh:

Hmeichhiain an bawp an khawkherh a, zawi te tea an tihphut der der chuan i bulah zâm rukna engemaw riau an nei tihna a ni a, ngaih tha takin awm ang che. Pawnfen chhing a fena, a ke lang tam lo tura a pawnfen a pawh mar a pawh mar chuan a duhzawng i ni tih i hre bawk dawn nia.

4. Chet dan dang:

I bân a vawnsak che a, hun engemawchen a dah vang vang chuan i bulah rilru hahdam takin a awm tihna a ni a, i bulah hlim takin awm a duh tihna a ni thei bawk. Chutianga a awm chuan hahdam takin titipui la, a nuna a thiltawn mek leh a duhzawng zawng zawngte dawhthei takin titipui la, chutianga a tih chuan a ngaina che ang a, a duh che ang a, a miziaa a chak lohna lai i bulah a lantir ang a, a lo hmangaih dawn che a ni. #
------

Relationship

Ngaihzawng Thente tan

Inngaihzawn hian inngaih zawn tantirh lai hi a nuam em em a, tha taka inzawmna tinung tur leh hlim taka inngaizawng turin eng engemaw tih a ngai a, chutah chiah chuan harsatna chi hrang hrang a lo piang a, a tawpah phei chuan inngaihzawnna a lo tawp der thin. Ngaihzawng thena rilru nâ hi thil hrehawm tak a ni a, chhiat phah ta vek pawh an awm a, rei tak chhung rilru nâin a awm theih a ni.

Mahse he thil duhawm lo tak hi mi tam tak nunah a thleng mek a, a thleng zel dawn bawk a, kan duh vang ni miah lo pawhin kan tawk thei a, tunah hian kan tawk mek pawh a ni maithei. Engtinnge ngaihzawng kan thenin kan awm ang a, engtinge kan rilru nâ a dam theih ang le?

Ngaihzawng i nei a, i ngaihzawng chu i tana hlu ber a ni a, ani lo chuan i nunah tumahin awmzia an nei lo. Mahse vawilehkhatah i nun atangin a bo thut a, thil reng reng a tawp vek ni berin i hria a ni. Chutiang teh thuta i nun a inthlak danglam avang chuan i awm thiam lo va, i rilru natna leh i khawharna inpawlh avangin i nun a buai nasa hle ang.

Inthenna hrehawm tak i tawk a nih pawhin thil kal tawh ngaihtuah zawm reng chu i tan a tha lo tih i hriatthiam a ngai a, kil khata rilru na taka mittui lo sen rengin awmzia a nei lo tih i hriat pawh a tha ang. I tana tha ber tur chu hmalam pana kal zel a ni a, i ngaihzawng hluiin hmalam a pan zel ang khan nang pawhin hmalam i pan ve a ngai a ni.

I thil tawn pawm rawh:

Amah avangin i rilru a la na reng ang tih chu a hriat mai a, a hma anga inngeih tak leh hlim taka inngaihzawn leh dan tur pawh i ngaihtuah nasa hlein a rinawm. Mahse in inthen tak tak tawha, in inthenna pawh chhan tha tak a niha, ani pawhin then tak tak che a tum tawh chuan i bulah awm a duh tawh lo tihna a ni. Theihtawpin bei mah la miin inthen an duh tawh chuan koh let leh mai a awlsam ngai lo. Koh let tuma i beihnaah chuan i rilru a na lehzual thei a, chuvang chuan inthenna kha chhan tha tawk a nih chuan in inthen tawh tih pawm mai ang che.

Be tawh suh:

Inngaihzawnna hlimawm tak chu i tum loh deuh maiin a lo tawp thut mai a, awm thiam har i ti a ni. Hei hi thil mak a ni hran lo va, tutan pawh thil harsa a ni vek ang. Mahse in inngaihzawnna chu a tawp tawh a, kawng khar a ni tawh a, i ex chuan a kalsan tawh che a, chuvang chuan nang pawhin be tawh suh ang che. A hmaa bawkkhupa inngaizawng leh tura ngen emaw, i rilru natna zawng zawng phawrha tah khan engmah sawtna a nei lo va, a lakah i inti hniam mai mai thei a, phone-a biaka i hnena let leh tura thlem chiam pawh rilru nat lehzualna thlentu a ni thei.

Rilru nâ avanga zu in hnua phone-a inbiak te, lehkhathawn lungchhiatthlak tak tak inthawnte pawh hi inthenna tak tak a thlen tawh hnu chuan mahni intihmualphona a ni thei a, biak pawh tuma i tha thawhna zawng zawngte kha amah koh let tuma i beidawnzia tarlangtu vek a ni ang a, rilru siama inthen duhtu chuan a lo let phah kherin a rinawm lo.

I ngaihzawngin a then chea, a kalsan che chuan a ngaihsak tawh loin a duh tawh lo che tih hrethiam la, midang tam tak, ani aia tha daih pawh duhtu tur che tam tak an awm laiin eng vanginnge inngaihzawntir leh tuma i hun tha tak tak i khawhral ang a, rilru na reng renga hun i hman ang. Inthenna a thlena rilru put dan tha ber chu 'pawm' a ni a, thil kal tawhah ngai la, i nunah a hma aia hlimawm kha a lo la thleng thei tih ring tlat chungin hlim takin i nun hmang ang che. #

----------------------

Relationship

Mipa rilru hriat dan

I mitsirin i melh relh relh thin a, in mit leh mit pawh a intawng zeuh zeuh thin. A chang chuan biak pawh in inbe zeuh zeuh maithei a, kum khat chuang zet chutiang chuan in awm tawh maithei a ni. In inhmuhin in innuih thin a, nang pawhin i nuih let ve a, mahse chubak chu in chungah engmah a thleng thei lo. A duh che leh duh loh che i hriatchian loh avangin engmah i sawi lo va, chutiang dinhmunah chuan engnge i tih anga, engtinnge mipa rilru i hriat theih ang?

Tihngaihna hre lovin khatiang dinhmunah khan rei tak i lo awm tawh maithei a, a hnuaia mipa rilru hriat theih dan leh an mize chhiar theih dan kan han tarlante hi ngun takin chhiar la, i duhzawng mipa nena in inkar chu level dangah a kai phah dawrh maithei a ni.

A hre lo der thin:

Mi zinga in awmin i awm ve tih a hre lo der thin em? Thiante zinga in awmin i awm ve tih a hre lo der ang a, mahse a changin a en leh zeuh thin ang che. Hetianga a awm chuan duhna che tlemte tal a nei tihna a ni a, amaherawhchu i rilru a hre bik lo tihna a ni a, i bulah engmah a sawi ngam lo va, i duh loh a hlauh avangin a zir ve tho che tihna a ni.

Mipain hlimhlawp atan ringawta a ngaihzawn che chuan mipui punkhawmna leh mi tamnaah pawh a bepawpin i bulah a tap fo ang a, mahse hlimhlawp mai ni lo, duhna tak tak nena a en che chuan mipui zinga biak pawh che leh i bula awm a zak thin ang.

A landan a ngai pawimawh:

Nangmah a hmuh chea a sam awmdan siamtha tura a kuta a huihin emaw, a kawr nghawng a siamthat sawk sawk emaw, hanky hmanga a hmai a hruk emaw, a landan titha tura engemaw tal a tih chuan a thinlungah duhna che a nei tihna a ni. I hmaah lan that a duh a, a landan a ngaihtuah a, i bul hnaia a awmin hmu ngei che sela a duh tihna a ni bawk. Mipate hian hmeichhe rilru lak an tum a nih loh chuan an landan hi an buaipui tehchiam lo va, i bula a landan a ngaihtuah viau chuan nangmah leh nangmah lawmpuina chibai inpek nachhan tur lian tak i nei tawh a ni.

A veng tlat ang che:

A hmaa kan sawi tak aia inhnaih, hmaichhana inhmu fo thin in nih pawhin a duh che tih i hriatchian loh cheu avangin hmangaihna thu lam i sawipui ngam lo maithei. Hetiang hi i chungah a thlentir thin em? Mite'n an sawisel chein a tan che ang a, engtin emaw zah lo deuh taka an tih palh che hlauin a veng ru tlat ang che. Mipui punkhawmna chi hrang hrangah midangin an tawh loh na'n che nangmah hnaih berah a awm tawh em? Chutiang chu i chungah a thlentir tawh a nih chuan a duhna che rinhlelh tur a awm lo va, a duh hluah hluah che a nih kher loh pawhin duhna che chhete tal a nei tih chu a chiang a ni. Nangmah duh tak taktu che mipa chuan i tan engkim a huam ang a, i tan a inpe ang.

Kan han sawi tak angte khi i duhzawng tak mipaah i hmuh thin chuan engatinge ama chet hun i nghah kher ang. Naktuk hi thleng ta lo ta thut se i inchhir palh ang e. Chuvang chuan hmeichhia ni mah la, i duh tih a hriat theih dan tur chu ngaihtuah ve tawh mai rawh.

------

Beauty Tips

Lang danglam ngam rawh!

I landan ngai reng kha i ning ve thin lo'm ni? Duhawm zawk leh nalh zawka lang turin lan danglam ngam a ngai a, lang danglam turin a hnuaia kan tarlangte hi lo zawm la, i hmel landanin i style a tidanglam tih hre reng ang che.

Kalphung thar:

Foundation i hmang thin a ni maithei a, foundation pangngai aiah powder hmang la, powder chu hnawih satliah loin sponge huhin i hnawih dawn nia. Sponge chu moisturiser-in i tihuh ang a, make-up dang zawng zawng i hnawih hmain uluk takin hnawih ang che. He thil hote anga lang hi tichhin la, i hmel landan a tidanglam daih tih i hmu ang.

Eyeliner tui chi i hmang thin a ni maithei a, eyeliner aiah brush sinte hmangin mascara hmang zawk teh. Mascara hian mit a tilang danglam a, hmel a tiduhawm thei a ni. Chumi hnuah eye shadow la chhuak la, colour danglam tak hmang la, chu chuan i mit landan a timawi zual hle ang!

Eyeliner i hmanin i mit pawn lam thlengin hnawih la, awmze nei taka tihkawm emaw, design siam emaw a tha hle. Hetianga tih hian hmel a tidanglam a, hawiher pawh a tidanglam thei a ni.

Hmai bakah hian i khingkhang ruhah te, mit sir velahte i mit leh i vun vel a tlet sep sepna turin shimmer leh glitter hmang rawh. Hetiang i tih zawha i landan chu 'disco diva look' an ti a, tunlai hian an uar hle a ni.

I mit hmul kha a nih ang tur a nih loh chuan i hmel landan a dik lo vek thei a, nalh taka a lan theih na'n mascara chhah takin hnawih ang che.

Rei tak chhung i hmuiah lipstick i lo hnawih tawh thin a ni maithei a, i chhuah dawn apiangin tih ngei ngei turah i ngai tawh niin a lang. Tun tum chu lip gloss hmang zawk chhin teh, i landan kha engemawchen a tidanglam ang a, i hmui vel a lang nungin a rinawm a ni.

I make-up kit mamawhte

Eyeliner tui colour chi hnih, a dum leh a var.

Glitters leh shimmer.

Eye shadow powder rawng chi hrang hrang, a hring, a pawl leh a dumte.

Loose powder. Lip gloss.

Kan han tarlan takte kha i landan pangngai reng tidanglam turin lo tichhin la, huaisen chhuahin danglam ngam la, mi zingah i langsar nalh phah loh tal pawhin a belchiangtute tan chuan tlem talin i danglam phah ngei ang tih kan tiam a che.

-----

Lovers Tips

“Engnge a pawimawhna?” i ti maithei. Hmangaihna dik taka inhmangaihte hi an damrei a, an taksa leh rilru pawh a hrisel bik an ti. Exercise leh vitamin lam kan sawi dawn lo va, inhmangaih taka awm theih dan tip engemawzat kan sawi dawn a ni. Rilru hlim tak leh taksa hrisel taka awm theihna chu hmangaihna hi a ni a, a hnuaia mite hi hmasawnna'n lo hmang ve teh le.

* Hmeichhe hnena thilpek hi tih fo tur a ni a, hengte hi pek a tha bik: Tlereuh, perfume, pangpar. Khai le, mipate u, in wallet hawng u la, insengso teh u.

* A hmui emaw a taksa emaw i fawhin hmanhmawh lo la, muangchangin fawp chhuak dap thin ang che.

* "Ka tawn che avangin mi vannei tak ka ni," ti thin rawh.

* Number 1 atanga 50 thlan tir la, a thlan zat chu fawp rawh.

* Nupa in nih chuan i kawppui chu zan tin zanriah ei khamah taksa sawizawiin tei chhuah pui la, muangchangin a sawi duhzawngte sawipui thin ang che. Woodrow Wyatt chuan, "Hmeichhiate chu an beng kaltlangin hmangaihna a piang a, mipate chu an mit kaltlangin hmangaih a lo piang thin," a ti a, hmeichhiate chu hmangaihna thu fah tam an pawimawh a ni.

* Nupa in nih tawha, mipa i nih chuan in mut hmain i kawppui chu chiang takin a mitah en la, duat takin fawp la, "Ka nei che hi ka lawm takzet a ni," ti thin ang che.

* In intawn vawi khatna champha lawm ang che u.

* I hmangaih chu i hmangaih thu te, i zah thu te, i ngaihsan thu te, i duat thu te, a bula awm i chak thu te, i duh thu te, i mamawh thu te, ro hluaa i neih thu te, a tel loa i awm theih loh thu te, i ngaih thute hrilh rawh.

* Mipa i nih chuan i kawppui hmeichhia chu vawt a tihin i jacket haktir thin ang che.

* Nupa in nih chuan in lukhamah ve ve in hming ziak ula a tha hle ang.

-----

Health

Ka enkawl dan

"An Apple A Day Keeps The Dentist Away" an ti thin a, nitin apple ei ziah chuan dentist a hnawt kiang," tih ang deuh a ni a, a awmziaah chuan apple ei hi ha tan a hrisel a, ha doctor pan a ngaih loh phah tihna a ni. He thu hi i hre tawh ngeiin a rinawm a, mahse ka chhung enkawl turin apple ringawt a tawk lo. Ka thianghlim, fai leh hrisel bakah ha tha leh mawi nei turin tihtur tam tak a awm a ni.

(He thu hi a lar khawp a, fiamthuah pawh an telh ve fo thin. Fiamthu-a an tel pakhat chu rilru chawhhlim na'n lo tarlang lawk ang aw. Han nui lawk phawt mai teh. Tlangval pakhat pawh khan nula hmeltha tak pakhat kha a ngaizawng a. Nula chu dentist tlangval hian a ngaizawng ve a. Dentist tlangval chu nitin apple pakhat a lo pe ziah a. Mite'n nitin apple a pek ziah chhan chu an zawt a, "An apple a day keeps the dentist away,' an ti a, dentist hi hnawh kian ka tum alawm," tiin a chhang a ni awm asin mawle. - Ed)

Apple hi ha nget vengtu tha tak a ni a, ka chhung tifaitu tha tak a ni bawk a, uluk taka thial chuan toothbrush-in hâ a tifai ang mai hian a tifai ve thei a ni an ti hial. Hei bakah hian apple ei hian lu nâ a tidam huai thei a, blood pressure hniam leh sâng pawh a tidanglam thei a ni.

Ka rimchhia veng rawh:

Ka ro hi a rimchhia a, mahni inhriat a har fo. Ka ro avanga rimchhia lo chuak ven na'n ka chhunga bacteria tam tak awm tihtlem a ngai a, a bikin lei hnuai lampanga bacteria awmte'n ka a ti rimchhe bik tih hriat a tha ang. Kan thaw rimchhia zawng zawnga 80% hi kan lei hnuai lam atanga lo chhuak a ni. Engtinnge chu rimchhia chu kan ven theih ang?

• Regular takin tui in rawh.

• Chil hi ka rimchhia vengtu tha ber a ni a, bacteria a tibo a, a thlawn veka kan dawn a ni a, man pakhatmah a nei lo. Chil tam zawk i neih theih na'n zuk leh hmuam ti lo la, eitur dik tak ei la, thil ei loin rei tak tak awm suh.

• Thlai hring chi hrang hrang, a hela ei chi, entirna'n, carrot, parbawr leh a dangte hi chil titamtu a ni a, thei chi hrang hrangte'n chil a titam bawk a, hengte hi i ei thin tho ang a, ei tam lehzual ang che.

• Hna vang leh thil chi hrang hrang ngaihtuah tam leh hnathawh nasat avangin chil hi a tlem thei a, chil a tlem chuan ka ro hulhin a awm theih a, i hah chang leh i buai changte'n sweet tel lo chewing gum thial thin la chil a tam phah ang.

• Dawrah snack chi hrang hrang leiin i ei thin a ni maithei a, a hela ei chi vegetable lam chi leh bawnghnute atanga siam lamte ei ve la kâ a thiang duh a ni.

• Eitur thlum leh ban chalh mai, tui kan tih zawng takte hi kâin a ngeih lem lo va, thlai leh thei lam chite thlang zawk ang che.

• Kain a ngeih eitur engemawzat a awm a, chung zingah chuan cheese eng chi 'Cheddar cheese' an tih ang hian ha chhe tur a veng a, ha nget a do thei a ni.

I ha enkawl uluk rawh

Ha enamel hi porcelain ang maiin a tle nalh a, bulletproof kawr ang maiin a khawng a ni. Kan taksaah chuan kan ha tuamtu tle, enamel hi a khawng ber a, mahse ngetin a tichhe hma hle thung. Chuvang chuan enamel hi enkawl ngun a ngai a, a awmzia chu, hâ enkawl uluk a ngai tihna a ni.

• Ha za hma chi, ha chak lo i nih chuan toothbrush nem tak hmang ang che.

• Thil thlum leh hâng lam chi i eiin toothbrush-in i ha nawtfai ziah la, ha nawhfai a rem lo a nih pawhin i kam tal thuah thin ang che.

• Thei tui leh soft drinks lamah hian thlum a awm a. Chuvang chuan thei tui leh soft drinks-te i in dawnin acid leh thlum laka i ha ven na'n straw hmang ang che.

• Ha enamel tichak tur hian calcium leh phosphorus kan mamawh a, calcium leh phosphorus hi chaw atanga kan dawn a ni a, vanneihthlak takin chil hian tam tak a pe a, chil ngah tura tihtur kan sawite kha zawm a tha hle a ni. #

------

Skin care

Vun chi hrang hrang 5

Thla hmasa khan vun chi thum, vun pangngai (normal skin), vun mawm (oily skin) leh vun ro (dry skin)-te enkawl dan kan rawn tarlang tawh a, tun tumah hian vun chi dang pahnih, vun sensitive leh chi hrang hrang inkawp (combination skin) enkawl dan kan rawn tarlang leh dawn a ni.

Vun sensitive:

Vun sensitive ti ila kan hrethiam vek mai awm e. I khawihin emaw, ni sâa i chhuahin emaw, khua a lumin emaw a sen hma ang a, i thil ei emaw, i thil inhnawih emaw i ngeih lo hma ang a, i vun a bawl hma ang a, a sen hma ang a, a thak awlsam bawk ang.

Enkawl dan:

* Chemical chak lam chi reng reng hmang lo la, perfume tam lutuk pawh hmang suh.

* Sahbawn hmang loin tui hlangin i vun silfai thin rawh.

* Vun sensitive enkawlna bik atana siam product tam tak a awm a, midang hman ang hmang loin chutiang chi chu hmang ang che.

* A theih chin chinah ni saah awm tam lutuk lo ang che.



Vun inpawlh (combination skin):

Vun mawm leh vun ro inpawlh hi combination skin an ti a, hmai laihawl lamte a mawm duh a, chal te, hnar leh khabete a mawm duh a, biangte a ro a, a chang chuan chal pawh a ro duh bawk.

Enkawl dan

* I sam ti ro turin product chak lutuk hmang suh.

* Product mawm lutuk hmang suh.

* A ro leh a mawm lai chu a hrana enkawl a ngai a, a mawm laiah chuan oil tel lo product hmang la, a ro laiah chuan moisturiser hmang leh thung ang che.

Tips

Vun chi hrang hrang panga kan tarlan hnu pawha mahni vun type la hre lo a awm theih a, a hnuaiah hian eng vun type pawh enkawl dan tha a awm a, vun mam, mawi leh nalh i neih theih na'n a hnuaia tarlante hi i lo zawm dawn nia.

* Vun hrim hrim hi tihfai a ngai a, a mawm tawka dah a ngai a, cleanser tha tak hmang thin la, moisturiser hmang thin ang che. Moisturiser hi vun mawm tan pawh hman tho a ngai a, vun mawm i nih chuan oil tel lohna moisturiser hman a ngai tihna a ni.

* I taksaa tûr (toxin) tichhuak tur leh vun tifai turin tui in tam rawh. Tui in tam lutuk hian pawina a nei lo va, taksa tan a tha em em zawk a ni.

* Sunblock lotion hi hman ngei ngei tur a ni bawk a, sunblock tel loa ni saa kal thin chu hmel a upa duh a ni.

* Chawlhkar khatah vawi khat tal exercise la thin ang che. Exercise hian thisen kal a ti tha a, i complexion a that phah dawn a ni.

* I hmai leh taksa dangah arngeng emaw, bawl dang emaw a lo awmin sawr emaw, deh emaw a tha lo hle tih hriat a tha. Dah tawp la, dah tawpa a that theih loh chuan mi thiam chauh khawihtir ang che.

* Ei leh in fimkhur hi a pawimawh em em a, vun hian thei leh thlai lam ei tam a ngeih hle a ni.

A chunga kan han tarlangte hi chu vun enkawl dan tlang lawn ber a ni a, rei tak chhung vun lamah buaina i neih chuan doctor rawn ang che. Vun nalh leh nalh loh hian mihring nun hi nasa taka a khawih danglam avangin mahni tawka vun nalh thei ang ber neih hi tu tan pawh a tha em em a ni. #

-----

Skin care

Vun tha nei tura tihtur 2

Vun tha, nung leh mawi eih i duh chuan vun chungchangah thil chi hnih i ngaihtuah bing a ngai ang. Pakhatnaah chuan kan chenna khawvela vun tichhe thei thil chi hrang hrang laka ven dan tur ngaihtuah a ngai a, pahnihnaah chuan a hriselna tur ngaihtuah a ni. Heng tihtur pahnihte hi awlsamtea tih theih ve ve a ni a, amaherawhchu dik taka tih erawh a tha hle.

Mi zawng zawng hian thatna lai kan nei theuh a, kan vun pawhin thatna a nei a, kan buaipui ber tur chu he kan mawina neihsa leh kan vun mawi sa chu engtinnge tha takin kan enkawl reng theih ang tih a ni a, rei tak chhung a tichhe thei laka kan lo ven loh rei tawh avang emaw, a hriselna tur kan ngaihtuah loh avangin emawa lo mawi lo tawh chu engtinnge kan tih that leh theih ang tih ngaihtuah a ngai bawk a ni.

Vun rawngah hian vun hângte hi a lang chul hma bik a, vun ngo chu a chul har deuh thin tih hriat a tha hle awm e.

Vun venhim hi thil harsa lutuk a ni lo. A hmasa berah chuan eng lak atangin nge venhim ngai tih hriat hmasak a ngai a ni. Nî hi kan chênna khawvela vun tichhe thei lian ber pakhat a ni a, Nî zung tha lo chi hrang hrang laka inven na'n sunscreen lotion tha tak hman a ngai a, hmaiah chauh ni lo, taksa lang laiah zawng zawng inhnawih thin a tha.

Mi tam tak chuan suncreen hi nipui lai chauhin an inhnawih thin a, hei hi an tihsual lai tak a ni. Sunscreen hi ni zung tha lo chi hrang hrang laka inven na'n kumtluanin inhnawih tur a ni a, nitin inhnawih ziah tur a ni.

Ni bakah hian bal te, oil-te leh pollution-te lakah inven a ngai bawk a, hetiang laka invenna'n hian regular taka hmai tihfai te, facial te, steam-te a tha a, toner inhnawih pawh heng vun hmelma lak atanga inven na'n hian a tha hle.

Vun cell thi chak lutuk lak atanga inven na'n deep cleansing tih thin a tha a, vun lang upa tur dan na'n vun tihfai ngun a pawimawh a, exfoliating cream leh vun tihfaina product pangngaite pawh a tha viau a ni.

Vun ngo lutuk lo hang lutuk lo, vun pangngai neite tan vun kaw lian lutuk neih a tha lo va, tihfai ngun erawh a tha. Chutiang tur chuan regular taka vun steam thin a tha a, hmul emaw, bawl emaw avanga hmai vun nung lo tan cream hman a tha bawk a ni.

A nihna tur aia hmai vun nung lo hi arngeng emaw, hmai bawl emaw, hmai duk emaw, hmai tichhe thei laka ven that loh vangte emaw a ni thin a, hmai vun tha leh nung tak i duh chuan a chunga kan tarlan takte hi zawm a tha hle ang.

Vun tichhe thei laka inven a pawimawh rualin a hriselna tur ngaihtuah a ngai tih kan tarlang tawh a, product hrang hrang - Shea Butter te, Cocoa Butter te, almond atanga siam product-te hmang thin la, olive oil te, coconut oil te, aloe vera-te pawh hman a tha tho bawk.

I vun khan product ngeih bik a nei dawn a, i vunin a mil zawng hriat tuma ngaihtuahna i sen bawk a tul dawn a ni.
---------------

Leo mizia

Leo chuan hruaitu mizia nghet tak an nei a, thian inkawmho zingah pawh hriat loh laiin hruaitu an lo ni reng tawh thin. Mahni inrintawkna ngah leh mize zahawm tak an ni a, mi nuihzata awm leh hmingchhiat erawh chu an hlau em em a ni. Rilrua vei zawng sawi chhuah nuam an ti a, naupang an lawm a, naupang pawhin an ngaina tlangpui bawk.

Leo i nih chuan dawhtheihna i tlachham fo tih i inhriat a tha viau ang a, i chhungrila phurna nasa tak lo piang thin kha i insum fo thin a ngai ang. Nawr chi i ni lo va, amaherawhchu fakderna avangin i lawm thin ang a, fakdertute lakah i fimkhur fo a ngai dawn a ni. Mi remhria leh mi hlim thei tak i ni a, nangmah i inhriatchian chuan hlim takin i nun i hmang thei ang. Chhungril lama phurna leh inngaihtuahna nei nasa tak i ni a, vawikhat rilru i siam tawh chu i thlak mai mai tawh loh avangni inhnial pawhin i tanna ngaiah i tang tlat thin.

Leo pawh duh chuan ngilneihna lantir leh fakna hmanin pawh a awlsam ber a, an ngaihtuahna a ngil a, an remhria a, thil an hrethiam thei a, poetry an ngaina duh hle. Mi khawngaihna ngah tak an ni a, mi tawrhna an ngaihthlakin a khawngaih hma a, inngaihtuah buai an ching thut a, mahni inthiam loh an ching em em bawk a ni. Rual kawm thiam, sumdawnna lama an kal paw'n zei tak an ni a, an rilruah in leh chhungkua a lian ber thin.

Leo chuan mi hipna an ngah duh a, remna an siam thiam a, an duh hunah awlsam takin an awm thiam a, an thutlukna siam a ngil tlangpui a, midang nen inpawhna an siam thiam hle. Leo i nih chuan zirtirtuah te, acting lamah te, thusawi lamah te, thuziak lamahte leh entertainer lamahte kal la hlawhtlinna kawng thui takin a inhawng a ni.

Leo chu an fai a, an landan an uluk a, engkim ngun takin an ngaihtuah a, fimkhur luat avangin nupui pasal i nei tlai maithei a, amaherawhchu i thiante emaw, i hnathawhpuite emaw, i lehkhazirpuite emawte nen chuan inpawhna tha tak in nei reng ang. Leo i nih chuan thil sawifiah thiam tak, mahni rilru sawi chhuak zen zen lo, a ruka zakzum, mi khawngaihna ngah tak i ni tih inhre reng la, i mizia atang hian hmasawnna tur ngaihtuah la, nurse emaw, doctor emaw thawk tur chi tak i ni bawk tih hria la, hriselna lam ngaihtuah hi i mizia a ni ve reng reng tih i hre bawk dawn nia.

Leo celebrities thenkhat

Kate Beckinsale, Jennifer Lopez, Ben Affleck, Halle Berry, , Charlize Theron, Sandra Bullock, Hilary Swank, , Arnold Schwarzenaegger, Wesley Snipes, Antonio Banderas, Mick Jagger, Patrick Swayze, Martina McBride, Madonna, Christian Slater, Kate Beckinsale, Edward Furlong, Kevin Spacey, Robert De Niro, Whitney Houston, Matthew Perry, Sean Penn.

August 2010 Issue Part 1

Editorial


Hawihhawm hi changkanna a ni

“Miin khawvel hi a pumin nei sela, hmangaihna nei si lo sela atan engmah a sawt lo vang,” tih a awm a, hetiang deuh hian hawihhawmna chungchangah thu kan han phuah chawp ve a. “Mi hi intichangkangin inti standard viau mah sela a hawihhawm si loh chuan a changkanna a kim thei lo.” tiin.

Aizawl khawpuia lirthei kal inchuh sup sup te, hmaa mite horn pe ri tuarh tuarh te, bank leh office-a intlar ngai ngaithei hlek lo te, office hrang hranga mipui dawrtu bera an dah hawihhawm nachang hre reng reng lote kan la tam hle. Hawihhawm nachang hre lo kan tam hi Mizote kan nunhona tihrehawmtu ber pakhat a ni ta hial awm e.

Hman deuhah chuan zinkawngah driver-te’n lirthei chhia an hmuhin an dinchilh a, an lirthei a that hma chuan an siampui ngat ngat thin an ti. Tunah chuan khawpui chhungah two wheeler khalhtu tam takin kal hmasak an inchuh a, lirthei pangngai khalhtu tam takin an inchuh bawk a, kawng a awm belh si lo va, kan inkhak palh lahin lirthei pang khem mai mai pawh kan la thutak leh viau bawk si. Tiranga leh zuk leh hmuam do a tul ang bawk hian kan khawtlang nun tinuam tur leh zonunmawi chawisang leh tur hian hawihhawm hi inzirtir a tul takmeuh a, ‘hawihhawm lohna’ hi a pawl anga do hial tlak a ni ang.

Mi hawihhawm tura ngaih Officer leh puitling zawkte pawh hi an lo hawihhawm vek hauh lo mai! Sorkar office-a a hotu zingah pawh tunge anmahni dawrtu hriat pawh hrechiang loa vin nghal ringawt mai, a hnua ngaihdam dil leh chung si te, “office-a lo thu nu thau lam deuh thinchhe hlur mai!” te pawh mite tawn ngun tak a ni hlawm ang.

Kawng dunga lirtheia kan tlan lai te, office kan dawr te, office-a midang kan lo dawr te, kan thiltihna engkimah Mizo tam tak hian hawihhawmna kan tlachham hle niin a lang. Tlema kal hlat deuh chuan hnam dang hawihhawmzia leh an hawihhawmnain mi zahawmah a siamzia pawh kan hmu theuh awm e. Kan changkan chhoh zelna tikim tur hian hawh u, hawihhawm i zir ang u. Hawihhawm hi changkanna a ni a, mi changkang lanchhuahna a ni.

Awle, vawi khata duhthawh lutuka kan sawi chuan vawi khata chaw ei teuh ang deuh a ni ang a, kan puar leh lutuk ang a, kan chhak chhuak leh palh ang e, duhtawk phawt ila, Thlifim lam i sawi teh ang.

Thlifim hi kum khat leh thla riata upa a ni ve ta. Tunlaiah magazine-te a tam ta a, chuti em emin hma a sawn chak lo. Chutih lai erawh chuan hma a sawn ve bek bek a, a kalphung kan sawi danglam hnuah pawh min chhiarsaktu in pung ve zel a, mi angin chak takin tlan pur pur lo mah ila zawi te tea hma kan sawnna hi kan lawm ve viau a ni. Kan lawmna thlentu chu chhiartute in ni a, in chungah kan lawm e. Tun thlaah hian thu chi hrang hrang, rei te iak kan buaipui ve chu kan han hlui leh che u a, in ngaihnawm tihzawng leh in chhiar duhzawng a nih ngei kan beisei a ni. Chhiar tui vek u le.
---------

Chhiartute thlan:

Leonardo Wilhelm DiCaprio

Leo DiCaprio, Leonard Di Caprio, Leonardo Wilhelm DiCaprio

Born: Leonardo Wilhelm DiCaprio hmingpuin November 11, 1974-ah Los Angeles, California, USA-ah a piang.

Pa hming: George DiCaprio, Comic-book thehlartu a ni

Pi: Helen Idenbirken, Leo hian Oma tiin a ko thin; 4 Aug 2008 khan Norht Rhine-Westphalia, Germany-ah a thi.

Nu: Irmelin DiCaprio, Germany rama piang a ni a, a pa George DiCaprio nen hian an inthen tawh.

Unaupa: Adam Farrar, Adam hi a pianpui dik tak a ni lo. Kum 1971 -a piang a ni. Kum 1999 khan Pups film-ah an chang dun a ni. Farrar hian Kum 2000 march thla khan a bialnu thah a tum avangin man a ni.

Nu hrawn: Peggy DiCaprio. Adam Farrar hi Peggy DiCaprio fa bik a ni.

Ngaihzawng:

Bar Refaeli: Israel model Bar Refaeli nen Jan 2006 atangin an in ngaizawng a, Oct 2007 khan an inthen a, June 2009-a an inthen hnuah Dec 2009 khan an inzui lai hmuh leh an ni.

Gisele Bundchen: Brazilian Model hmingthang Gisele Bundchen nen kum 2000 nipui laiin an indate a, an indate thu hi 2001 Feb khan Gisele hian Brazilian chanchinbumite hmaah a puang zar a ni. Kum 2002 khan an inthen leh.

Kristen Zang: Kristen Zang nen kum 1996-97 chhung an in-date a, kum 1998 -ah pawh rei lote an inzui leh zuai. Vanessa Hayden nen kum 1998 khan rei lote an in-date ve zuai tawh bawk.

Education:

* John Marshall High School, Los Angeles, CA

* Los Angeles Center for Enriched Studies, Los Angeles, CA

Hun pawimawh

1981 - Kum 6 a nihin eizawnna atan audition a ti ve.

1988 - Film lamah Agent ni turin kum 14 a nihin contract a sign.

1990 - A TV acting hmasa ber The New Lassie film-ah a chang ve.

1991 - ‘Growing Pains’ film-ah chenna mumal nei lo naupang lemah a chang ve. Hemi kum vek hian ‘Critters 3’ -ah role pangngai tak changin hun a hmang ve tan.

1993 - ‘This Boy's Life’ tih film-ah Toby Wolff lema changin Rebert De Niro leh Ellen Barkin te kiangah a chang ve. Kum 1993-ah vek hian 'What s Eating Gilbert Grape' tih film-ah Johnny Depp unaupa lemah a chang ve a, he film a chan that avang hian Golden Globe awards-ah Best Supporting Actor lawmman a dawng.

1995 - ‘The Quick and the Dead’ ah Sharon Stone leh Russell Crow-te nen an changho a. Jim Carrol lema changin hemi kum tho hian ‘Basketball Diaries’ tih film chu hit takin a chang.

1996 - William Shakespeare-a thawnthu lar ‘Romeo and Juliet’ chu Claire Danes nen an chang dun a, a lar phah lehzual hle.

1997 - James Cameron-a film siam hmingthang ‘Titanic’-ah Kate Winslet nen an chang dun a, a larna a belhchhah hle. Hemi hnu hian khawvelin Leo mania a hmang hi a ni ringawt tawh a ni. Titanic film hi sang takah vawrhin Oscar awards 11 ngawt mai a lakpui a. Film chhuah tawha sum lalut hnem berah Titanic film hi a tan phah bawk.

2002 - ‘Gangs of New York’-ah a chang a, Steven Spielberg-a film siam ‘Catch Me If You Can’ tih film chu FBI-te wanted list tlangval Frank Abagnale Jr. lemah a chang a, he film avang hian Golden Globe-ah Best Actor nomination a hlawhchhuak.

2004 - Howard Hughes lemah changin ‘The Aviator’ film a chang, he film hi Academy awards-ah Best actor leh Best Picture a hlawh leh bawk.

2006 - ‘Blood Diamond’ a chang a, Golden Globe-ah Best actor nomination a hmu a, Oscar nomination-ah Best actor nomination a hmu bawk.

2007 - Environmental documentary film ‘The 11th Hour’ tih chu a siam a, he film hi a ziah a nih bakah a produce a ni bawk.

2008 - Kate Winslet pasal Sam Mendes-a film siam 1961 bawr chho vela novel lar tak zulzuia siam chu Kate Winslet nen an an chang dun. Golden Globe-ah Best actor nomination a hmu.

2010 - Thla kalta lawk khan ‘Inception’ tih film a chan chu box office-ah pakhatna dinhmun a luahpui.
--------

Too Much Love Will Kill You

- Laltlanzova Khiangte

Kan hun tawn a zir hian hla ngaihthlak tur awm tak hi han dap kual ila, keimahni thil tawn nena inhmeh tak hi a lo awm leh nge nge thin. Tun tumah pawh hian hmangaihna avanga rilru na tawpkhawk puanchhuahna hla, 'Too Much Love Will Kill You' tih hla hi kan han belchiang dawn a ni.

He hla Queen sak hi ka ngaithla fo a, a thluk a nalh em em a, a hla thu hian rilru a hruai thui bawk a, hei hi chu hlimna lam ni loin hmangaih then rilru nâte ngaihthlak chi a ni.

Khawi chanchinbuah emaw ni he hla chanchin hi ka chhiar tawh a, a phuahtute zinga mi Queen guitarist Brian May-a'n a thil tawn a puanna a ni e tih lam hawiin an ziak a, mahse khawia ka chhiar nge ka hre tawh lo. Internet lamah ka zawng ngial a, rei fe ka beih hnu pawhin chutiang lam chu ka hmu zo chuang lo va, a hla thu bak chu ka luhchilh thei ta lo a nih hi. Chiang lo ruaia ka la hriat theihah chuan Brian May hian hmeichhe hmangaih tak a nei a, chu hmeichhia chu a rilru zawng zawng a pe a, mahse an inthen a tul leh ta si a, chumi hnu chuan a nun chu a ruak ta em em niawm tak a ni. Mahse ka hriat dan a chiang lo; mumang ang ruai chauhin ka hria.

Wikipedia-a an ziah dan chuan he hla hi Brian May, Frank Musker leh Elizabeth Lamers-te phuah a ni a, 1988 daih tawh khan record a ni. Brian May-a'n 1992 khan Freddie Mercury Tribute Concert-ah a sa a, hemi kum vek hian a solo album Back to the Light tihah a telh a,1995-a Queen album chhuak 'Made in Heaven' tihah tel a ni a, Queen sak zawk chu UK single chart-ah 1996 khan #15-na a ni pha a, Brian May, Frank Musker leh Elizabeth Lamers chuan he hla avang hian Ivor Novello award an dawng a, Brian May chu an award dawn vang hian a lawm zual niin an sawi a, hla pakhat avanga award dawn tur ni ta se 'Too Much Love Will Kill You' tih hi a thlan ber tur a nih thu a sawi hial e an ti.

A hla thu kan luhchilh hmain chhiartute zawhna inzawt hmasa ila. Brian May ang hian kan nunah hmangaih kan nei ve tawh em? Ani ang hian hmangaih kan then ve tawh em? A thlen chin thleng lote tan chuan he hla hi engmah a ni lo maithei. Mahse hmangaih tak neia then leh site tan erawh chuan he hla hian awmzia thui tak a nei bik maithei a, a hre tawhin ngun lehzualin lo ngaithla ula, a la hre ngai lote'n lo ngaihthlak phah teh u.

Kei erawh chu ka insawi dawn lo. Tunlaiah mahni insawi zuah zuah hi thiltih chi a ni lo va, miin paparazi leh chanchinbu mite laka an mimal chanchin an thup hram hram laia mahni chanchin lo puan zuah zuah pawh thil tihchi a ni lo vang. Brian May-te'n an phuah chhan leh an sawi tum zawng zawng hi ka hrethiam vek lo, hrethiam kim lem loin ka ngaithla a, hre kim lo bawkin ka rawn ziak chhuak leh a, in ngainat zawngte a nih chuan Thlifim-ah hian in rawn ziak ve a ni ang chu. “Every way I go i’m bound to lose,” a tih hi “Hmangaihnaa vawikhat vanduaina lo thleng hian a hnu zelah vanduaina dang a hring zel duh,” ti lam hawi a ni a, i awih zawng ni maw? Ka awih deuh roh asin! Engpawhnise, Thlifim-a hetiang lam article rawn ziak ve tur hian kan sawm reng a che u.

Kan hla sawi mek chu heti hian bul a intan a, a awmzia tlangpui nia ka hriat ka'n sawi tlang pawrh mai ang e.

Ka lo nih thin ang mipa kha ka ni tawh lo va, tunah chuan a keh them chauh ka ni ta.

Lungngaih mittui tam tak ka seng a,

In atanga hla takah ka awm bawk si.

He lungngaihna hi keimah chauhin ka tuar a,

Ka tawrh chhung hi a rei ta lua e.

Seilenna chungchang leh beih hram hram ngai chungchangah hian tuma'n thudik min la hrilh ngai lo ni hialin ka hria a, he ka rilru buai tak hian ka kalsualna lai hriatchhuah tumin nasa takin ka ngaihtuah thin a ni.

I rilru i siam fel theih loh chuan hmangaihna nasa lutuk chuan a tihlum ngei ang che.

Inhmangaihte inthenna leh hmangaihna i hnutchhiah avangin chhiatna i hmachhawn mek a, chhiatna i tawng dawn tih 'sign' chu i chhiar ngai si lo. Hmangaihna nasa lutuk chuan engtik lai pawhin a tihlum ang che.

Ka lo nih thin mipa kha ni tawh loin a hlimthla chauh ka ni tawh a, he ka dinhmun atang hian tal chhuahna a awm lo ni hialin a lang. I tan ni ka chhuah tir thin a, tunah chuan tihhlawhchham chauh che hi ka tih awmchhun a ni ta. Tunah hian ka pheikhawkah hian ding ta la engtinnge ni ang aw, mahse ka dinhmun hi thlan theih a ni lo tih i hmu lo em ni? Chutiang ngaihtuah chu a sawt lo va, kei chu ka kalna apianga hlawhchham zel mai tur ka ni.

Hmangaihna nasa lutuk chuan engtik lai pawhin a tihlum ang che. Khawvelah hian tumah an awm ve lo ang maiin he thilah hian ka chiang. I theihna zawng zawng a laksak vek che ang a, a te chhuahtir che ang a, i bawkvak ang a, i natna chuan mi â ah a chhuah ang che.

Hmangaihna nasa lutuk chuan engtik lai pawhin a tihlum ang che. I nun dawtah a chantir ang. Ni e, hmangaihna nasa lutuk chuan a tihlum che ang a, a chhan i hrechhuak thei lo vang. I nun i hlan ang a, i thlarau i hralh ang. Mahse i lo lang leh ta. Hmangaihna nasa lutuk chuan a tawpah a tihlum ang che.

Khati zawng kha a ni. Lehlin fuh chiah lo pawh kan nei maithei. Engpawhnise, nula leh tlangval inhmangaih tak tak, inthen lo thei si lote inthenna hi chu a na e an tia lawm. Brian May-te phuah ang khawp hian rilru na, hmangaihna la na em em, inthen hnua nun buai zui ta vek hi a awm theih in ring em? Hmangaihna avangin “Hlim thla mai ka ni tawh,” a tih te, “A keh them chauh ka ni tawh,” a tih te, “Ka tan chhuahna kawng a awm lo ni berin a lang,” a tihte hi thil tak taka thleng thei a ni ang em? Kei chu ka ring lehpek tlat zu nia! Ngaihdan chi hrang hrang lenna khawvelah hian engnge maw i ngaihdan ve le?

“I tan ni ka chhuah tir thin a, tunah erawh chuan a tihlawhchhamtu che chauh ka ni ta,” tih te hian thawnthu thui deuh chu a keng tel ang mawle! Hmangaih thintuin a kalsan ta tih lam a ni tih chu kan hai lo theuh ang chu maw. Hmangaihte kalsan lo thei lo dinhmunah hian a din theih a ni chêk ang e.

Hmangaihte Inthenna avang hian mi tam tak rilru a na a, he hla aia tuar nasa pawh hi an awm. A chhan chu, mi thenkhat chuan an nuna hial pawh an tihtawp hial a ni! Khati lam zawng i sawi thui lo teh ang, a lungchhiat thlak lam sawi chiam ka tum lo. Engpawhnise, he hla hian tute nunah emaw chuan awmze thui tak a nei tih chu a chiang reng mai a, a duh apiangin an sawi zuina forum ka chhiar a, pakhatina a sawzuina hi tarlang leh lawk teh ang.

"A va dik tak em. Hmangaihna hi a nâ a, mahse vawi khat tal chu i nunah tawng ve la i tan a tha ang. Brian May ka ngaihlu a, he hla hlu tak hian ka rilru a khawih a, ka ngaihthlak apiangin ka hmangaih ka then tak ka ngaihtuah chhuak thin.”

Nang i ni ve em? Lo ngaithla ve la, lo ngaihtuah chiang la, feed back i pe duh a nih chuan ph: 9612859820-ah sms thawn theih a ni. Thla hmasaa article kan ziah "Have you ever really loved a women" tiha feed back min lo petu zawng zawngte msg kan chhang kim thei lo va, chanchinbu kaltlang hian lawmthu kan hrilh a che u.
Too Much Love Will Kill You

I'm just the pieces of the man I used to be

Too many bitter tears are raining down on me

I'm far away from home

And I've been facing this alone

For much too long

I feel like no-one ever told the truth to me

About growing up and what a struggle it would be

In my tangled state of mind

I've been looking back to find

Where I went wrong

Too much love will kill you

If you can't make up your mind

Torn between the lover

And the love you leave behind

You're headed for disaster

'cos you never read the signs

Too much love will kill you

Every time

I'm just the shadow of the man I used to be

And it seems like there's no way out of this for me

I used to bring you sunshine

Now all I ever do is bring you down

How would it be if you were standing in my shoes

Can't you see that it's impossible to choose

No there's no making sense of it

Every way I go I'm bound to lose

Too much love will kill you

Just as sure as none at all

It'll drain the power that's in you

Make you plead and scream and crawl

And the pain will make you crazy

You're the victim of your crime

Too much love will kill you

Every time

Too much love will kill you

It'll make your life a lie

Yes, too much love will kill you

And you won't understand why

You'd give your life, you'd sell your soul

But here it comes again

Too much love will kill you

In the end...

In the end.

------
Love story:
Tha famkim lo hmangaih

Kum hnih chhung an innei tawh a. Literature a ngaina em em a, lehkhabu engemawzat a ziak tawh a, a thuziakte chu internet-ah mite chhiar theih turin a tarchhuak fo va, mahse a vanduai a siamin tuma'n a thuziakte an chhiar ngai lo. Thlalak erawh chu a thiam em em a, thlalak lam chu a vanneihna a ni a, mite pawhin thla la turin an ruai thin a, professional photographer hlawhtling tak a ni.

He photographer hian a nupui a hmangaih em em a, mahse a nupui chuan a hmangaihna leh duatna zawng zawngte chu a tur ve rengah ngaiin lawm nachang a hre lo va, a thinchhe em em a, a duhsaknate chu thinrimin a chhang let a, ngeiawm tak takin a awm khum thin a, mahse gentleman a ni a, a hmangaihin a ngaihsak em em reng tho a ni.

Tukinah pawh hian tûm bûr chungin a bia a.

"Ka thiante inneihna thla i lak sak thei lo'm ni? Hlawh tha tak pek a tiam che a ni."

"Vawiin chu hun ka nei lo!"

"Ka awih lo!"

"Ka ti tak tak."

"Hun ka nei lo i ti maw? Lehkhabu ziak tlem la hun i nei a ni mai!"

"Engtik emawah chuan mite'n ka lehkhabu ziahte hi an la chhiar ve ang a, ka hlawhtling ve chêk ang."

"Chutiang ka ngaihtuah lo. Ka thiante inneihnaah chuan thla chu i laksak dawn em sawi rawh."

"Dawn lo."

"Tun tum chiah."

"Ka la dawn lo."

Inbiakna a tawp a, inremna a awm thei lo. Photographer nupui chuan a pasal chu warning hnuhnung a pe a, "Ni thum chhunga aw i tih loh chuan a pawi viau ang... i duh loh zawng tak a thleng a ni mai... "

Ni khatnaah chuan photographer nupui chuan a lungawi lohna lantirna'n eirawng a bawl duh lo va, choka a kalh a, bathroom a kalh a, computer, refrigerator leh tv zawng zawngte khawih a phal lo bawk a, khumah erawh chuan a pasal chu mut a la phalsak ve hram a ni.

Photographer chuan a nupui chetdan chu ngawi rengin a dawh hram hram a, a ipteah pawisa a la ah avangin pawn lamah chaw a ei a, vantlang bathroom-ah inthiarin a inbual bawk a, mut tui lo awm pawhin a lang lo.

Ni hnihnaah chuan a nupui chuan a ipte atangin a thil ah zawng zawng a lakchhuahsak vek a, "Midang tanpuina zawng rawh, ka duhdan loa awm pawizia hi i hre khawp ang," a ti tan tan a.

Tunah chuan photographer chu a che buai tan ta. A nupui, a hmangaih em em lakah chuan engemaw tal a tih a ngai a ni. Chumi zan chuan khuma an mut dun laiin a nupui hnenah chuan ngaihdam a dil a, a awmdan anga awm tawh lo tur chuan a ngen a, mahse a nupui chu a thusawi ngaithla awm pawhin a awm duh lo va, a thiante inneihna thlalak a remtih hma chuan a nun phung a pangngai loh tur thu leh, a duh ang a tihhlawhtlinsak loh chuan a retheih tawlh tawlh tur thu a hrilh a ni.

Zan thumna a lo thleng a. An nupa chu khumah an mu a. Photographer chuan bang lam a hawi a, an nu pawh khumah a lo mu ve a, lehlam a hawi ve bawk a. Photographer chuan a nupui lam chu a hawi a.

"Inbiak kan mamawh a ni."

"Ka thiante inneih chungchang a nih loh chuan theihnghilh nghal rawh."

"Tuna mi hi chu thil pawimawh tak a ni."

A nupui chuan a chhang lo va.

"Inthen mai ang."

Photographer nupui chuan a thu hriat chu a awih lo rum rum a, mahse a pasal chuan inthen a rawt a ni tih chu a chiang fek fawk hle.

"Hmeichhia hmangaih ka nei a ni."

A thinrim lutuk chu a zuang tho zawk a, a pasal chu ben chawr a chak ngei mai. Mahse a kut chu a la thla a, tun tum chu sawi zawhtir thain a hria a ni. A pasal thusawi avang chuan a mittui a parawl kiang tawh a, hmeichhia hmangaih a neih thu a han sawi meuh chuan a pasal a lo hmangaihzia chu a inhre chiang ta.

Photographer chuan thlalak a lo lek chhuak a, a kekawr bul ipte atanga a lo lak chhuah niin a lang a, a kekawr bulah engmah a ah a rin loh avangin a lo en miah lo a, a thawmhnawah a en loh chhun a ni. A va han fimkhur lo tak em!

"Hmeichhe duhawm tak a ni."

Photographer-in thlalak ena chu thu a sawi chuan a nupui hmeltha tak, mahse a chunga hmangaihna lantir ve ngai lo biangah chuan mittui a lo luang ngiai ngiai a.

"Mi nungchang tha leh ngainatawm tak a ni bawk."

A pasalin duh hmel taka thlalak a en vawng vawng leh a awma thlalak dah chunga chutiang a sawi chuan a rilru chu a kehsawm vek a, hun tha a neih chhunga a pasal chunga hmangaihna a lo lantir thin lo chu pawi a ti em em a, mahse tunah chuan inchhir a sawt tawhin a lang si lo.

"He hmeichhia hian kan inneih hunah literature lama ka hmalak zelnaah theitawpa min tuipuia min tanpui a tum thu a sawi asin."

Ani pawhin an inneih hmain a pasal hnenah hian a tuina lama tuipui a tum thu a lo sawi tawh a, a hmeichhe tawn thar chu a thik em em a ni.

"Min hmangaih takzetin ka hria."

Photographer nupui chu a ding uaih tawh a, "Keipawhin ka hmangaih lo che a mi?" tiin mittui tla zawih zawih chungin a en a.

"Ani chuan ka chungah hmangaihna a lantir thin a, min zah thiam a, thinrim hmel min put khum reng lo va, ka duh loh zawngah pawh min tilui tlat ngai lo."

A inngaihtuah ta vang vang a, mahse a chhungrila a thinrimna chu a reh thei lo.

Photographer chuan hmeichhe thlalak a ken chu a nupui mit bulah chuan a han keng hnaih a, a nupui chu a thinrim tak zet a, a kut chu a lo ben persak a, a biangah na zetin a lo beng bawk a.

Photographer chu a rum nghut a, a nupui erawh chu rilru nain a tap hawm hawm a ni.

Thlalak chu a kekawr bul ipteah chuan a dah lut leh a, engmah an sawi zui tawh lo. Ngawi rengin khumah chuan an thu a. Photographer chuan ngawi rengin light a off a, blanket a sin a, lehlam a hawi a, a muhil ta a ni. A nupui erawh chu a thutna ngaiah a la thu reng a, chuti maia muhil thei a ni ve lo. A pasal chu tui takin a muhil bawrh bawrh a, ani erawh chu chhete pawhin a mut a chhuak lo va, a pasal bula a awmdan dik lo takte chu a ngaihtuahin a inchhir em em a, a inchhirin ban a chen tak meuh meuh a ni. Mahse tunah chuan hmeichhe hmangaih dang a nei tawh a, inthen bak hmabak an nei tawh si lo.

Khuma thu chung chuan a tap zawih zawih a, thil tam tak a ngaihtuah a, inchhirna thu sawi tur tam tak a nei a, a pasal chu kaihthawh a rilruk a ni. Mahse tun tum chu a hma angin thinrimin a dawr tawh lo vang a, tlai tawh mahse, awmzia a nei tawh lo a nih pawhin a hmangaihna a lantir thin thungrulh na'n tal hmangaihna a lantir ve tawh ang. A kekawr bul ipte chu a en vang vang a, a hmeichhe hmangaih neih thar chu eng ang mi nge tih hriat a chak hle a ni.

A pasal hriat loh tur chuan thlalak chu a la chhuak zal zal a, thlalak a hmuh chuan a tap chhuak ta hawm a, reiloteah a tah nuih leh a, lawm avangin a biangah chuan mittui a lo luang ta.

Thlalak nalh tak a ni a, ama thlalak a ni! A pasal lamah chuan a kun hnai a, hmangaih takin a hmuiah chuan a fawhsak ta vawng vawng a.

A pasal muhil der chu a lo meng a, hlim takin a lo fawp let a, chumi zan atang chuan nupa awh awm berte zinga mi an lo ni ta. #
-----

Hringnun
Kristen Stewart

The Twilight Saga film-a Bella Swan lema a chanavanga khawvel mipuite hriat hlawh, Kristen Stewart hi April 9, 1990 khan Los Angeles-ah a piang a, naupangtê a nih lai atanga film chang tawh a ni. A nu leh pate atangin film lama tawn hriat ngah tak an ni a, a pâ John Stewart chu stage manager leh television producer a ni a, a nu pawh scipt supervisor a ni bawk. U mipa Cameron Stewart a nei a ni. Kristen hian grade seven thleng school a kal a, in lamah a zir chhunzawm a, high school thlengin in atangin a zo a, college erawh chu a kal chhunzawm rih lo a ni. Kum 8 a nih atangin film a chang tan a, The Flintstone in Viva Rock Vegas tihah pawh khan a lang ve a, The Safety of Objects tihah te, Panic Room tihah te, Cold Creek Manor tihah te, Catch That Kid tihah te, Undertow tihah te, Speak tihah te, Zathura tihah te, Fierce People tihah te, The Messengers tihah te, Land of Women tihah te, Into the Wild tihah te, The Cake Eaters tihahte leh a dangahte a lo chang nual tawh a ni.

November 16, 2007 khan Summit Entertainment chuan Stephenie Meyer-i lehkhabu, bestselling pawh ni pha hial, vampire romance novel behchhana an film siam tur, 'Twilight' tiha a changtunu, 'Isabella 'Bella' Swan lema chang turin Kristen-i chu thlan a nih thu an puang a, director Catherine Hardwicke chuan an enchhinna atangin a duh hluah hluah nghal niin an sawi. Edward Cullen lema chang Robert Pattisson nen chuan an che tha dun hle a, February 2008-ah an chang tan a, May 2008-ah an chang zo a, November 2008-ah tlangzarh a ni a, Twilight hlawhtlinna avangin Kristen chuan chawimawina hrang hrang a dawng zui mawlh mawlh a ni. Hemi hnu hian Twilight zawmna, 'The Twilight Saga: New Moon' tihah a lang zui leh a, The Twilight Saga: Eclipse tihah a lang leh bawk. Twilight hnuah hian The Yellow Handkerchief tihah a chang a, Welcome to the Rileys tihah a chang leh a, The Runaways tihahte a chang leh tawh bawk a ni. Tunah hian K-11 tih film-ah a chang leh dawn a, he film-a director tur chu a nû a ni dawn a, mipa lemah a chang dawn niin sawi a ni bawk. Hei bakah hian ‘On the Road’ tih film-ah Mary Lou lemah a chang dawn bawk a, he film hi tun thla hian an chang tan dawn a ni.

Mimal nun

Kristen Stewart hi Woodland Hills, Los Angeles-ah a cheng mek a, Los Angeles-a chen ai chuan Australia-a chena hnathawh a duh zawk a, mahse film lamah a luh avangin a insawn thei rih lo va, "Australia-a Sydney University-ah luh ka duh a, a chhan chu, ka nu hi Australia mi a ni a, he university atanga lo chhuak a ni," a ti. Acting bakah hian Kristen hian college kal thuai a duh thu a sawi bawk a, "Literature zir turin college kal ka duh a, writer nih ka duh a ni. Tuna ka hnathawh hi ka tui lo tihna a ni lo va, mahse writer nih tel ka duh a ni. Damchhunga 'professional liar' chauh nih reng ringawt hi ka tum ber a ni lo," a ti.

Kristen hian Vanity Fair magazine hnenah Michael Angarano nen an in-date mek thu a sawi a, Michael hi Speak tih film-a a chanpui a ni.
-------

Love Story
Lehkhathawn

Ka ni, Stephina hi a nundan a danglam avangin kan hnaih ngam lo thin a, a nihna taka sawi chuan kan naupan lai chuan naupang zawng zawngin kan hlau a ni. A chhan chu, kan chhungkaw zingah a cheng ve lo va, kan in bul deuh lawka a ma in te tak tea chen a thlang zawk a, kan in chhung ri deuh nuaih nuaih chu nuam a ti lo va, a in khawhar takah chuan chhuak loin rei tak tak a awm reng thin.

Ka nu hian eitur a siam thiam hle a. Eitur danglam bik a siam apiangin kan in lianpui atang chuan ka ni Stephina chenna in te tak te, a awmpui pitar Tnate Sanna nen chauha an chennaah chuan a eitur siamte chu kan keng ziah thin a, chutianga naupangte kan kal chuan pi Tnate Sanna chuan kawngkhar min lo hawnsak a, anmahni hlau takte chu an inchhung thim takah chuan min hruai lut a, khawlum leh tho an luh loh na'na an khar reng thin an kawngkapui chu a khar leh thlap thin a ni. An sitting room-ah chuan eitur an lak chhawn chhung chu kan nghak a, a chang chuan kan khur deuh dat dat a, mahse a pumpui chuan a hrehawm lem lo.

Pi Tnate Sanna chu hmeichhe te lam, fai taka inchei, pitar zahawm tak a ni a, thawmhnaw dum a ha reng thin a, an inchhung thim deuh raih nen chuan a inhmeh em em a ni. Mahse a bula awm chuan mi hneh theihna riau a nei a, a che muang viau na a, a aw chu a nêmin a ngainatawm em em a, a mitmengah chuan ngilneihna nasa tak hmuh tur a awm bawk a ni.

Min kuah ngai miah lo va, mahse chibai min buk a, kan kut te reuh te lum thir ther chu a kut mawi tak leh vawt thlip thlep chuan min chibai thin a, a upat tawh avangin a thisen zamte chu en chianin a hring deuh hlek a, mahse naupang mai mah ni ila a kut var mawi tak leh mam takte chu a that lai huna mite'n hmuhnawm an tih thin turzia kan chhut thiam ve tho a ni.

Tnate Sanna chuan sweet dahna thleng a lo chawi chhuak a, sweet ban thler thlawrh tui deuh mai a ni a, sweet-te chu min pe a, grape leh peach thei thleng lianpui a lo chawi chhuak leh ziah a, ka ni Stephina chuan kan farm-a thil thleng eng engemaw min lo zawt a, a chang zeuh zeuhin farm piah lam khawvela thil thlengte pawh min lo zawt ve thin.

Sweet leh thei chi hrang hrang min pekte kan ei zawh chuan ka ni Stephina chuan veranda thlengin min lo thlah a, ka nu hnenah chuan eitur a lo thawn avanga lawmthu lo sawi tur leh ka pa chibai a buk thu hrilh turin min chah ziah thin a ni. Kan kal liam thlengin min thlir a, kan kal liam hnuah a in te tak teah chuan a lut a, kawngkhar a khar a, kan tan chuan kawngkhar a khar rual rualin a in chu hmun maksak tak a ni leh nghal a ni.

Ka puitlin hnu chuan rin loh takin ka ni ze zawi leh midang pawh lo taka nun hmang thin Stephina chu ka ngaina ta em em a, George nena inhual kan tum thu pawh ka hrilh hmasa ber a, George hruaia ka ni hmelhriattir ka duh tlat chhan chu ka hrethiam lo va, mahse ka ni Stephina chuan ka hriatthiam phak loh mi hipna nasa tak a nei a ni ngei ang. Ka rin loh takin George nena inhual kan tum thu ka hrilh chuan a lawm em em a, a hmelah chuan a lawm tih hai rual lohin a hriat a ni.

"English mi maw? A va lawmawm em!" a ti a, George-a lam chu a hawi a, "He ramah hian i cheng hlen ve dawn em ni? England-a let leh i tum lo em ni?" tiin a zawt a.

George-a'n kan farm bul lawkah farm zau tak a lei tih leh South Africa-a inbenbel a tum thu a hrilh chuan a thaw huai niin a hriat a, a hmel chu a lo nung thar sawt a, George-a chu tui takin a titipui ta bawrh bawrh a ni.

Chutia ka ni Stephina leh George an inhmuh hnu chuan in te tak te chu kan kalsan a, kan farm chhunga vaimim hmun zau tak chu George nen kan fang dun a. George-a haw hnu chuan ka ni Stephina chu ka tlawh leh a, kum hnih hnuah inneih kan tum thu ka hrilh chuan a hmelah lawm lo hmel lian tak ka chhiar thei a, amaherawhchu ka nu leh pain kan ruahmanna chu tha min tihpui tih a hriat erawh chuan a thla a muan hmel leh deuh thung.

Ka ni Stephina hian George nen kan inkar hi a ngaihsak em em a, a chang chuan ka tana zawhna mak angreng takte min zawt leh thin a, a awmdanah chuan kan inhmangaihnaah thil duhawm lo engemaw a thlen palh a hlau ni berin ka hre thin.

Ni khat chu George-a'n kan inneih hmain England tlawh lawk a tum thu ka hrilh a, ka beisei loh tak maiin ka ni Stephina chu thinrim takin a te thawt a, "Kal suh se. Kaltir reng reng suh. I kaltir lo ang tih min tiam rawh," a ti a, a taksate chu a khur dawt dawt a, a rilru nawmna turin theihtawpin ka hnem a, mahse a hmelah chuan a chauh hmel em em a, a hmel chu a dang vek a, a room-a mu hahdam turin ka ngen a, a tuka a ina tlawh leh ka tiam bawk a ni.

A tuka a in ka thlen chuan veranda-ah a lo thu chhuak a. A khawhar hmelin a hmel chu a khawngaihthlak em em a, a hmel ka en rual chuan a vawi khatna atan ka rilruah engatinge mipate'n nupui atan an sawm ve ngai lo em ni, engatinge pasal nei loa hetia a awm reng tih zawhna a lo lut a, mipate'n an hmangaih ve ngai lo em ni? Amah enkawl tur leh amah hmangaihtu an awm lo em ni ang? Ka nu min hrilh danin ka ni Stephina hi a nulat lai chuan nula hmeltha chungchuang a ni si a, tunah pawh a hmel upa tawh tak karah nu hmaifang tha tak a ni thin tih chu a hriat reng a, a mitmu buangah chuan lungngaihna thuk tak hmuh tur awm mahse chu mitmeng chuan tlangvalte rilru a la hneh em emin a rinawm si a, hmeichhe lian lem lo, te lutuk lo chu mipa tuemaw tal chuan an hmangaih ngei ngei tur a ni.

Ka ni Stephina chu a ngawi reng a, sawi tur tam tak a nei niin a lang a, a hmelah chuan sawi tanna tur ber a hre lo ni zawkin a lang.

Chutah thawk a han la hak a, a rilruah mawlhtu engemaw lian tak a awm niin a lang a, "I tel loa George-a'n England tlawh a tum ka duh lo viau hi mak i ti hlein ka ring a. I thiltawn hian hun kal tawha ka thil lo tawn min ngaihtuah nasattir zual a, hetiang lama ka thil lo tawn tawh hrilh che ka duh a, ka hrilh zawhah che i pasal hual i tel loa in inneih hmaa England-a kaltir a finthlak leh finthlak loh chu ngaihdan i siam dawn nia," a ti a, a chanchin chu min hrilh ta a ni.

"Richard Weston ka tawn hmasak ber chuan nula chhuaktir chauh ka la ni a. Richard chu English mi a ni a, kan farm bul lawk, kan farm atanga mel li leh mel nga bawr vela cheng Van Rensburgs chhungkaw rualin England atangin a lo kal a ni. Mipa chak tak a ni lo va, a awm a chak lo va, doctor-in South Africa khaw lum leh ro a ngeih an ring a, an lo kaltir a ni. Van Rensburg fate lehkha a zirtir thin a, chung naupangte chu kei aiin naupang daih mahse kan infiam thin a, ani pawh kan infiamnaah chuan a lo tel ve thin a ni.

"Richard nen chuan kan inhmuhtir atangin kan inhmangaih nghal a, mahse kum sawm pariat ka tlin champha a thlen hma zawng chuan kan inhmangaihna thu erawh chu kan sawi chhuak lo. Ka piancham lawmnaah chuan kan chhungkhat laina leh kan thian thate zawng zawng an lo kal vek a, zan lamah chuan kan farm building lianpuia carpet kan phah chungah chuan kan lam a. Richard chu Van Rensburgs chhungkaw rualin a lo kal a, chumi zan chuan Richard nen reilote kan lam dun a, mahse ka pa hian England atanga lo kalte hi a ngeih vak loh avangin hla zawng zawnga lam dunpui ka ngam lo a ni.

Ka pa hian English mite hi a ngaina ngai lo hrim hrim a, Mynheer Van Rensburg pawh an lawnga Richard a lo phurh thlen avangin a hnialpui tawh a, mahse ram dang atanga lokalte lo ngeih loh ringawt chu thil tha ber a ni lo tih a hre chhuak leh a, a hnu lamah chuan hawihhawm takin a be ve ta a, mahse a chhungril tak chuan Richard pawh a ngaina ngai lo.

Ka piancham vawi sawm pariatna kha ka nuna ka hlim ni lai a ni. Richard chuan vawi engemawzat kan lam dun hnuah zan thla eng nuam tak, vawt raih mai, arsi pe uarh maiah min hruai chhuak a, thlate leh arsite'n min thlir reng lai chuan min hmangaih thu min hrilh a, innei turin min sawm nghal bawk a ni. Kei pawhin i he loin ka hmangaih ve thu leh ka neih duh thu ka hrilh ve nghal a, amaherawhchu inneih chungchangah chuan ka nu leh pate rawn phawt ka duh thu ka hrilh thung.

Richard nen chuan inhmuh lehna hun tur kan sawi a, mahse kan inhmuh lehna hun turah chuan a hmel reng reng hmuh tur a awm lo va; a lokal lo chu ka rilru a hrehawmin ka khua a har viau a, mahse kan inhmangaihna a thuk em avangin vawi khat a hmel hmuh lo ringawtah chuan rinhlelhna ka nei lo a ni. Buaina engemaw tak a tawk a nih ka ring a, a chenna Van Ransburgs chhungkaw farm kan tlawh leh hunah emaw, kan farm a rawn tlawh leh hunah emaw min hrilhfiah ngei ka beisei a, chutah chuan inhmuh lehna tur kan sawi leh ngei ka beisei bawk.

Chuta tanga ni rei vak loah chuan ka pa chu Van Ransburg chennaa a motor-a min kalpui turin ka sawm a, phur hmel taka min kalpui mai avangin ka lawm khawp mai a. Ransburg chhungkaw farm kan thlen chuan coffee-te min lo pe a, Richard chu a pa a thih avangin England-ah a haw thut tih min lo hrilh a, a pa rokhawmtu tur a nih avangin a haw ngei ngei a tul thu leh a pa estate zau tak chu a enkawlzui a ngaih tur thu min lo hrilh bawk a ni.

Chumi ni chu chiang takin ka hre lo. Ka rilru a vai a, ka ngaihtuah nawn pawh hian ni kha a dul mai pawh ni loin a chhuak lo ni hialin ka hria a, farm mawi tak nia ka hriat thinte chu a chul vek a, khaw khen laia a ro vek ang mai ni berin ka hria. Tlai lamah chuan mihang mipa naupang te tak te Jantje hi kan farm-ah a lokal a, lehkhathawn min pe a, English tlangvalin ka tana a hnutchhiah a nih thu a sawi a. Chu lehkhathawn chu love letter ka dawn hmasak ber a ni a, lehkhathawn ka dawn chiah chuan ka rilrua Richard-a ka huatnate chu a reh huai a, min la hmangaih tih ka hriat chuan ka rilruah lawmna nasa tak a lo piang nghal a ni. A lehkha ka kawl chhung chuan kan inthen thei dawn loin ka hria a, ani England-ah a awm a, kei farm-ah ka awm a, tun thlengin chu beiseina chu ka nei a, pitar chau tak ni tawh mah ila tun thlengin beiseina leh huaisenna min la pe a ni."

Ka ni Stephina hnenah chuan, "I love letter dawnah chuan engnge in ziak min hrilh thei ang em?" tiin ka zawt a.

Ka zawhna avang chuan ka ni chu hun kal tawh a suangtuahna khawvel thuk tak atanga lo harh chhuak hlawl hi a ang hle a, a hmelah chuan inthlahrunna hmel hi a lo lang a, "Ka fanu duhtak, i chhiar duh ang tiraw? Ka love letter dawn chu chhiar ta che," a ti a.

Kei chuan, "Ka lawm ngawt ang chu," ti chauhin ka chhang a.

Ka ni chu a ding nghal a, hmeichhe naupang ang mai hian phur takin in chhungah chuan a lut a, a lo let leh chuan lehkhathawn hi min pe a, lehkhathawn chu a hlui tawh avangin a rawng a eng deuh vek tawh a, rei tak dah that tawh leh chul ngun a ni tih hriat takin a tlangte chu a bal deuh tlar tawh a ni. Mahse ka han hawn dawn chuan a charna a lo la inphelh hauh lo mai a, vawi khatmah hawn a la ni lo tihna a ni chu.

Ka ni Stephina chuan aw khur deuh dat datin, "Ka fanu duh tak hawng rawh, hawng rawh," a lo ti a.

Lehkhathawn chu ka chhiar ta.

Lehkhathawn chu hmangaihna thu pawh ni chiah loin zinkawng inkawhhmuhna a ni deuh ber. A duh ber Phina chu a pâ venhimna hnuai atanga a chhuah theih dan tur te, zanah a lo vak chhuak ang a, mipa naupang Jantje chuan sakawrin a thianpa Henry Wilson hnenah a hruai ang a. Ani chuan pawisa a lo pe ang a, Cape Town khawpuiah a lo kal ang a, chuta tang chuan England-ah a hmangaih ber chu a zui dawn a ni.

"Ka hmangaih ber, England i lo thlen hun chuan ropui takin kan innei ang a, khawvela nupa hlim ber kan ni tawh ang. Mahse ka duhtak, i la hriat ngai loh rama nangmah chauha i lokal hi ka ngaingam thlawt lo va, chuvang chuan he kailawn pawimawh tak hi tihlawhtling lo mai la, ka hmangaih em che avangin reilote i hlim loh pawh ka duh lo va, chuvangin in farm-ah khan hlim takin lo awm phawt mai rawh. I lo kal lo a niha, i chanchin ka hriat loh chuan kha ram, i hmangaih em em leh a chhunga cheng i ngainat em emte zingah khan i lo hlim lo tih ka lo hria ang e. Engpawhnise khawngaih takin kan thutiam kha lo vawng tlat la, England zinkawng khawhar tak chu lo zawh lo mai la, ka lehkhathawn erawh hi chu lehkhathawn vekin min lo chhang let ngei ngei ang che. Chuti chuan South Africa-ah ka lo let leh ang a, ka nupui tur chu ka rawn hruai ang.

Chubak chu ka chhiar ngam tawh lo.

"Ka ni Phina! Engatinge... Engatinge?"

Ka ni mitmeng mawi tak chuan rilru buai tih hriat tak hian kan piah lawka tlang lam chu a thlir vawng vawng a, a hmai chu a lo sen tan tan a, a mitah chuan beiseina nasa tak hmuh tur a awm a. "Ka fanu duhtak ring takin chhiar zel rawh. Thumal zawng zawngte kha a vaia hriat vek ka duh a ni. Tumah rin tur ka nei lo va, khang hunlai khan English mite khan huat an hlawh si a, tumah min chhiarsak turin ka ngen ngam ngai lo," a ti a.

"Mahse ka ni, eng thu nge a ziah pawh i hre lo a maw?"

Pitar ngainatawm tak chuan lei lam a bih reng a, a mitmengah chuan rilru lam natna nasa tak a tuar tih a hriat theih mai a, naupangin thil an tisuala an inthlahrung hmel hi a pu bawk a.

Chutah aw zawi tak hian, "Ka duh tak, i hriat angin ziak leh chhiar hi tun thlengin ka thiam ta lo a ni,” a ti a. #
--------

Teenager-te tana thurawn

Tleirawl/rawltharte hian ngaihzawng an neih tan dawn hian tuemaw tanpuina leh an tangkaipui tur thurawn an mamawh em em thin a. Chutianga mamawh nei riaua inhriatna i nei ve a nih chuan a hnuaia kan tarlan takte hi ngun takin chhiar la, zawm tum la, a ho viau emaw i tih lai khan i lo hlawkpui reng thei a ni.

1. A hmasa berah chuan a bulah engtiangin nge i awm ang tih ngaihtuah hmasa thin la. Inngaihzawn bul tan dawn hian nervous a awl em em thin a ni. Mahse chutianga zam mai lo tura pawimawh ber chu Confi' taka awm a ni tih hre kar ang che. Len chhuahpui tura i sawm reng rengin ngaihtuahna seng hmasa la, plan tha tak nei lawk thin ang che. Tin, i incheina pawh kha uluk thei ang berin induan thin bawk tur a ni.

2. Hmeichhe tan: Mipa an rawn len lai reng rengin i chhungte'n eng thu pawh an zawt thei che; chu chu hnial loh hram tur a ni. Eng zawhna pawh dawng la inah emaw hmun dangah emaw tha tak leh thuawih taka chhan thin a tha ang. In inchhunga i awmdan atangin nangmaha an ngaihdan an lo siam fel vek hman ang. Mi pangngai taka an ngaih theihna tur chein an rawn len chhung zawng chu mawi hnai taka awm hram tum tur a ni.

3. Mipa tan: Hmeichhe ina i len dawn reng rengin politeness a pawimawh ber tih hriat phawt a tha. Eng ang mi pawh nise, an ina i len chhung kha chuan an chhungkaw member zawng zawng kha i zah der thiam em em tur a ni. Tin, hei bakah hian i ngaihzawng chauh kawm lo vin, a chhungte pawh kawmngeih thiam a tha hle.

4. In vawikhat awmdunna a nih chuan thut mai mai te, TV en mai maite kha i tih loh tawp tur a ni. I ngaizawng tak tak a nih chuan a ngaihdante i hriat theih nan thil eng engemaw sawi puiin a tam thei ang ber hun hmanpui tum tur a ni. Politics leh mi puitling chin tui pui pangngai ang hi chu sawipui loh hram a tha.

5. Hmeichhiate tan, mipate tana itawm lampanga inchei loh hram hram tur a ni. Dress a dik loh chuan mipaten nangmahah ngaihdan tha lo tak an siam thei a ni. Nangmaha i duhawm theih dan tur bera i awm thiam kha a pawimawh ber, i taksa lan sexy tir lam ni lovin. Zahawm taka awm thiam tur tihna a nih ber chu.
-------

Dating tih dawna mipate hriat tur

Ngaihsak tha rawh: A hobby te, a ngaihven zawngte leh duhzawngte zawt la, zawhna i zawh reng rengin ngaihthlak lamah dawhthei hle bawk ang che. Tunlai thil thleng leh politics lam sawipui reng reng loh tur a ni.

A mitah tak en ang che: Mita chiang taka in en hian mi ngaihdan leh awmdante tam takin a lang thei thin. A thusawite i ngaihsak a ni tih lantir nan a mitah tak en thin ang che.

Hlim rawh: In date hi a nuam a ni. Hlim taka awm i tum ang bawkin i kawppui kha hlim taka awmtir tum ang che. Thil dang ngaihtuahsan daih lovin in indate leh hun turte sawi dunin inpawh taka awmpui tum tur a ni. Fiamthu ho te te leh engemaw hlimawm lampang ngaihtuaha hun hman tam theih dan ngawt ngaihtuah mai tur a ni.

Khawi hmunah nge?: I ngaihzawng i date hmasak ber dawnin khawi hmunah nge in indate ang tih ngaihtuah hmasak thin tur a ni. Restaurant emaw park emaw hi hmun tha ber chu a ni. I lo nervous ta deuh a nih pawhin i hmun thlan chuan i awm a ti nuam tho tho ang. Chu chuan rilru nuam deuhin a awmtir thei dawn ang che. I kawppui tur pawhin nuam a tih lai tura i ngaih hmun ngei thlan thiam a pawimawh em em a ni.

Perfume hmang suh: Vawikhat inhmuhna hun hmang tur in nih avangin nalh tum luat tuk leh mawi tum lutuk avang emaw rimtui i tum lutuk vang emaw khan perfume-te kha i hmang ngawt ang e. Hmang reng reng suh. Perfume-ah kher kher chuan rimtui tih zawng a inang lo fur mai. I perfume kha i kawppui tur khan rimtui a lo ti lo riau mai thei asin.

Thawmhnaw thlang uluk rawh: Thawmhnaw bawraw lam leh colour fresh vak lo lampang thlang suh ang che. Chu chuan i ngaihzawng rilru a tidanglam daih thei tih hria ang che.

Tlawmngaih chhuah tur: Mipa zawk chuan hmeichhia zawk kawngka a hawnsak ang a, thutna a siamsak ang a, hmeichhe thu a ngaichang hmasa thiam tur a ni. Game an khelh pawhin hmeichhia zawk a chaktir thiam tur a ni. Chu chuan hmeichhe rilruah ngainatna a tuh lehzual dawn a ni.
--------

I riang lutuk em?

Mihring tungchho a kal tawh phawt chuan mamawh kan nei; chu chu thian a ni, mi hnuaia hrehawm taka awm kan duh lo vek thung. Kan thinlung taka kan zawmpui tur kan mamawh thin a ni. Chutiang ni lo va, mal ngawih ngawiha awm te, mahni ngaihtuahna kawma awm keuh keuh thinte hi an hriselna a tha lo hma bik niin Arizona University-te chuan an sawi. Mahni ngaihtuahna hmang nasa lutuk leh midang bula awm peih lo, rilru kawm chi kan tih angte hi an hriat loh laiin an hriselna a tha lo hma hle bik a ni tih Passalacqua leh Chris Segrin, UA Communication department head leh lead author-te chuan an zirchian hnuah an hmu chhuak a ni tih an paper buatsaihah an tarlang a ni.

Passalacqua leh Chris Segrin te hian mi puitling china ngaih kum 19-85 inkar mi 265 nungchang an zirnaah an taksaa engemaw dik lo emaw midang bula awm ngai lo mahni inngaihtuah cheuh cheuhteah hrisel lohna hi a awm hma bik tih an hmuh chhuah thu an sawi a ni. Chhungkaw fuh loh vang te, thian kawm mumal loh avangte hian midang bula awm duh loa, mahnia inngaihtuah chi an awm a, chubakah mahni taksa chiangkuan loh vangte leh mimal inkara buaina avangtein mi tam tak chuan thian an kawm peih lo va, an mahniin an tla hrang hrang a, an ngaihtuahna a tha lo zawnga an sen nasat lutuk thin avangtein an hriselnain a tuar hma a ni.

Heng mite hian kawm hlim an mamawh a, an hmalam hun pawh hlimawm zawng leh eng zawnga thlirpui thiam an mamawh em em a ni.
-------

Bollywood hmeichhe chhe lo ber ber 10

1. Priyanka Chopra: Miss World pawh lo ni tawh Priyanka Chopra hi 18 July 1982-ah a piang a, a film chan hmasak ber chu kum 2002 khan changin Tamil film Thamizhan a chang a ni. Hemi hnu kumah hian Bollywood lama a film hmasa ber ve thung The Hero: Love Story of a Spy tih chu a chang leh a. He film a chan that avang hian Filmfare Best Female Debut Award a dawn phah a ni.

Kum 2004 khan a award dawn vawi hnih nan Filmfare Best Villain Award chu a dawng leh a, Aitraaz film-a a performance vang hian critics-te fakna a dawng hnem hle a ni. Hlawhtlinna a dawng chho mawlh mawlh a, heng bollywood film lar tak tak Mujhse Shaadi Karogi (2004), Krrish (2006), Don - The Chase Begins Again, Fashion (2008) and Badmaash Company(2009) ahte hian a hit takin a chang tawh a ni. Chopra hian Filmfare Best Actress Award pawh kum 2008 khan a lo dawng tawh bawk a ni.

2. Katrina Kaif: Katrina Kaif hi India rama milar tam tak zingah India rama piang ni lo tlemte zinga mi a ni, 16 July 1984-ah Hongkong-ah a piang a. A nu hi Britain mi a ni a, a pa hi Kashmir lam chhuak a ni thung. India rama an rawn luh hma hian ram hrang hrangah chhungkaw eizawnna avangin an awm kual tawh thin a ni. Kum 2003 khan Kaizah Gustad's Boom -ah a vawi khat nan Bollywood film a chang a . A bialpa Salman Khan nen hemi kum vek hian an in-date tan a ni. Katrina hian Asia's Sexiest woman in 2008 nihna a lo hauh tawh a, Awards of Sabsay Favourite Heroine Award in 2008 leh Stardust Breakthrough Performance Award (Female) in 2006 chu Maine Pyaar Kyun Kiya a chan atangtein a dawng tawh bawk. Tin, heng bakah hian Cine Awards leh IIFA Awards in 2008 chu a dawng tawh bawk. Rajiv Gandhi Award in the year 2009 dawngtu zingah a tel tawh bawk.

3. Aishwarya Rai Bachchan: Bollywood beauty tia an sawi thin Aishwarya Rai Bachchan hi Indian Actress zingah chuan a lar ber zinga mi a nih bakah kum 1994 khan Miss World lallukhum a lo khum tawh bawk. Aish hian kum 1997 khan a film chan hmasak ber Mani Ratnam-a siam Tamil film, Iruvar a chang a, film lama a hlawhtlinna tak chu Tamil movie Jeans kum 1998-a a chan a ni. Kum 2002 leh 1999-te khan Filmfare best actress award a lo dawng tawh a, 2003-2005 chhung khan a career a tla hniam deuh a, kum 2006-ah Dhoom 2 a chang a, heta tang hian Bollywod actress zinga hlawhtling berte zingah a rawn inchawichhuak leh a ni. Ash hian Hindi film chauh chang lovin Tamil, English leh Bengali film-te a chang nual tawh a. Hollywood film Bride & Prejudice (2004), The Mistress of Spices (2005), The Last Legion (2007) and The Pink Panther 2 (2009) te chu an lar hlawm hle a ni.

4. Shilpa Shetty: Shilpa Shetty hi India ramah chuan actress leh model nikawp lar berte zinga mi a ni. 8 June 1975-ah Mangalore-ah a piang a, a nu chu Surendra a ni a, a pa chu Sunanda Shetty a ni. Shilpa hian Bollywood film 40 dawn a chang tawh a. Tamil, Telugu leh Kannada film-ahte a chang kual tawh a ni. Kum 2003 khan a film chan hmasak ber Baazigar a chang. Shilpa hian kum 2007 khan British Celebrity Big Brother TV show-ah lawmman pakhatna a lo la tawh nghe nghe a. IPL cricket team Rajasthan Royal-ah neitu nihna a nei ve mek bawk.

5. Bipasha Basu: Bipasha hi 7 January 1979-ah New Delhi-ah a piang a. He nula hi awihawm loh khawpin a thang tha niin an sawi. A tetlai chuan naupang hâng hmelchhe ve tak a ni thin. Kum 2001-a Ajnabee film a chan atangin a rawn lar ve tan a. Hlawhtling takin 'Raaz', 'Jism', 'No Entry', 'Phir Herapheri', 'Corporate' &'Dhoom 2'-ahte a chang a, heng a film chante hi box office-ah an langpha vek a ni. 'Dhoom 2' a playback singer-a a tanna avangin fak a hlawh hle a, music video-ah pawh vawi hnih lai chu a lang ve tawh a ni. 2004 Femina Miss India beauty pageant thlannaah pawh khan Judge a tang pha khawpin a invawrh sang nghe nghe a ni.

6. Kareena Kapoor: Kareena-te chhungkua hi film chang thiam chhungkua an ni a, Actor Randhir Kappor hi a pa a ni a, a u Karisma Kapoor chu actress a ni bawk . A nu leh pate an inthen tawh a, a chhan chu a pa hian an unau hi lemchan ve a phal loh vang a ni.

Kareena hian a film chan vawikhatna atan kum 2000 khan Refugee tih film chu Abhishek Bachhan nen an chang dun a, film 30 chuangah a lang tawh a ni. Kareena hi tunah chuan Bollywood actress hmingthang berte zinga mi a ni mek.

7. Genelia D'Souza: He nula hi Jeanette D'Souza leh Neil D'Souza inkarah 5 August 1987 khan Mumbai-ah a piang a, amah hi Kristian sakhaw vuantu langsar tak a ni. Mangalore Catholic, Mumbai-ah an lawi a. Thurin pawh Bandra, Mumbai-a Carmel High School-ah a zir thin. Bandra, Mumbai-a St. Andrews College atangin management a zirna pawh a graduate a ni. Genelia hi sports lam pawh ti thei tak a ni a, infiamna hrang hrangah a awmna state ai a lo awh ve tawh thin a, hei bakah hian football pawh national level-ah a khel tawh a ni.

8. Deepika Padukone: Deepika Padukone hi Ujjala leh Prakash Padukone-te inkarah a piang a, a pianna hmun chu Copenhagen, Denmark lam daih a ni.

Deepika hi Indian company hrang hrang model ni lai a ni a, Maybelline company chuan international level-a an spokeperson atan an ruat a ni. A vawi khatna atan kum 2006 khan Aishwarya rai nen Kannada film an chang dun a. He film avang hian Filmfare Best Female Debut award a dawng a ni.

9. Lara Dutta: Lara Dutta hian Miss Universe Contest 2000 a telnaah point score sang ber record a siam a ni. Ghaziabad-ah 6 April 1978 khan a piang a, Miss Gladrags lawmman a lak hnu kum 2000-ah Miss Universe lallukhum a khum a ni. Andaaz tih film chu kum 2003 khan a chang a, best female debut award chu Femina hnen atangin a dawng. Film a chan thiam piah lamah thuziah thiam tak a ni bawk a ni.

10. Asin Thottumkal: Asin hian a film hmasa ber atan Telegu film Amma Nanna O Tamila Ammayi tih chu kum 2004 khan a chang a. Kum 2005-a a chan Ghajini tih film chu Tamil leh Telegu tawnga tih chhuah rual a ni a, heng tawng pahnihah hian hit a kai ve ve a ni. A hnuah he film hi Hindi-a siam that leh a ni a, Aamir Khan nen an chang dun leh nghe nghe a ni. Asin hian thla kalta lawk khan India Cricket Captain M.S.Dhoni chu pasal a tan a nei.
-----------

Korean drama
Princess Hour changtute

Joo Jin hoon (Lee Shin)
Ji Hoon hi an family name chu Joo a ni. Ju Ji Hoon ti pawhin a hming hi an lam bawk thin. 16 May, 1982 -ah Seoul-ah a piang a, Korea ramah chuan model leh actor ni kawp zinga lar berte zing a mi a ni. Princess Hour-a Le Shin (Goong) lema a channa hi a film chan hmasak ber a ni.

Hemi hnu atang hian entertainment industry-ah a zuang lut tak tak a ni. Tongwon College-ah e-Business a zir thin a. Heta tang hian Joo hian a model career a tan nghe nghe. Kum 2003 khan company hrang hrang Calvin Klein, Levi's leh Reebok tan advertisement model-ah a tang zak zak tawh a, modelling award chi hrang hrang a dawn phah nual a ni.

Joo-a debut drama chu 'Old Love,' tih a ni a, mahse Princess Hour drama hian Asia khawmualpui ram tam takah a vawrh kang ta zawk a ni. Princess Hour hi Goong tih pawhin an lam thin tho. He drama-ah hian Joo hi Lal fapa Shin lemah a chang a, a chan that em avangin MBC Award-ah Best New Actor award a dawn phah a ni.

Kum 2007-ah Korean actress lar tak Shin Min nen The Devil tih drama changin he film-ah hian lawyer hnathawk lemah a chang a, he film avang hian a sam tan a ngai a, hmai dung sei tak anga inlan a ngaih avangin a sam hi a tan a ni. Kg 5 laiin a rihna tla hniam bawk a, kar khatah vawi thum exercise lain arsa chauh a ei thin a ni. The Devil hi an tih chhuah hma hauh atanga film thlir lawk hlawh ber zingah pathumna a ni pha nghe nghe.

Joo hi kum 2007 khan New Asian Star 2007 thlanna Coex, Seoul-a neihah thlan a lo ni ve tawh a. Asian star hi South Korea, Japan, China, Taiwan leh Thailand atangtein an participate thin. Astar TV sawi danin heng an thlanchhuah turah hian actor or singer te dinhmun/ nungchang te, an rawn lar chhuah dante uluk taka zir chian hmasak thin a ni. Astar TV hi Asian Star thlangtute an ni.

June 23, 2009 khan Drugs chungchangah buaina a neih avangin court-in a ko a, jail-ah thla ruk hun hmangin kum khat chhung a nungchang enthlak a ni bawk a, darkar 120 chhung chu vantlang tan hna a thawk bawk. Heng bakah hian 360,000 won chawitir a ni a, (An pawisa chawitir hi US dollar 280 nen a intluk vel).

Kumin Feb 2 khan Joo hian a fans-te hun rei lote lemchan lam chawlhsan turin a mangtha a, an ram sipaiah a tan dawn vang a ni. Hetiang hian thuchhuah an siam nghe nghe. "Nimin Feb 2 2010 khan Joo Ji Hoon chuan MMA ((Military Manpower Administration) a zawm ta a, kar 5 chhung training a neih hnuin a hun pum he hna hi a thawk tawh ang," tiin.

Hemi hnu hian Joo hian thuchhuah siam ve lehin, "Mipuiten min lawmna leh min support-naah lawmthu ka sawi a, rim takin ka thawk ang a, sipai tha tak ka ni ang a, min lo nghak hram hram ula kum hnih hnuah ka hmel in hmu leh dawn nia," a ti a ni.

Song Ji hyo (min Hyo rin)
Song Ji hyo hi an family name chu Song a ni. August 15, 1981 ah Cheon Seong-im hmunah a piang a. Korean Star tam takte angin a eizawnna chu lemchan leh advertisement model-a tan a ni. Princess Hours drama-ah Min hyo Rin lemah a chang a, he drama avang hian a lar phah hle.

Jumong film-ah Lady Yesoya lema a chan that em avangin Korean Actor/Actress ten an dawn thin MBC Award pawh kum 2006 khan a lo hum haw ve tawh bawk a ni.

Kim Jeong Hoon (Lee Yul)
Kim Jeong Hoon hi January 20, 1980-ah Jinju, South Korea ramah a piang a, Japan hming John Hoon a nei bawk. South Korean singer leh actor a ni a, an chhungkaw Korean hming chu Kim a ni. A lar chhuahna chu Korean dou UN member a nih laia kum 2000-a an debut single tih chhuah Voice Mail atangin a ni. Kum 2005 khan a telna thin dou band UN hi an kehdarh tawh. Princess Hours-a a chan that em avangin a larna hi a belhchhah hle a ni. Kan hriat angin he drama hi comic based a siam a ni.

An band an keh darh hnu hian Kim chuan a hun pum acting lama hman a tum thu a sawi zui a. Korean music industry tihnun zel duhtu leh venhim duhtu lian tak a ni bawk.

Film lama a luh tak tak hma hian Seoul National University (College of Dentistry)-ah a kal thin a. Tunah hian zirna la chawlhsan lovin Chung Ang University-ah senior a ni mek. Khawiah emaw chuan acting lian tham tak la chan a tum fan a ni.

April 28 2009 khan kum hnih chhung atan vantlang police hna a hmu a. Vawi khat chu amah hmuh tum hian Japan, Korea, China atangte fans zariat chuang an fuan khawm tawh a ni.

Yoon Eun-Hye (Shin Chae-Kyeong)
Yoon Eun-Hye hi October 3 1984 -ah a piang a, South Korean actress, singer, entertainer leh model lar tak a ni a, an Korean family name chu Yoon a ni. Girl band lar tak Baby V.O.X member a nihna atanga lar chhuak a ni. He band-ah hian 1999 - 2005 chhung a tel. Hemi hnu hian acting lamah kalin Princess Hours hi a chang a, a chet that em avangin hriat a hlawh zual hle a ni.

Lemchan leh zai a thiam em em rual hian Yoon Eun-Hye hian February 2007 khan Kyung Hee Cyber University atangin a zirlai a graduate a, Bachelor's Degree in Business Administration a dawng a, Tourism Management hi a thiam deuh bikna a ni.

Nonstop 4-ah te, variety show pakhat X-Man-ahte a chang chho leh a, Korean pop singer Kim Jong Kook nen lar hat khawpin chanchin an nei a, hemi chungchang hi an ram chanchinbuahte an tilang nasa hle. July 2006-a Kim Jong Kook-a music video 'Saying You love Me' tihchhuahah pawh model a ni nghe nghe a ni.

Princess Hours hi Eun Hye-in acting lama major role a lakna hmasa ber a ni a, a tirah chuan he role a chan avang hian inhnialna a tichhuak nasa hle; a tirah chuan amah duh lotu tam mahse ngainatu leh entu an tam ta em em a, an ram chhungah 28.3 % zetin entu an pun chhoh avangin a drama episode pawh 20 tur kha 24-in an tisei a ni. A chanpuite nen hian chang chhunzawm zel tura sawm an ni nghe nghe bawk.

Drama leh film hit tak tak a chang chhunzawm zel a, hemi rual hian management company lamah a thawk pah reng bawk a. Asia ram hrang hrang - Singapore, Japan, Taiwan, Thailand leh China-ahte ngaisangtu a ngah hle a. Japan ramah phei chuan ama pualin fan club an din nghe nghe a ni. Coffee Prince a chan that avang hian South Korea ram chhunga milar A-list an tihah a tel phah bawk a ni.
-------

Kissing tips

Sapho tih dan kan entawn nasa tawh bawk a, an in-kiss dan hian i kawppui kha han kiss ve chhin teh le.

Apple kiss
Apple thar tak ei dun ula, chumi zawhah chuan han in-kiss teh u.

Cake Kiss
Cake eng ang chi pawh ei ula, chu zawhah chuan han in kiss teh u le.
Cheese in ei dun hnuah i bialnu kha han kiss teh.

Chocolate kiss
I chocolate ei lai kha i hmuiah han tinem hmasa phawt la, chumi hnuah chuan i ngaihzawng kha kiss rawh le.

Gum kiss
Chewing gum eng pawh in thial emaw a nih chuan han infawp vang vang ula, chutih lai tak chuan i chewing gum thial lai kha han in paste vel teh u, dangdai ve tak chu a ni.

Honey Kiss
Khawizu tlem i hmuiah tat la, chuti chung chuan han infawp vawng vawng mai teh u le. A thlum dangdai khawp ang.

Grape/Strawberry kiss
Grape emaw strawberry kha han seh vang vang la, in hmuiin han in pe chhawng vel ula, nuam dang dai tak tur a nia sin.

Tih loh tur: Kuhva te, sahdah te, khaini te, cigarrette-te tih paha in-kiss erawh chu a tuihnai lo tih hriat a tha. Ka rim tichhe thei lakah fimkhur rawh.
-----

Live Band hi Professional line ang chuan a kal theih loh
- Steward

“Live Band hi Mizoramah chuan professional line anga han kalpui chu thil theih a ni lo. Eizawnna hrang hrang dap pah kan ni thin a, hei hian hmalak a ti harsa bawk khawp mai. Mahse kan tuina a ni a, keini pawhin kan kalpui reng rih chu a nih hi”. tiin Steward-a, Mizo rock band Magdalene vocalist chuan a sawi.

Steward-a chuan, “Nakina band la rawn din zel tumte tana kan sawi hnawnna lam ni lo se, Mizoramah chuan mihring kan la tlem a, eizawnna atana hman dawn chuan band din hi thil theih a ni rih lo a ni. A chhan chu mi pakhatin eng programme-a emawa a zai hlawhah Rs. 2000/- vel a dawng a, band va inlan ve dawn ila, chutiang vel tho chu kan hlawh a, band pakhatah a tlem berah member 4 vel kan awm thin a, chung mite chuan Rs. 2000 chu kan han insem leh a, chuta tang chuan in hriatthiam mai ka ring,” tiin a sawifiah a ni.

Amaherawhchu ram pawn lam aim chung leh sponsored-tu tha tak an awmte a nih chuan band din chu a tha a tih reng thu a sawi thung. Rawn ding thar leh zel turte tan pawh performance a pawimawh zia sawiin, “Mi hmaa music va tuma zai ringawt tur kan ni lo va, entertainer kan ni tel bawk tih hriat a tha a, kan performance a zir zelte pawh khan kan zai hi a chawi em em a ni,” tiin a Steward hian a sawi bawk.

Tunlai huna live band performance chu a hmuhnawm tawh takzet thu a sawi bawk.

English leh Mizo hla rock music hmanga Pathian fak hi a danglamna vak a hriat loh thu sawi a, “Pathian fakna a ni a, a hrethiam pha deuh chinah phei chuan a danglamna a awm chuang lo. Chubakah helai tak hi mihring kan inan lohna tilangtu chiang tak pakhat a ni,” tiin a sawi bawk.
-------

Lecturer nih tum thin Rosy-i

Naupang sikul kal lai nih chuan zirtirtute’n, “Engnge nih i tum,” tiin min zawt thin. Mipa lamah driver, sipai tan tum chhanna tam hunlaite, hmeichhe lamah nurse, missionary nih tuma chhan uar hun laite a awm a. Hun a kal zel a, chhan dan a danglam chho tial tial a, nih tum pawh a sang chho tual tual bawk a. Zirtirtute’n nih tum min zawh thin hi zaah sawm tling an awm lo maithei a ni. Chutiang velah chuan zaithiam Rosy K.Remsangpuii pawh a bang chuang lo.

Rosy-i chuan, “Ka tet lai chuan thiante sawi ang angin ka chhang ve tawp a, an chhan ang ang khan ka chhang mai thin a, ‘Engnge i len hunah nih i tum?’ tia zirtirtuten min zawh pawhin IAS tiin ka chhang ve tawng mai thin,” tiin a sawi.

Hun a lo kal deuh a, rilruah thahnem ngaihna a lo lian a. Mizote ram pawn lama hnathawk tura infuih phur tura tan lak duhna rilru a lo pu chho leh a, tlema pawl sang deuh a lo nih hnuah Naupangte kawng kawhhmuhtua tan tumin Lecturer nih tuma rilru a lo sen ve ngar ngar tawh thin thu hetiang hian a sawi.

“Mizo naupangte hian tum mumal leh sang kan nei lo thei lutuk a, fuih phurtu leh kawng kawhhmuhtu niha Lecturer-a tan ka tum leh ngar ngar a,” tiin Rosy chuan a sawi bawk.

Rosy chuan, “Tunah chuan tha deuh mai nih tum deuh ka nei a, chu erawh ka sawi duh tawh rih lo, keimahin ka hre reuh reuh anga a ni mai,” tiin fiamthu deuhin a sawi a ni.

Mizo zaithiamte zinga hriat hlawh ber pakhat, Rosy hian HDFC bank peng pakhatah sales development manager hna tui takin a thawk mek a ni. #
-----

Alex Lalchhuankima bihchianna

1. Tlangval nih nawmna: -Nupuite mitmei veng reng renga hun hman a ngai ve lo va, han chhuahvah velte pawhin tlangval nih chuan hun thawlte pawh kan ngah zawk a. Chubakah, venthawn leh thiktu tur awm lova nula han melh kuala, han rimte hi a nawmna chu a ni deuh mai....

2. Music tuina lam: Tuina leh duhzawng han tih dawn chuan ka ngah ang reng a. An hlasak nalh ka tih zawng zawng ka ngaithla kual a ni deuh mai a, Slow rock, rock leh country hi ka duh deuh a, a tam berah chuan country ka ngaithla nasa ber.

3. Sports: Kei hi chu ka’n sportsman lo khawp mai a, han tih ve vak pawh ka nei ngai lo. Mahse fitness ka ngaipawimawh viau thung a, exercise han lak zawk zawkte hi ka uar ang reng viau thung. Ka tih chak ve deuhho vur tleng tih vel hi Mizoramah a tih ve theih si loh a, buaithlak a nih hi..

4. Computer Games - Computer games hi ka khel lutuk lo va, mahse han awmawl chang hian need for speed leh counter strike-te hi khelh nuam ka ti a, indo lampang hi khelh nuam ka ti hrim hrim bawk.

Tuina lam hrim hrim - Tui deuh bik sawi fak tur hi ka hre lo khawp a, Pathian zarah ka tih ve tawh hi chu ka hlawhtling ve viau zel a, zai chu thu hran nise milem ziah nen hian kan inngaizawng rei tawh khawp a. Milem ziah mai maite hi nuam ka tih zawng a nia. Tui pawh ka tui khawp mai.
-----------

Camping boruak nuam ti ber PBK-a

Nu leh pa leh upa lamin an duh em em thin, tunlai gospel artist ngaihven hlawh ber pawl PBK Liankhuma chuan rawngbawlna leh Pathian pawlna hunah chuan Camping boruak nuam a tih ber thin thu a sawi.

PBK-a chuan, “Camping boruakah hi kan thlarau nun chak laite a ni thin a, kan harsatna leh chak lohna lai insawipuina hun kan neih tam laite a nia, chubakah kan testimony sawi tur ngah lai takte a lo ni bawk thin nen camping boruak hi Pathian pawl nan chuan nuam ka ti ber,” tiin a sawi.

Kan rawngbawl zelna tura min puitu pawimawh tak a nih bakah thusawi tur tam tak ka chharchhuahna pakhat a ni a, ka tan chuan camping a awm ve thin hi a hlu khawp mai,” tiin PBK-a chuan a sawi bawk.

PBK-a hi a tunhma hun lam chuan mahni maia rawngbawla han kal ve deuh ngak ngakte a ngah thin thute a sawi a, tunah chuan Pathian malsawmnain zau zawkin rawngte a lo bawl ve thei ta a, zai chauh lo pawh thusawi ngaihna hmunahte chuan theih tawka thu a sawi ve thin thu a sawi bawk a ni.

Thlifim chuan PBK-a hnenah hian nu leh pa lamin a zai an ngainat deuh bikna chhan nia a hriat kan zawt a, hetiang hian a sawi a, “Pathian thua tui pha chin leh tih takzeta rawngbawl chinte chauh hian ka zai hi an ngaithla tui thin niin ka hria; a hla thu leh a hlain mi a hneh dante ngun taka ngaihtuah ngai lote erawh chuan min ngaithla ngai lem loa hriatnate ka nei ve thin,” tiin.

Tunah hian music video album tha tak siam tumin hma a la mek a, “Hmanhmawha tih chi pawh a ni lo; buaipui tur dang keimahah a lo awm ve lo thei si lo va,” tiin a album buatsaih chungchang a sawi bawk.
---------

C.Sanga ngaihdan

A rawn lar tirh lamah chuan  rock music rawngkai deuh kin a rawn che chho a, tunah chuan Mizote rilrem zawngin a kal ta ngar ngar a, a zai chu mite ngaihthlak duh leh ngainat hlawh ber pawl a ni ta.

Tunlai zaithiamte zingah audio cassette siam ai chuan music video siam an tam zawk a. Thlifim chuan Mizo zaithiam zinga music video hit tam tak nei tawh C.Sanga chu a chhan niawm a zawt a, “Mizoram chhungah chuan mihring kan la tlem si a, audio cassette siam dawn chuan marketing lamah buaina kan tawk lo thei lo a, chubakah hnam hrang kan lo ni ve thlih thliah bawk si a, a buaithlak deuh a ni,” tiin Mizo zaithiam hriat hlawh berte zinga mi chuan a sawi.

“Chhim lamah kal ila tawng a lo dang deuh a, hmar lamah chuti bawk,” tiin a buaithlak a tih thu a sawi bawk a.

C.Sanga chuan heti hian Thlifim hnenah a sawi bawk a, “Bazar vela cassette zuarho pawhin audio ai chuan video cassette tawpa siamin hralh a kal zawk tihte min hrilh a, i hla hluite pawh chul mamin a thar tlem telh la, music video tawpin siam rawh te min ti a, chubakah thingtlang lamah chuan kan hmel an lo hmuh ve theihnate a nia, TV channel luh tam lohna khuaah phei chuan video hi a tangkai ve em em a ni.”

“A hlawk leh hlawk loh chu thuhran nise kan damlai lungphun ve a nia, hlu ka ti ve hrim hrim bawk, nakinah kan tu leh faten an lo la en ve ngei dawn a, chuta tan pawh chuan a hlu ka ti ve hrim hrim bawk a ni,” tiin C.Sanga chuan a sawi bawk.

Fam ngaihna lam hla sak sak tura an nawr nasat thin thu a sawi bawk a, “Tihchhuah lem loh in lama ngaihthlak tura record sakte pawh ke nei nual tawh a, min lo tlawm ngaihsak teh tia hla min rawn min rawn pe nawlh nawlh tawk hi an awm reng a, a thenin hla an rawn nei sa a, thenkhatin nei lem lovin min rawn dawr bawk a,” a ti a.

“Tunlai chu famngaite pual ka ni ringawt,” a ti fiamthu a ni.
-----
Article
Nakin Hun Tur Thlir Rawh

- R.L. Hmangaiha

TUN
‘Tun’ hi engmahin a dal thei lo. Tun hi nakin avanga ‘tun’ ni thei chauh a ni a, i thil duhzawng tuak nan, i thiam duhzawng zir nan, i la hriat ngai loh hriat theih nan, i sawi tum sawi chhuah hun atan, ngawih tul huna ngawih hmak hun atan… a la tlai miah lo. Second khat lek pawhin i la tlai eih lo. Chuvangin, ‘tun’ pawimawhzia i hriat chian poh leh a hman/chhawr tangkaina tur i hre teuh mai ang. Nakin thlir nan, nakin a hman tlak dawn lo. ‘Tun’ hi nakin thlir na’n chuan a tha ber a, a hmuh fiah theih ber bawk. Tun atang hian nakin chu i’n thlir dawn teh ang le.

TUM
Tum’ hi thil hote pawhin a dal thei. A mawl berte paw’n hisap kan nei theuh. Thlulengi dawn pawh a chen lo a ni mahna! Kan tum chu a sang leh a hniam a awm a, chi hnih chauh. A dik a ni. A sang i tum chuan tan fat fat, beidawn tep tep tihvel chu pumpelh tum loh mai tur a ni ang. A dik alawm, tum a san poh leh tlakna a sang. A hniam kan tum chuan awlte a ni. Dr. Samuel Rosen-a’n bengngawng enkawlna hmanrua a siam kha a tam hle a, hmantlak chu pakhat chauh. A bul kan tan peih phawt chuan a tawp thlenna tur kan nei tihna a ni. A bul tan peih miah lo chuan a tawp thlen nghahhlelhtirtu an nei pha ve ngai lo. I tum chu khawiah nge? A hla em? A hnai lutuk zawk em ni? Thlir rawh le.

NAKKIN
Nakin hi tun avanga awm a ni a, tun a awm avang hian nakkin pawh a awm ngei a ni. Nakkin chu i hmabak, i la thlen rih loh, ‘tun’ ang chiaha i la rah thlen tur chu a ni. Nakkin i thlen hun tur i nghakhlel em? Nakkin chu nakkum a ni thei, chutih hunah chuan HIV positive i ni ang em? Sawn i pai dawn em? Tual i that zawk dawn nge? Missionary i thawk zawk dawn em ni? Chutiang chu tunah hian duh thalin han thlang teh le?

KEI CHU
Professor nih ka tum lo. Ka tlin lova ka tui lo bawk. Pangpar huana kumtluang par ang lek nih chu thil zahthlak ni lo mah se, nih ka tum lo. Kan thianza zingah ka fing ber lo tih ka inhria a, mahse a â ber nih erawh ka tum lo. Lehkha hi ka ziak thiam lo tih hi thudik a ni a, ziah thiam tum erawh chu ziah thiamna tih ka man fuh tlat thung.

NANG
Tunah khan i nakkin hun tur engnge i thlir? I hmu lawk em? I suangtuah vel em? I nakkin lo thleng tur chuan phurrit a thlen che em? Nge, i phur? Eng tluka hautakin nge i inbuatsaih? I tlan chak dan speed kha i teh ngai em? I hriat loh chhungin i chawlhsan/pamtul der tawh em ni? Tlang chungah hian han lawn ila, a aia sang hi a lo awm zel thin. Mahse, mi zawng zawngin a sang zawnga lawn zel chu an tum kher lo. Thenkhat chuan han chawlh hahdamna mai tur an hmu thuai a, han inkhuarna mai tur pawh kan hmu chawk mai. Kan tih thiam zawng theuh hi zah thiam takin kan thawk tur a ni ang. Miin a tih theih chin leh a nih theih chin hre chung si-a chumi avanga a thiamna leh a tha leh tui a hman si loh chuan a tunhnu kawng a hnawhping a ni. I hlawhtlinna kawng hnawhpingtu i ni thei a, i nunkawng su-eng theitu pawh nangmah chauh i ni.

I DURBIN
I thlirna mit kha a fiah that a tul hle. I mitin a tlin phak bak hmu thei turin enhlatna durbin kha a model a out lutuk tawh em? Update a ngai mai thei a nia! I durbin chuan a thlirpui hlat theihtawp a thlirtir ang che. A thlirtu nangmah intheihnghilh khawpin thlir hla lutuk duh suh. A hlat leh hnaih lam kha hlawhtlinna a ni mai lo. A taka i pen chhuah leh pen chhuah loh kha a tawp i thlen leh thlen loh a ni zawk.

TLANGKAWMNA
Nakkin chu rei kan ti duh khawp mai. Mahse, a lo thlen meuh chuan rei kan tih kha theihnghilh tum lovin kan hre tawh lo mai a ni. Nakkina nih i chak kha tunah han ni chhin nghal la, a tul ang ang chu hmachhawnin sutlang par par nghal rawh le. Pathian rinchhan chung zelin aw..
(source: http://www.zoin.info/)

----