A monthly lifestyle magazine

Aizawl, Mizoram.

Sunday, September 12, 2010

Health: I hriselna tur sports 5

Taksa nalh ve tak anga lang, belhchiana zawi em em, dul laia chuang awm deuh hnuk te, thau kiar liar luar te, thau nghet tluk mai te, sang ve zuai si kawng lianpui te, thau tial tialte kan tam ta. Hengte hi kan nun hman dan dik lo vang a ni awm e. Lirthei kan uar a, kea kal theihnaah pawh lirtheiin kan kal zel a, TV enin kan thu hnem a, ei kan insum lo va, taksa kan sawizawi ngai hek lo! Hetianga kan awm zel chuan hrisel lohna chi hrang hrangin min tlakbuak ang a, hrisel, taksa hahdam, vun nalh leh hmelthatte chu kan hlat tial tial dawn a ni. Heng pumpelhna tur bul pakhat chu sports a ni a, sports hi midang nena va infiam ngawr ngawr a ni lo va, i tih theih i hriselna tur sports panga kan sawi dawn a, hengte hian i rilru a tihlim ang a, i taksa a tizangkhai bawk ang a, mi mit i lak phah bawk ngei ang.

Jogging
Tlan dan chi hrang hrang a awm a, jogging hi taksa sawizawina atana muangchanga tlan hi a ni. Darkar khatah km 6 vela chakin i tlan ang a, chutianga minute 30 i tlan chuan calorie 450 i paih ziah thei ang. Hetiang hian a theih chuan nitin tih thin tur a ni. Jogging hian mihring taksaa thawkna leh lung a tichak a, taksaa tul lo lai paihin a nihna tur angin taksa a awm phah thin. Kan tlan hian nasa taka kan thlan thin avangin thawmhnaw hak tur ngaihtuah uluk a ngai a, sports dress mumal tak hak a tha a, tluk palh emaw, kena emaw a thlen loh na'n pheikhawk bun tur pawh fimkhur a ngai a, sneaker chhuat pan lutuk lo bun a tha ang.

Tlang lawn
Kan ramah tlang lawn tur a tam em em a, taksa sawizawina tha tak leh rilru tihthawlna tha tak a ni a, mahse kan uar lo hle thung a, engnge a chhan ni ang tih chu mahni theuhin chhang mai ila a tha awm e. Tlang lawn hian minute 30 chhungin calorie 370 vel kan paih thei a, mahse he sport ti tur hian hmanraw mumal tak neih a ngai a, i tih hmain ngun takin hriatchian tum hmasa ang che.

Tui chen
Tui chen hi sport danglam tam, taksa bung zawng zawng tana insawizawina tha a ni an tih thin hi thudik tak a ni a, ruh leh tihrawlin a ngeih em em a ni. Darkar chanve chhung tui kan che hian calorie 360 vel kan paih hman a, minute 30 chhung tui chen char char chu a har ang a, i chawl zel mai dawn nia. Picnic leh intihhlim nikhuaa hah lutuka chen vak erawh chu taksain a ngeih chuang lo va, regular taka tih thin dan ngaihtuah tur a ni.

Cycling
Darkar khata km 20 vela chaka cycle kan khalh hian minute 30 chhungin calorie 350 vel kan paih hman a ni. Mahse chhuka tlan satliah ngawt a ni lo va, kawng zawl emaw kawng chho emawah kal thin ang che. Thirsakawr khalha taksa sawizawi hian tihrawl a tichak a, thisen kal a ti tha a, lung a ti chak bawk. Chubakah thirsakawr khalh hi kal velna nuam tak a ni a, kan ramah kan ching vak lo nain a ching zinga mi nih tum tlat ang che. Khawpuiah chuan lirtheite a lo tam a, thirsakawra tlan velte a harsa maithei a, khawpuia cheng i nih loh phei chuan thirsakawr tha tak pakhat chu neih ngei tum la, taksa sawizawi tum em em lo pawhin tula kal vel na'na i hmanin i lo insawizawi reng tihna a ni ang.

Indoor games
Table Tennis khelh hi thiam tawh hnu chuan a lan ang aiin a hahthlak hle. Taksa a che nasa a, ball lak tuma kan phet vel naah kan lo thlan phung thin. Infiamna hautak lo tak a ni a, a nuam bawk a, i taksa leh i rilruin a ngeih hle dawn bawk a ni. Table Tennis bakah hian badminton khelh hi taksa a che nasain a hahthlak viau bawk a, a theih chuan Table Tennis leh Badminton khelhna hnai ber pan ve thin la, thlan tla hnepin haw thin ang che.

A tawpna atan chuan i theih anga tam sport tih tum tawp mai rawh! Sport ti ngai lo chu an nun a nguai a, an taksa a chak lo va, an zuanzang lo va, an pian a nalh rei thei lo va, an complexion a tha rei thei lo va, an chevel a hmuhnawm rei thei lo. Sport i tih hnem chuan i rilru a nuam ang a, i taksa a hahdam bawk ang.

No comments:

Post a Comment