Life: I rilru leh taksa a chau thin em?

Hna vang emaw, chhungkaw relbawlna buaipui vang emaw, mawhphurhna ngah vang emaw, harsatna chi hrang hrang vang emawin i rilru a chau thin em? Chutianga i rilru leh taksa a chauh chuan a hnuaiah hian i tihtur chi hrang hrang kan han tarlang a, hengte hi lo ti ve chhin la, i rilru leh taksain a hahdam phah ve ngeiin a rinawm.

1. Cell phone hi kan nitin nunah kan mamawh ta theuh a, mahse midangin min biak duh apianga biak theiha awm reng mai hi ninawm chang a awm ve a, chawlh hahdam kan duh laia midangin min biak sekte pawh hi a chauh thlak a, chuvang chuan ni khatah darkar khat tal chu i cell phone kha off thin teh.

2. News hriat hi bengvarna a ni tih chu tupawhin hrilh ngai loin kan hre theuh a, mahse news-a thil tha lo thleng thar leh kan rilrem loh zawng tute emaw thusawi leh thuchhuakte ngaihthlak ngun lutuk hian rilru a tihahdam lo thei a, chuvang chuan i chawlh hahdam duh chang chuan news ngaithla lo thin la, chanchinbu headlines pawh chhiar lo thin rawh.

3. I thianthate bia la, inkawmna hun remchang zawng rawh. Thiante hi kan nuna kan hlimna siamtu bul pakhat an ni a, i rilrua awmte i sawi thei a, a tul chuan an bulah i tap thei a, i lawm a nih leh i nuihpuiin fiamthu i thawhpui thei bawk. Science lam chhutna atang pawhin midang nena awmze nei taka inkawm hian rilru leh taksa hahdam lo a tihahdam nasa hle tih hmuhchhuah thar zel a ni.

4. I nuna pawimawh i tihte hrechiang rawh. I tana pawimawh tak takte engnge tih ngun takin ngaihtuah la, chhungkua, thiante, hriselna leh eizawnnate a ni em? A dang engnge la awm? Kohhran leh khawtlanga inhman em ni? Chiang takin hriat tum la, thil chi hrang hrang ngaihtuah kual loin i tana thil pawimawhte hi ngaihtuah bik ang che. I nuna thil tul loa i hriat i tih thinte chu bansan la, chu chuan engemawchen i nun a tihahdam thei ang. Entirna'n, zuk leh hmuam leh zute hi mi thenkhatin tha ti lo chung chungin an ti a, an taksain a tuar a, an rilru lamah inthiam lohna a awm a, sim duh reng chungin an ti reng tho a, an rilru leh taksain a chhiat phah nge nge thin. Chutiang bawkin rilru nuam lo chung chunga mahni thawh tui loh hna thawh reng te, hruaitu ni duh lo chung chunga eng pawl emaw a hruaitu nih rengte hi rilru tihahdam lotu lian tak a ni thei a ni.

5. Nature nen inzawmna nei rawh. Taksa sawizawi ni lem lo pawha park-a len vahte hi rilru leh taksain a ngeih em em a, park tha a awm loh pawhin hmun reh deuh, thing tamna hmuna kal velte a tha hle. Hmeichhia pawh eizawnna, chhungkua leh damchhung khawsak reng reng ngaihtuaha pangpar thlenga thlah thlam pawh a awm thei a, pangpar nen inzawmna in nei tawh lo a nih pawhin inzawmna siam thar turin nalh takin han khawi phawt mai teh.

6. I nun dan kha ngaihtuah chiang la, phurna reng reng nei loin i hun i hmang em? Mihring taksa hian sawizawi leh taksa chetna dang regular taka tih a mamawh reng a, diet hrisel takin weight mumal a siam a, taksa a tichak bawk a, rilru a khawih zel bawk a ni. I taksa i sawizawi ngai loh chuan i rilru leh taksa a harh thei ngai lo vang.

7. Mahni inrintawkna te, taksa pumpui hriselnate leh nitin khawsaknate hi nitina i rilru hahdam lohnate a tireh zung zung thei a, i inring tawk em? I hrisel tha em? Nitin khawsaknaah harsatna i tawk em? tihte ngaihtuah thin la, a tha lo lam a awm a nih chuan chinfel thuai thuai thin tum ang che.

8. Thawk dan dik hi a pawimawh hle. I hnarin rei tak thawk han la vang vang la, i boruak thawk luh chu i chuapa a awm hnuah thaw chhuak leh mai loin vawi ruk chhiar phawt la, chumi zawnah muangchangin i kâ atangin thaw chhuak leh la, chutiang chuan nitin minute engemawzat ti ziah thin la, thaw i pik leh ngui ber bur engemawchen chu a reh huai thei a ni.

9. Nui rawh. Nui hawk hawk rawh. Film nuihzatthlak en la, fiamthu thianghlim inziahna lehkhabu chhiar rawh. Nuih hi rilru leh taksa chau tihrehna tha tak a ni. Rilru hah a tireh huai a, thinrim rukna neih pawhin kan theihnghilh theih phah thin. Chu mai bakah nuih hawk hawkna hian kan taksaa natna dotu a tichak a, bacteria leh virus lakah taksa a veng tha a, hritlang leh natna dangin taksa a hneh theih loh phah thin a ni.

10. Vawi khatah thil chi hrang hrang ti kawp loin thil pakhat chauh ti thin rawh. Rilru hmanhmawh deuh ut ut leh thinurna lo piang thin hi vawi khata thil kan tihkawp vangte a ni duh viau a, rilru hahdam taka i tihturte i tih theih na'n vawi khatah pakhat zel ti la, i tih zawh hunah i tihtur dang chu i ti leh dawn nia. Hemi bakah hian i thiltih zawh tawh chu a hnu lamah endik leh thin la, i thiltih that i hmuhte chuan a hnu leh zelah tih leh a tiphur dawn che a ni.

I chunga thil thlen dan hian i rilru a tih haha, i thluakah a len loha, i tawt deuh up up chuan i rilru leh taksain a tuar dawn tih hria la, i rilru leh taksa tih hahdam tum hram thin ang che. I nghawng hnung lam te, i mit leh beng inkar (temple) te, i bengte kha massage thin la, chu chuan rilru tawt a tireh huai thei a, fai taka inbuala mut hahdam pawh a tha hle bawk a ni. #