Horoscope September 2010

Aries (March 21-19 April)

Thla hmasaa i hlimna leh i thil tawn lawmawm tak takte kha tun thlaah chuan a lo kiam leh vek tawh ang a, a bul atang bawka i tan that leh a ngai dawn tih i pawm ngei a tul ang. Tun thla chhung hian kaisan emaw, hmasawnna lian tham emaw a thleng maithei a, mipa tan phei chuan news ropui tak, i tana tha tur lo beisei chi a ni ang. Hmangaihna lamah pawh i tana tha tur tak thil a lo thleng ang a, mahse hriatthiam a har dawn a, hriatthiam tumin ngun takin chhut chiang ang che.


Taurus (April 20 - May 20)
Tun thla chu hlawhtlin duhnain i rilru a luah hneh ang a, engemawchen chu hlawhtlinna kawng pawh i zawh dawn a ni. Rei tak chhung hlawhtlin duha i lo ngaihtuahna kha zinga ni a lo chhuaka a lo eng tan ang hian a lo eng tan dawn ta. Khawtlang lamah dinhmun duhawm lo i tawng maithei a, mahse a tawpah chuan i tana thatna tur tho a ni. I thian emaw i tih pakhatin i dinhmun pheh thlak tumin a bei chiam maithei a, September thla tawp lamah chuan fimkhur takin i nun hmang lehzual ang che.

Gemini (May 21-June 21)
Tun thla chu i chungah thil chi hrang hrang a thleng dawn a, hlimna leh lawmna inchhawkin hun i hmang dawn a ni. Hnathawk tawh i nih chuan i hnathawhnaah i tluang dawn a, zirlai i nih chuan i zirnaah i tluang ang. A hmaa i nun delhtu thil chi hrang hrang lakah tun thla chu i fihlim dawn a, thian kawm nuam i ti ang a, a huhoa inkawm khawmnaah i rilru a hlim hle dawn a ni. September thla hi i tan zin chhuahna hun tha tak a ni bawk a, i zin chhuah chu i zinnaah i la tawn ngai loh tha tak i tawng maithei.

Cancer (June 22-July 22)
Kuminah i nuna thil pawimawh tak tak i tawng tawh a, tun thla chu i thiltih tawh leh i thil tawn tawhte ngaihtuah let na'na hun tha a ni. Kumin kher lo pawh i nun kal tawha i hlawhtlin tawhna leh i hlawhchhamnate ngun taka i ngaihtuah chuan tun hun hi hmasawn zel tura ke pen leh dan tur remruat hun lai tak a ni dawn a, ngaihtuah chiang loa i nun i hman zel ringawt chuan nakinah i la inchhir ang tih a hlauhawm awm a ni. I chhungte bulah hun hmang tam la, i battery kha recharge la, thlasik lo thleng tur hi hlim tak leh nuam taka i hman theih na'n inpuahchah ang che. Tun thla chu hmangaihna lamah hmasawnna em em tur a awm lo va, a ngai anga tha taka i awm theih chuan a tawk viau a ni.

Leo (July 23 - August 22)
Tun thla chu i mimal nun ngaihtuah ngut ngutna hun a ni lo va, active taka hlim taka i nun i hman a tha zawk ang. Amaherawhchu hmangaihna lamah thil danglam deuh tak i tawn dawn avangin hmangaihna lam ngaihtuah na'n erawh chuan hun engemaw chu i hman a tha ang. Nangma mimal thil buaipuia thla tluana i buai hnuah thla tawp lamah chuan i rilru leh taksa a chauh viau maithei a, chumi hunah chuan thian kawm tama intihhlimna lam i tan a tha tih i hre dawn nia.

Virgo (August 23 - September 22)
Thla hmasaa i hlawhtlinna leh i hlimna avangin i rilru a la lawm a, khami vang khan fimkhur lo takin i nun hman phah suh ang che. Tun hi fimkhur loh vanga i nuna thil pawi a thlen theih hun a ni. Eizawnna lama tlan chak lutuk a hlauhawm ang bawkin i nunah pawh tlan chak lutuk a hlauhawm a, i tluk palh loh na'n i thiltih kawng engkimah i fimkhur hle a tha ang. Tun thla hi nitina i tihturte tha lehzuala thawh dan tur ngaihtuaha a taka thawh hun a ni a, mahse i thiltih chi hrang hrangah thutlukna lian tham siam lo la, hmangaihna lamah ngat phei chuan thutlukna i siam dawnin October thla lo thleng tur hi dawhthei takin nghak hram ang che.

Libra (September 23 - October 22)
Tun thla chu Venus a lo let a, thian lam aiin hmangaihna lamah i nun a inher dawn a, ngaihzawng nei lo i nih chuan thla laihawl velah hian tuemaw i tawng maithei a, i mi tawn chu i awmdan a zirin i hnaihin i hnaih lo thei dawn a, remruatna fing hian sutkuak chin a neih theih avangin remruat thiam a pawimawh hle ang. Hemi rual vel bawk hian hun kal taa i lo duh ruk tawh tak pakhat pawh i nunah a lo lang tha leh maithei a, thutlukna i siam dawnin fimkhur la, ni khat thil thuah thutlukna siam ngawt suh ang che.

Scorpio (October 23 - November 21)
Tun thla chu i hmaah duhthlan tur chi hrang hrang a lo lang dawn a, duh i thlan sual loh na'n nangmaha awmsa, fimkhur taka i ngaihtuahna thin kha hman nasat zual a tha ang. A bikin hmangaihna, inngaihzawnna leh kawppui chungchangah duhthlan tur a awm dawn a, hemi chungchangah bik phei chuan i phurna ringawt ni loin i thinlung duhna tak tak ngaihtuah la, chumi hnuah duhthlang chauh ang che. Hmangaih leh duh i neih sa tawh chuan tun thlaah hian i chhungrila i ngaihtuahna tak tak hrilh la, rilru nuam taka a awm theihna tur ngaihtuah la chu chuan nakin zela i hmakhua a tieng ngei ang.

Sagittarius (22 November - 21 December)
A mize pangngaia a eng zawnga thil i thlir thinna avangin tun thla chu thil inthlak danglam tawng turin i inpeih hle a, idea thar hmanga nun hman na'n pawh hun remchang a lo inhawng dawn e. September thla chhung hian hruaitu i nih theihna chance a lo inherchhuak dawn a, hruaitu nih i duh vang ni loin, miin hruaitu ena an en che avang zawkin i duh vak lohnaah hruaitu pawh i ni chho dawn niin a lang. Hetih lai hian i chhungril lamah lunglen rukna leh khawhar rukna a lo awm dawn a, mite'n i rilru chhungril hriatthiampui che sela i duhna a lo lian viau dawn bawk a ni.

Capricorn (Dec. 22 - January 20)
Kawppui chungchanga i duhthusam thleng loah thil awmdan thlak danglam leh siam that i duh chuan tun thla hi hmalakna lian tham neih hun tak a ni ang. I nun hman dang pangngaiah pawh i duh dan ni chiah lo thlak danglam ngai eng engemaw i tawk a ni maithei a, chutiang siam that na'n chuan hun tha a ni e. I hmalam hun thlira thil i tihnaah thian tha an pawimawh a, nangma thu thua thil ti pawp pawp loin thiante thurawn ngai pawimawh ang che. Thla pumpuiin midang tan inhawn lehzual tum la, engkim a nih ang turin a kal purh mai ang.

Aquarius (January 21 - February 19)
Tun thla chhung hian thil harsa paltlang ngai, paltlanga thil tam tak zir chhuah theihna i hmachhawn dawn a, pumpelh tuma i tlanchhiat chuan zir tur zirchhuak loin ngai i awh ang a, tlanchhe loa huaisen taka i hmachhawn erawh chuan i nun kal zel atan hlawk thlak tak a ni ang. I thil tawn tur hi fing tak leh awmze nei taka i tawn chuan miin nangmah an hriat phah chein an fak phah che ang a, chu chuan thil chi hrang hrangah hmasawnna a thlen dawn che a ni. Thla tawp lamah hmangaihna lamin i rilru a luah hle ang a, i lungawina khawp chu hmangaihna lamah i tawng dawn a ni.

Pisces (February 20 - March 20)
Pisces i nihna angin natural thil zah mi i ni a, tun thla pawh chu lam chu i ngaihtuahnaah a lian hle maithei. Chutih rual vek chuan tun thla chu i thiltum tihlawhtling tura ke i penna kawngah lungawi lohna neuh neuh leh rilru nawm lohna eng engemaw i tawk dawn niin a lang a, amaherawhchu lungawi lohna i neihte avangin i thiltum chu a hlawhchham phah chuang lo ang. Chuvangin i lungawi lohnate theihnghilh la, i hmalam a eng a ni tih hre reng zawk ang che. Nangmah nihna dik tak hriaa mi awmze nei tak i ni tih i inhriatchhuah chuan mak i ti hle ang a, i hmangaih tak leh i duh tak khan a ngaihlu hle che a ni tih i hriat phei chuan i lawm hle ang.